Суретші ескерткіші. Жалпақтал ауылында жерлесіміз режиссер, сәулетші, суретші, Қазақстан Журналистер және Суретшілер одағының мүшесі Сәкен Нәжімедденұлы Ғұмаровтың ескерткіші ашылды. Тұғыртастың орнатылуына аудан әкімдігі қолдау танытып, "Сәкен Ғұмаров атындағы қоғамдық қор" мен белгілі кәсіпкерлер үлкен еңбек сіңірген. Салтанатты шараға облыс орталығынан танымал өлкетанушы, тарихшы, суретші мамандар мен қоғам қайраткерлері, аудан билігі арнайы шақырылып, шара соңы «Сәкен Ғұмаровтың жұлдызды ырғағы» атты ғылыми-тәжірибелік конференциямен жалғасты. Толығырақ тілшіміз толықтырсын.

Бір басына режиссер, актер, журналист, сәулетші, суретші сынды бірнеше өнерді тоғыстырған, кескіндеме өнерінің абстракциялық бағытында салған терең туындыларын лезде өз халқы ұғынбағанмен, шетелдіктердің таңданысын тудырған ғұлама суретші Сәкен Ғұмаровтың ескерткішінің ашылуына келген көзкөрген бүгінгі ел ағалары, суретшінің жасынан қандай бала болғанын естеріне алып, естеліктер айтты.

Ғұмыры қысқа болғанмен, артына 400-ден астам астарлы туындылар қалдырған ұлы суретшінің ауылына ескерткіш болып оралуы жалпы ел үшін, суретшілер қауымы үшін үлкен қуаныш болды.

Кейіннен Мәдениет үйінің фойесінде мәртебелі меймандар облыстық С.Ғұмаров мұражайының жылжымалы көрмесі мен арнайы ұйымдастырылған конкурста сертификатқа ие болған оқушылардың «Әсемдік әлеміне саяхат» атты туындыларын тамашалады.

Шара артынша «Сәкен Ғұмаровтың жұлдызды ырғағы» атты ғылыми-тәжірибелік конференциямен жалғасып, қатысушылар қоғамның шеңберіне сыймаған қылқалам шеберінің өрлігі мен ерлігінен, өмір дерегінен мәліметтер келтіріп қызықты баяндамалар жасады.

Елімізден өзге Ресей, Украйна елдерінде 40-қа жуық көрме өткізген суретшінің қазір өңірімізде 20-ның үстінде ғана туындысының түпнұсқасы сақталған. Түсініп қараған жанға сызық пен шимайға толы тұспалды туындылардың астарында қаншама сыр жасырулы жатыр.

Еркіндікті сүйген суретшінің еңселі ескерткіші де нағыз өз болмысын көрсеткендей. Мүсіннің ашылуына еліне және бейнелеу өнеріне жанашыр жергілікті кәсіпкерлер зор қолдау көрсеткен.

шара соңында аудан басшылығынан бастап жиналған меймандар Сәкен Ғұмаров мұрасын әрмен қарай насихаттауды жүйелі түрде жалғастыратындарын айтып тарқасты.