Астана екі күннен бері халықаралық деңгейдегі, салмағы бар ресми жиындардың ортасына айналды. Қазақ басшысы елімізге келген қонақтармен жеке кездесулерден соң, Орталық Азия мемлекеттері басшыларының және Еуропалық Кеңес Президентінің кездесуіне қатысты. Қасым-Жомарт Тоқаев бұл жоғары деңгейдегі кездесу – саяси, экономикалық және гуманитарлық салалардағы конструктивті өзара байланыстарды одан әрі кеңейтуге мүмкіндік береді –деді. Ақорданың хабарлауынша, соңғы он жылда Еуропалық Одақ Орталық Азия мемлекеттеріне 120 миллиард доллардан астам инвестиция құйды. Бұл, іс жүзінде, аймаққа тікелей салынған инвестицияның 40 пайызын құрайды. Ал осы қаржының 70 пайызы Қазақстанға бөлінді. Биыл 8 айда Қазақстан мен Еуропалық Одаққа мүше елдер арасындағы сауда көлемі шамамен 30 миллиард долларға жетіп, былтырғы осы кезеңмен салыстырғанда 40 пайыздан асты. Біздің елде еуропалық капиталдың үлесі бар үш мыңға жуық компания Қазақстан экономикасының түрлі секторында жұмыс істеп жатыр, – деді Президент. Әлемде орын алып жатқан геосаяси шиеленістер қауіп төндіріп отрыған жағдайда, Орталық Азия мен Еуропа елдері арасында кедергі келтіретін қабырға емес, көпір салынуы керек екенін айтты.

Сауда-экономикалық және инвестициялық іс-әрекеттер ынтымақтастығымызды одан әрі тереңдетуде. Бүгінде Еуропалық Одақ – Қазақстанның басты экономикалық әрі сауда серіктестерінің бірі болып табылады.

Сарапшылардың пікірінше, Орталық Азия елдері үшін өз экономикасын қарқындатуға үлкен мүмкіндіктер ашылып жатыр. ЕуроОдаққа энергоресурстарын экспорттаудан, сауда-саттығынан түсетін түсім Ресеймен орын алып отырған сауда тапшылығын жабуға мүмкіндік береді.