«Орал таза сервис» ЖШС – TDK-42

Қайта өңделетін қалдықтарды қабылдайтын 2-ші экопункт ашылды

Айнур Құрмашева — Thu, 17 Apr 2025 13:11:13 +0000

“Таза Қазақстан” мемлекеттік тұжырымдамасы аясында екінші заманауи экопункт ашылды. Қала тұрғындары тұрмыстық қалдықтарды қайта өңдеуге тапсырып, сыйақы ала алуды жалғастыра береді. Енді бұл қызмет Зачаганск тұрғындары үшін өте қолайлы. Мекен жайы Мөңкеұлы көшесі-77.Қалалықтар пластик, қағаз, батарея, металл және пайдаланылған күнбағыс майын қайта өңдеуге өткізе алады. Экопункт “Таза Қазақстан” мемлекеттік тұжырымдамасы аясында ашылды. Жобаның басты мақсаты - экологиялық мәдениетті қалыптастыру және қоршаған ортаға ұқыпты қарауды насихаттау.Осылай деген «Орал таза сервис» ЖШС директоры Рафхат Данқұлов көп ұзамай осындай үшінші нысанның жұмысын бастайтынын мәлімдеді."TikTok" пен "Instagram" секілді әлеуметтік желілерде қалдықтарды қайта өңдеу мәдениетіне деген көзқарас өзгеріп жатыр. Адамдар қоршаған ортаның ластануы мен климаттың өзгеруі мәселелеріне көбірек қызығушылық танытып келеді. Шараға келген жас табиғат жанашырлары көпшілікті тазалықты сақтауға, табиғатты қорғауға шақырды.Және өздерімен бірге ала келген тұрмыстық қалдықтарды тапсырды.Айта кетейік, 2024-2029 жылдарға арналған “Таза Қазақстан” тұжырымдамасы экологиялық мәдениетті дамытуға бағытталған кешенді әдістерді қамтиды. Оның ішінде жауапты мінез-құлықты қалыптастыру, экологиялық ойлау мен білім беруді дамыту бар. Бес жыл ішінде коммуналдық қалдықтарды қайта өңдеу үлесін 25%-дан 38%-ға дейін арттыру жоспарланған.Атылмыш экопункт жұмысы осы мақсатқа жетуде өз септігін қоспақ.

Жаңа қоқыс контейнерлері қойылды

Айнур Құрмашева — Mon, 21 Jun 2021 12:17:04 +0000

0:00 / 0:00

Қала әкімдігінің жанынан құрылған топ орталық базар аумағындағы сауда орындарына рейд жүргізді. Арнайы топтың құрамында құзырлы бөлім басшылары, депутаттар, жергілікті полиция және «Орал таза сервис» ЖШС қызметкерлері бар. Бұрын жүргізілген рейд кезінде кәсіпкерлерге қоқыс шығару үшін коммуналдық мекемелермен жеке келісімшарт жасау қажеттігі және әр сауда орнының алдында қоқыс контейнерлері болуы тиіс екендігі түсіндірілген болатын. Бұл шаралар орталық базар айналысындағы тазалықты сақтауға мүмкіндік береді.Аталған жұмыстардың нәтижесінде базар аумағындағы 18 кәсіпкер коммуналдық мекемелермен келісімшарт жасасып, контейнерлер қойған. Қалған кәсіпкерлер де тазалық шараларын жүргізуге ниетті.Осындай рейдтік жұмыстар бұдан былай да жалғасын табады. Екі ай ішінде орталық базар аумағына шамамен 90 контейнер қойылатын болады.

Саяжайға апаратын жол

Айнур Құрмашева — Wed, 07 Apr 2021 13:27:53 +0000

0:00 / 0:00

Оралда саяжай тұрғындары қолайлы жағдайдың жоқтығын айтып, жергілікті билікке шағымданды. Екінші саяжай қауымдастығында бірнеше жылдан бері тұрақты тұрып жатқан халық саны көп. Алайда көшелерде жол жоқ. Қоғамдық көліктер тек жазғы маусымда қатынайды. Жауын-шашын күндері балалар мектепке бара алмайды. Қала іргесіндегі саяжайларда қазір жағдай мүлдем мүшкіл. Өйткені ми батпан балшық тұрғындардың жүріп-тұруына тұсау болып отыр. Бұл саяжай бірлестігінде 5000-дай адам жыл он екі ай тұрып жатыр. Автобус қатынамаған соң балалар осы кезеңде сабаққа бара алмайды. Су да жиі тоқтап қалады. «Қоқыс төгетін контейнерлер мүлдем жоқ», - дейді қауымдастық мүшелері. Саяжай қауымдастығының тұрғындары осындай олқылықтарды алға тартып, жергілікті билік пен құқық қорғау органдарына шағымдарын жеткізуде. Бұл мәселе жауапты мекемелерге таныс. Қоғамдық көлік айдың аяғында жанданатын болады. Ал тұрмыстық қалдықтар мәселесін шешу үшін саяжай қоғамдастығының төрағасы «Орал таза сервис» ЖШС-мен өзара келісімшартқа келу арқылы контейнерлер қойып, санитариялық жағдайларды жақсартуға болады дейді.Орал қалалық бау-бақша қоғамының төрағасы Андрей Заозёров саяжайларда жол салынбайтынын тағы да еске салды. Айта кетерлігі, қала аумағында осындай 140 саяжай қауымдастығы бар. Атаулары өзге болғанымен оларды толғандырған мәселе ортақ.