ҚР Парламент Мәжілісінің депутаттары Ерлан Барлыбаев пен Мақсат Раманқұлов дзюдо орталығына табан тіреді. Нысан ішін аралап, үйірме жұмыстарымен танысты. Заманауи үлгіде салынған кешеннің жұмысына халық қалаулыларының көңілдері толғандай. Бүгінде спорт кешеніндегі үйірмелер 500-ге жуық баланы қамтып отыр екен.

Расымен, жеке кәсіпкердің арқасында салынған орталық барлық талаптарға сай. Арнайы бөлмелерден бастап қажетті спорттық саймандарға дейін қарастырылған. Көпбейінді кешенде тіпті 130 орындық көрермен залы мен спорттық киімдер дүкені бар. Орналасқан жері де келісті. №10 шағынаудан қарқынды дамып келеді. Алдағы уақытта халқы 70-мыңға жетеді деген болжам бар. Осы орайда депутаттар нысан жұмысының маңыздылығын атап өтті.

Айта кетсек, орталық шілде айында ашылған еді. Сол кезден бастап бүлдіршіндер үйірмелерге жазыла бастады. Оның үстіне орталықта ірі облыстық, республикалық сайыстар жүйелі түрде өтіп тұрады.

"Ардагер" клубының негізі 2009 жылы қаланған. Осы кезге дейін ғимарат іші салқын, сырты жұпыны еді. Міне, қаржылай қолдау тауып, күрделі жөндеуден өтіп, қайта қолданысқа беріліп отыр. Орталық көнекөз қариялардың бас қосатын орны. Көрген-білгені көп, өмір тәжірибесі жас буынға тәрбие беретін қазыналы қарттар ел ішінде аз емес. Осы орталықта солардың басы бірігеді,- дейді орталық жетекшісі.
Келешекке өшпес өнеге қалдыруды мақсат тұтқан аға буынның игі істері жетерлік. Орталықта өнерлі ардагерлер өте көп. Республикалық, облыстық деңгейде түрлі сайыстарда топ жарып жүргендері де кездеседі. Бірі – әнімен, бірі қолөнерімен жалпақ жұртқа жақсы таныс. Соған дәлел ағалар әуені вокалдық тобы. Мүшелері бүгінде талай жарыстардың жеңімпазы. Олар сөз арасында орталықта орынның тарлығын айтып қалды. Кең орталық салып берсе, алдағы күндерде ән мен жырдан бөлек, ұлттық өнерді сақтап, оны дәріптеу жолында еңбек етіп жүрген шебер ардагерлерді аталмыш клубқа жинайтын боламыз дейді қария.
Әзірге клубта 100 ардагер бар. Белсенді қариялардың қатары көбейетіндігіне сенімдімін, – дейді шараға қатысқан шаһар басышысы.

Диализ қызметін көрсететін елдегі алғашқы медицина мекемелерінің бірі «БИОС» ЖШС жұмысын 2000 жылы бастаған. Бүгінде аталмыш серіктестіктің гемодиализ клиникаларының желісі Ақтөбе, Ақтау, Повладар, Қостанай және Атырау қалаларында бар. Орал қаласында бес жылдан бері жұмыс істейтін орталық қызметін енді жаңа ғимаратта жалғастырады. Мекеменің ашылу салтанатына қала әкімі Абат Шыныбеков қатысты. Орталықта екі дәрігер-нефролог, сегіз медицина қызметкері бар.
Орталық қызметінің басты мақсаты - науқастарға сапалы қызмет көрсету. Екі ауысымдағы орталық қажеттілік туындаса, үш ауысымда да жұмыс істеуге дайын. Ол кезде 70 науқасқа дейін қабылдай алатын көрінеді. Қазірдің өзінде 45 науқас әлеуметтік медициналық сақтандыру қоры аударған 300 млн. теңгеден астам қаражатқа диализ қабылдау үстінде. Олар І, ІІ топтағы мүмкіндігі шектеулі жандар. Жалпы облыса 200 адам осы дертке шалдыққан.
Ескі де, тар ғимаратта отырған орталық қызметкерлері енді аумағы 200 шаршы метрден астам орынға көшті. Жаңа ғимарат қызметтің сапасын арттырып, халыққа жағымды жағдай жасайды,- дейді орталық қызметкерлері.