Облыс орталығындағы 3 шақырым ауыз су және кәріз су құбырларына қайта жаңғырту жұмыстары басталды. Биыл 5 жобаға «Нұрлы жол» бағдарламасы аясында республикалық бюджеттен қаржы бөлінген. Қаладағы ескірген су құбырларының орнын заманауи материалдардан жасалғандары алмастыруда. Құрылыс жұмыстарының алдыңғы легі басталып кеткен. Шмидт Айталиев көшесі бойындағы - 1600 метр аралықтың су құбыры мен Гагарин мен Жамбыл көшелерін қамтитын су құбыры 1968 жылдан бері жібі түзу жөндеу көрмеген.  Шаһардағы су жүйелерінің дені ескірген. Көбісі сонау 60-шы жылдары орнатылған. Ал, тұрғындар болса судың түсі сарғыш, қысым төмен деп шағымданған болатын. Құрылыс жұмыстары 30 маусымда аяқталатын болады. Биыл «Нұрлы жол» мемлекеттік бағдарламасы аясында аталған жұмыстарға қазынадан 700 млн. теңгеден аса қаржы бөлінген. Яғни, шаһардағы 3 шақырымға жуық ауыз су жүйесі қайта қалпына келтірілмек. Жұмыстар кезең- кезеңімен іске асатын болады.

Тәуелсіздіктің төл символы саналатын ұлттық валютамыз теңгенің айналымға енгеніне 25 жыл толды. Елбасы 1993 жылдың он екіншісі қарашасында тиісті жарлыққа қол қойды. 25 жылдың ішінде теңге түрлі кезеңді бастан кешіп, дизайны бірнеше мәрте өзгеріске ұшырады.

Ия, тәуелсіздігін жаңа жариялаған Қазақстан рубльден бас тартқан ең соңғы ел болды. 1992 жылы Елбасының құпия бұйрығымен төл теңгеміздің дизайыны бекітілді. Сол жылы теңгенің авторлары Англияға ұшып, валютаны бастыртып шығарған еді. Елбасының 1993 жылы 12-ші қарашада тиісті жарлыққа қол қойғаннан соң, 15- қарашадан бастап, төл теңгеміз айналымға енді. Еліміздің аумағында банкнот шығатын фабрика мен монета сарайы болмады. Төл теңгенің тарихын танып білу, оны өскелең ұрпаққа түсіндіру бүгінгі күннің басты парызы. Облыс орталығында орын тепкен ұлттық банктың жанынан ашылған мұражай 1998 жылы өз жұмысын бастады. Музейде теңгенің тарихы баяндалған.

Мұражайдың ішінде тәуелсіздік жылдары түрлі кезеңді бастан кешкен түрлі жылдары жарық көрген монеталарды тамашалауға болады.

Еліміздің барлық қаржыгерлері 15-ші қарашада төл мерекесін атап өтеді. Биылғы жылы қаржы саласында қызмет етіп жатқан жандар 25 жылдық мерей тойын атап өтеді.

Жиынға келген қаржы саласының ардагерлері қиын кезеңді бастан кешкендіктерін атап өтті. 1993 жылы  теңге айналымға енген үш күннің ішінде еліміздің барлық қаржыгерлері 957 млрд рубльдей ақшаны теңгеге ауыстырып, бүгінгі күні ұлттық валютамыз бен экономикамыздың дамуы үшін жұмыстанып жатыр.

Шара барысында үздік деп танылған қаржыгерлер облыс әкімінің алғыс хатымен марапатталды.