Оралда 2014 жылы ашылған теннис орталығы бүгінде толыққанды қызмет жасауда. Бүгінгі таңда оралдық 140-тан астам бүлдіршін аталмыш спорт түрін меңгеріп, жаттығып, шеберліктерін шыңдап жатыр. Бапкерлер баланы тенниске алты жеті жастан бастап берген дұрыс,-дейді. Аталмыш спорт түрі баланың жан-жақты дамуына көмектесіп, жеке тұлғалық қасиеттерін дамытуға ат салыспақ.

Жазғы уақытта, аптап ыстыққа қарамастан жаттығып жүрген өрендердің қарасы қалың. Олар аптасына бес рет жаттығып, шеберліктерін шыңдауда. Олардың қатарында Аңсар Қайыржанов та бар. Жас спортшы бес жылдан бері теннисті жанына серік қылған. Жастайынан бұл спорт түрімен айналысып жүрген спортшы қазірдің өзінде түрлі сайыстарға қатысып, үздіктердің қатарынан табылыпты. Жас өрен әлемнің үздік ракеткасы болуды армандайды.

Қазіргі таңда, оралдық спортшылар тамыз айында ұйымдастырылатын еліміздің басты аламанына дайындалып жатыр.

Теннис ойыны Орал қаласында біртіндеп дамып келеді. Осыдан 3 жыл бұрын облыс орталығында теннис орталығы ашылды. Одан бөлек 300 орындық бірнеше теннис корттары қолданысқа берілді. Барлық орталықтарда ата-аналар мен үйірмеге қатысатын балаларға қолайлы жағдай ұйымдастырылған. Балаларды үйірмеге 5-6 жастан бастап қабылдайды. Аз да болса икемі бар бүлдіршіндердің шеберліктерін шыңдап, осында еліміздің болашақ жеңімпаздарын дайындаймыз дейді бапкерлер.
Халықаралық теннис күні теннис федерациясымен осы спорт түрін бұқаралық деңгейде дамыту мақсатында белгіленген болатын. 2013-жылдан бері осы дата спорт саласында кеңінен аталып келеді.