БҚО- да әлеуметтік тұрмысы ақсап тұрған отбасыларды қолдау мақсатында "Отбасы бизнес" бағдарламасы іске қосылды. Шарапаты мол жобаның тұсаукесері Тасқала ауданында өтті. Бағдарламаның аясында 1600 адам түрлі кеңес пен бизнес жүргізудің қыр-сырын меңгеріп, 200 адам арнайы грантқа ие болмақшы.

"Нұр Отан" партиясының бастамасымен әлеуметтік тұрмысы ақсап тұрған отбасыларға көмек қолын созып, азаматтарға кәсіп үйретіп, жанұясымен бірге қаражат табуды көздейтін "Отбасы бизнес" бағдарламасы өз бастауын алды. Жаңа жобаның тұсауы Тасқала ауданында кесілді. Аталмыш бағдарлама арқылы тасқалалық 4 азамат бизнес жүргізу бойынша білім алып, бизнес жоспарын қорғап, түрлі сала бойынша 100 айлық есептік көрсеткіш көлемінде грантқа ие болды.

1 ай көлемінде "Бизнес бастау" арқылы білім алып, қайтарымсыз грантқа ие болған жандардың бірі- Әділ Айтмұқашев. Мерей ауылының тұрғыны құс шаруашылығын дамытпақшы. Жеке кәсіпкер қайтарымсыз грантқа 130 қаз алып, өз қаржысына үйрек пен тауық алып өсіріп отыр. Қара күзде ала жаздай баққан еңбегін саудалап, пайда таппақшы.

Тасқала ауданында кәсіпкерлер тағдырдың түрлі сынына тап болған отбасыларға балапандарды үлестіріп, жәрдемдесті.

Сондай-ақ, аудан көлемінде ауыл шаруашылық өнімдері қойылған азық-түлік жәрмеңкесі өтті. Жәрмеңкеге келген өндірушілер сұраныстың артып отырғандығын айтады.

Отбасылық бизнесті дамытып, жанұялардың әл-ауқатын көтеруді көздеген жоба облысқа қарасты 12 аудан мен қалада жүзеге аспақ. Қазіргі таңда аталмыш бағдарламаның аясында 100 айлық есептік көрсеткіш көлемінде 200 грант бөлініпті. Сондай-ақ, келешекте 505 мың теңге көлемінде болатын 200 грант беріледі деп жоспарлануда.