«5 адамның өмірін қиған жүргізушіге тек 5 жыл бас бостандығынан айыру жазасын бергендігімен келіспейміз». Дәл осындай наразылықпен қала тұрғындары арнамызға хабарласты. Оқиға ағымдағы жылдың 1 қаңтарында орын алып, кінәлі деп танылған жүргізушіге соттың үкімімен бес жылға жалпы режимдегі колонияда жазасын өтеу шешімі шығарылған.

Жан түршігерлік оқиға осы жылдың алғашқы күні сағат 18:10 шамасында Самара-Шымкент тас жолының 313-ші шақырымында болған. «Toyota Land Cruiser» автокөлігін тізгіндеген жүргізуші қарсы жолаққа шығып кетіп, алдында келе жатырған көлікті байқап, рульге ие бола алмай жүк көлігі тіркемесімен соқтығысқан. Содан кейін ол ВАЗ 2112 көлігімен бетпе-бет түйіскен. Жол апаты 5 адамның өмірін қиды. Олардың қатырында аяғы ауыр келіншек бар. Болған оқиғаны екінші көлікте келе жатып өз көзімен көрген Индира Меңдіғалиева әп-сәтте күйеуінен, апа-жездесінен және бауырларынан қалай айырылып қалғандығын көзіне жас ала отырып, есіне түсірді. Теректі аудандық соты төрт айға жуық уақытқа созылған тергеуден соң болған іске айыпты жүргізушіге қатысты 5 жыл бас бостандығынан айыру және моральдық шығын ретінде әр отбасыға 3 млн тенге төлеу туралы шешім шығарған. Алайда 9 баласы жетім қалған бірнеше отбасы бұл шешіммен келіспейді. Олар қылмыскерге кемі 10 жыл берулерін сұрап, аппеляциялық шағым түсірген. Алайда еш нәтиже болмай, үкім өзгеріссіз қалдырылған. Сондай-ақ кінәлі тарап жақтан ешқандай көмек болмағандарын де тілге тиек етті. Жәбірленуші тарап бұнымен тоқтап қалмаймыз дейді. Енді олар Жоғарғы сотқа шағымданбақ ниетте.

Қуаныш Ахметовты өлтірген күдіктілердің туыстары сот үкімімен келіспейді. А.Әділов, А.Қафизов және Ә.Қонысқалитың туыстары тергеушілер мен сот төрешісіне жоғарыдан «бұйрық» берілді деген пікірде. Абзал Әділов 17, Аян Қафизов 18 жылға бас бостандығынан айыру жазасын қауіпсіздігі барынша жоғары қылмыстық-атқару жүйесі мекемесінде өтеуге сотталды. Әбутали Қонысқалиға уәкілеттілігін асыра пайдаланғаны үшін 2 жыл 6 ай мерзімге бас бостандығынан айыру жазасы белгіленді. Күдіктелердің туыстары сот үкімімен келіспейді. Мәселен, Аян Қафизовтың әкесі сот процесі басталғанда "Абайсызда адам өліміне әкеліп соғу фактісі болды" деп айтылғанын, ал кейін "Қасақана кісі өлтіру" фактісі бойынша іс қозғалғанын айтады. Сот талқысында анықталғанындай, 2019 жылғы желтоқсан айының 24-інен 25-іне қараған түні күзет агенттігінің қызметкерлері Әділов, Қафизов және Қонысқали жұмыста арақ ішкен. Сағат 03:30 шамасында олар шақырту бойынша уақытша бейімдеу және уытсыздандыру орталығына барып, сол жерде медициналық куәландырудан өткізуге жеткізілген жәбірленуші Қ.Ахметовті көрген. Кейін оны алып шығады. Қ.Ахметов қашып сол маңдағы жанар-жағармай құю бекетінен көмек сұрамақ болады. Алайда ешкім қол ұшын бермеген соң қақпадан секіріп өтіп, құтылып кетпек болады. Алайда оны үшеуі жерге тартып түсіріп, тепкілеген. Олардың бірі-Абзал Әділов. Естеріңізде болса, Абзал осыдан бірнеше жыл бұрын бір бүйрегін бейтаныс аруға беріп, өмірін құтқарып қалған болатын.Күдіктілердің қорғаушылары сот үкімімен келіспей, істі аппеляцияға беріпті. Қанды оқиға осыдан екі жыл бұрын 25-ші желтоқсанда болды. Ал сот шешімі 28-ші қазанда шықты. Алайда заңды күшіне әлі енген жоқ.