Екінші деңгейлі банк алдындағы қарызын өтей алмай, өзін банкротпын деп жариялаған тұлғалар заңмен қалай қорғалады? Заңның талаптары мен нормаларын қаржы вице-министрі Ержан Біржанов брифинг барысында жіті түсіндіруге тырысты. Өздеріңізге мәлім, өткен жылдың соңында Президент «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңға қол қойды. Енді 3 наурыздан бастап қарызын өтей алмай жатқан азаматтар аталған Заң бойынша банкроттық туралы өтініш бере алады.

Несиеден көз аша алмай, қарызға белшеден батып, соңында банктің алдында борышын өтей алмай жатқан азаматтар қаншама. Жақында қабылданған арнайы заң төлем қабілеттілігі жоқ тұлғаларды қорғауға арналған дейді шенеуніктер. Қарызын төлей алмай жүрген қазақстандықтар 3 түрлі рәсім бойынша кредитінен құтыла алады. Соттан тыс банкроттық. Оны тек банктер, микроқаржы ұйымдары және коллекторлық агенттіктер алдындағы қарыздар бойынша қолдануға болады. Оның борышы 5,5 млн теңгеден аспауы керек, кредит 12 ай бойы өтелмеген болуы керек, меншігінде тіркелген мүлік, оның ішінде ортақ меншіктегі мүлік болмауы қажет.

Ал сот банкроттығының мақсаты – банкроттың мүліктік массасы есебінен кредиторлардың талаптарын барынша қанағаттандыру. Төлем қабілеттілігін қалпына келтіруде сот арқылы борышты 5 жылға дейін бөліп төлеу мүмкіндігі көзделген Оның артықшылығы – азамат "банкрот" деп саналмайды. Ал банкрот деп танылған азамат шетелге шыға алмайды деген қауіп те жоқ емес. Вице-министрдің айтуынша, банкроттықты қарастыру кезінде ғана шектеу.

Ал бұл заң жалғыз баспанасынан айырылғалы тұрғандарды қалай қорғайды?

Сондай-ақ, шенеуніктер азаматтар өзін банкротпын деп жариялайтын кезде жалған ақпараттарды қолданбағаны жөн деп ескертеді. Себебі, мұндай өтініш бергендер жан-жақты жіті тексеріледі.