«Орал таза сервис» ЖШС серіктестігі қызметі қалалық тұрғындардың жан басына шаққанда 100 теңгеге қымбаттауы мүмкін. Өйткені бүгінде кәсіпорын қызметінің сапасы төмендеп кеткен. Серіктестік директоры Рафхат Данағұлов берген мәліметке сүйенсек, коммуналдық мекеменің техникалық базасы ескірген, әрі кіріс шығынды жаппай отырған көрінеді. Сондықтан коммуналдықтар амалсыз тариф құнын өсіруге бел буған. Шаһар тазалығына жауапты коммуналдық мекеме 2016 жылдан бері жеке кәсіпорын ретінде қызмет атқарып келеді. Мекеме директорының сөзінше, Орал қаласын күнделікті тұрмыстық қалдықтардан тазартуда қызметкерлер күніне бірнеше мәселемен бетпе-бет келіп, жұмыс жоспарға сай жасалмай келеді. Бұған басты себеп қаржының жеткіліксіздігі. Яғни кәсіпорынның техникалық базасы 10 жылдан бері жаңартылмаған.
Қазір тұрғындардың мекемеге қарызы - 150 млн. теңгеден асады. Кәсіпорынның жан басына шаққанда қызмет көрсету құны жыл басында 10 пайызға арзандаған болатын. Енді шамамен 100 теңгеге қымбаттау жоспары бар. Сонымен қатар сала мамандары тариф құны осы бағада қала берсе Орал Ақсайдың кейпіне енуі мүмкін екенін жасырмады. Өйткені техника ескі, қызметкер аз. Осы айда серіктестіктен 4 көлік жүргізушісі жалақының аздығынан жұмыстан өз еріктерімен кеткен.