Орал қаласында кәсіпкерлердің табысын арттыруға көмектесетін шеберлік сағаты өтті. Кездесуде белгілі кәсіпкер, табысты бизнесвумен Бибигүл Саржанова мен елімізге танымал маркетолог Мәншүк Керей табысты бизнестің қыр-сырын айтып берді. Ал танымал кәсіпкер, “Серік” өндірістік жабдықтау кәсіпорыны” ЖШС бас директоры Серік Мерғалиев тәжірибесімен бөлісті.

Жылдан жылға бизнес жүргізудің механизмі өзгеріп отырады. Сондықтан кәсіпкерлердің соңғы трендтерді үйреніп, жаңа ілім үйренгені абзал. Маркетолог пен бизнес өкілдерінің тәжірибесін тыңдап, білімін жетілдіру үшін 200-ге жуық кәсіпкер шеберлік сағатына қатысты. Үнемі білімін арттырып, кәсіп жасаудың қыр-сырын үйрететін белгілі кәсіпкер Бибігүл Саржанова тәжірибесімен бөлісті. Осыдан 10 жыл бұрын Елордада өз ісін бастаған Бибигүл Сағынғалиқызы қызметкерлерді дамыту мен оқытуға тоқталды. Табысты бизнесті қалыптастыру үшін мықты мамандарды қалыптастыру маңызды,-дейді кәсіпкер.

Табысты арттыруға бағытталған шеберлік сабағы белгілі кәсіпкер Серік Мерғалиевтың бастамасымен ұйымдастырылды. “Серік” өндірістік жабдықтау кәсіпорны” ЖШС құрылтайшысы шеберлік сағатынан өзіне түртіп алар тұстар көп екенін атап өтті.

Тәжірибелі мамандардың ақылы мен сараптамасын тыңдаған кәсіпкерлер әсерімен бөлісті.

Кәсіпкерлердің табысын еселеп арттыруға арналған шеберлік сабағында ұтыстар ойнатылып, жүлдегерлер анықтады. Бизнес субъектілері кәсіпкерлермен кеңесіп, сұрақтарын жолдап, пікір алмасты.

Орал қаласында жаңадан қызметке тағайындалған мемлекеттік қызметкерлер ант қабылдады. Олар ел үшін адал қызмет етіп, заң талаптарын сақтауға салтанатты түрде серт берді.

Республика күні қарсаңында жаңадан мемлекеттік қызметке жұмысқа тұрған жандар салтанатты түрде ант қабылдады. Облыс орталығында ұйымдастырылған іс-шарада Бөкей Орда, Бөрлі мен Жәнібек аудандарында жұмыс істейтін мамандар мемлекеттік қызметшілердің қатарын толықтырды.

Жаңа ережеге сәйкес дипломының жиынтық бағасы жоғары мамандар конкурсқа түспей, қызметке қабылданады. Осындай жеңілдікке ие болған жанның бірі- Альбина Жолбатырова. Жас маман Бөрлі ауданына қарасты Пугачев ауылдық округі әкімі аппаратында бас маман болып қызметке кірісті. Мемлекеттік қызметкер жеңілдіктердің арқасында жастар ауылға тұрақтап қалатын мол мүмкіндікке ие болатынын айтады.

БҚО-да жалпы 3500-нан астам мемлекеттік қызметші жұмыс істейді. Олардың 35 пайызға жуығы жастар. Ауылдық жерде мемлекеттік қызметке кіріскен жандар "Дипломмен ауылға" бағдарламасына қатыса алады. Күні бүгінге дейін осы бағдарламаның шарапатын 40-тан астам мемлекеттік қызметші көріп, қолдауға ие болды.

Орал қаласында көктемгі қатерде баспанасын су басып, жаңа үйге көшкен тұрғындардың қуанышы көпке созылмады. Орақбаев көшесі 1В мекенжайында тұратын 60 отбасы жылусыз отыр. Көпқабатты баспана көгілдір отынға қосылмаған. Сол себепті автономды жылу қазандығы жасамай тұр. Соның салдарынан 60 жанұя салқын үйде дірдектеп жан бағуда.

Қалада жылыту маусымы басталғанымен Орақбаев көшесі 1 мекенжайында тұратын тұрғындар жылуға жарымай отыр. Аталмыш көпқабатты үйдің 60 пәтеріне су тасқынынан зардап шеккен отбасылар қоныстанған. Қыркүйекте ғана жаңа үйдің кілтін алдық деп бөркін аспанға артқан ағайынның қуанышы ұзаққа созылмады.

Тұрғындар салқын үйде жылыту пештерін жағып жан бағып отыр. Балалары ауырып, ересектерден маза кеткен. Әр бөлмеде пеш жаққанмен, үй жылымайды. Сол себепті коммуналдық төлем ақысы артып, қалтаны қағуда.

Тұрғындардың талап-арызын көгілдір отынға жауапты "Қазақ газ аймақ" мекемесін жеткіздік. Мамандар көпқабатты үйдің 80 пайызына тұрғындар қоныстанбайынша газ қосылмайтынын кесіп айтты. Қауіпсіздік талаптары осындай екен.

Мәселенің мән-жайын білмек үшін үй салған компанияға жолықтық. Екі мәрте мердігердің кеңсесіне барып, директорын орынынан таба алмадық. Мекеме директоры деп таныстырған Замир мырзамен телефон арқылы хабарласып, сұқбат алуға өткен бейсенбіде уағдаласқан едік. Алайда, кейін компанияның басшысы телефон тұтқасын мүлдем көтермей, сұрағымызды жауапсыз қалдырды. Жылуға жарымай отырған тұрғындардың талабын Орал қаласы әкімдігіне айттық.

Қала әкімінің орынбасары суық күнде салқын үйде жан бағып отырған жандарға жылу бере бастады деп хабарлады. Осы үй секілді жаңа баспанаға қоныстанған жандарды толғандырған мәселелер шешімін табады деп сенейік!

Орал қаласында балабақша тәрбиеленушілері ас пісіріп жарысты. Байқауға 10-нан астам бүлдіршін қатысты. Сайыстың мақсаты-баланы еңбекке баулу, келешекте мамандық таңдауға қол ұшын созу.

Өркениетті мемлекеттерде балалардың түрлі мамандықты игеріп, қызығушылығын анықтау үшін арнайы жұмыс жолға қойылған. Келешекте әр жастың мамандық таңдауда жаңылмауы үшін Орал қаласында екінші жыл қатарынан "Baby Skills" жарысы ұйымдастырылды.

Бүлдіршіндер сайысқа тыңғылықты дайындалып келген. Әуелі балалар өзін таныстырып, көкөніс пен жемістерді ажыратты. Кейін кәсіби аспаздар секілді пицца дайындады. Олар тағамды дәмді дайындауға тырысты.

Балабақша тәрбиешілері де мұндай сайыстардың бүлдіршіннің дамуы үшін маңызды екенін атап өтті.

Жас аспаздар пиццадан бөлек, жемістен салат жасап, өнерлерін ортаға салды. Сайыстың үздіктері түрлі марапатқа ие болды.

Мемлекет басшысы инвесторлардың құқығын қорғауды тапсырды. Осы бұйрыққа сәйкес құқығы тапталған кәсіпкерлер әділдік іздеп прокурорларға шағымдана бастады. БҚО-ның прокуратурасына 9 инвестор арызданыпты. Бүгінгі таңда 4 мәселе оң шешімін тапқан. Соның бірі-Теректі ауданына қарасты Юбилейный ауылында орналасқан зауыт.

Биыл Теректі ауданында ірі өндіріс ошағы ашылды. Зауыт қуаттылығын арттыру үшін жергілікті әкімдіктен жер сұрапты. Атқарушы билік түрлі сылтау айтып, құжат сұратып, инвестордың өтінішіне құлақ аспаған.

Прокурорлар фронт-кеңсеге арыз жазып, кәсібін дамытуда қиындықтармен бетпе-бет кездескен инвестормен кездесті. Күні бүгінге дейін прокуратураға 9 кәсіпкер түрлі мәселе бойынша шағымданыпты. Инвесторларды субсидия алу, бюрократия менорынсыз тексеріс мәселесі мазалайды.

Бүгінгі таңда прокуратурға шағымданған 4 инвестордың мәселесі оң шешілген. Инвестициялық жобалардың жалпы құны 4 млрд 600 млн теңгені құрайды. Кәсіпкерлер 140-тан астам тұрғынды жұмыспен қамтып отыр.

Орал қаласында рухани келісім мерекесіне орай "Оi like" зияткерлік ойыны өтті. Ой жарысына облыстағы діни бірлестік өкілдері қатысты.

Рухани келісім күні қарсаңында діни бірлестік өкілдері бас қосты. Жыл сайын осы мереке дәстүрлі түрде аталып өтіледі. Бірде спорттық ойындармен жарысса, енді бірде театрландырылған көріністі тамашалады. Биыл діни бірлестік өкілдері зияткерлік ойынында бақ сынады.

Қазақстан көптеген елге үлгі. Түрлі конвенция мен діни бірлестік өкілдері бір шаңырақ астында тату-тәтті ғұмыр кешуде. Елімізде дінді еркін ұстануға, өз этносының мәдениеті мен әдет-ғұрпын дамытуға мүмкіндік бар.

Қазақстанда татулық пен рухани бірлікте 3,5 мыңнан астам діни ұйымды біріктіретін 18 конфессияның өкілдері тұрады. БҚО-да 8 конфессия мен 88 діни бірлестік бар. Оның 55-і ислам, 20-сы христиан діні бағытында жұмыс істейді.

Орал қаласында су тасқынынан зардап шеккен "Венера" саяжайының тұрғындары баспана ала алмай жүр. Қазіргі таңда аталмыш саяжайда тұратын 70 шақты отбасы суға кеткен үйлерін паналауға мәжбүр.

Қазіргі таңда "Венера" саяжайында 70-ке жуық баспана бар. Тұрғындардың үйі көктемгі су тасқыны кезінде зардап шекті. Қызыл судың кеткеніне 2 ай ғана уақыт болыпты. Тұрғынжайлардың іші кеппей, қабырғасын көк басқан. Судың кесірінен үйде жылан-шаян мен өрмекшілер көп.

Тұрғындарды баспана мәселесі мазалайды. Оларға арнайы комиссия жаңа баспана беруден бас тартыпты. Бірінің үйін жөндеуге жатқызса, енді бірінің ауылдық жерде екінші баспанасы атында тұр. Десек те, көршілері жаңа үйге көшіп жатқанда саяжай тұрғындары ешкімді алаламай баспана беруін сұрайды.

Тұрғындардың өтініші мен арыз-талабын қала әкімдігіне жолдадық. Шаһар басшысының орынбасары Азамат Халелов мырза көктемгі су тасқынынан зардап шеккен 10 500-ге жуық тұрғыннан өтініш келіп түскенін хабарлады.

Тасқыннан кейін өтініш жазуға 2 айдай уақыт берілді. Сол уақыт аралығында денсаулығына немесе өзге де жағдайға байланысты арыз бере алмаған жандар тиісті құжатын әкеліп, арыз жазуына болады. Ал ауылдық жерде ескі үйі қалған жандар да тиісті құжатын әкімдікке тапсыруы шарт.

Ал әкімдіктің жанынан құралған комиссия шешімімен келіспеген жандар сотқа шағымдана алады. Тасқынның салдарымен күресу үшін 60 млрд теңгеден астам қаржы жұмсалды. Қала әкімі орынбасарының сөзіне сенсек, қыруар қаржыны жомарт жандар мен қайырымдылық ұйымдары бөлген.

Оралда өз еркімен ормандарда ағаш егіп жүрген жан бар. Ол- Сырымжан Айтжанов. Қала тұрғыны 10 жасар ұлымен бірге Хан тоғайында тал-терек отырғызумен айналысады.

Бұл-Сырымжан Айтжанов. Сырымжан ұлымен Хан тоғайында 60 Амур барқытын отырғызды. Табиғат жанашыры биыл 150 түп тал-терек егуді жоспарлап отыр.

Эко белсенді бала кезінен табиғатқа жаны құмар болып өседі. Ол оқушы кезінен туризм үйірмесіне қатысыпты. Экологиялық тәрбиенің арқасында қоршаған ортаның тазалығын мұқият қарау мәселесі мені қатты алаңдатады,- дейді кейіпкеріміз. Сол себепті "Басқақ" тоғайында сенбілік ұйымдастыруды жоспарлап отыр. Осы тәрбиені бойына сіңіріп өсірген ұлы да тал-терек егуге құлшына ат салысады.

Қала аумағында 28 мыңнан астам орман алқабы бар. Оның аумағында шегіршін, шаған, ақ терек, үйеңкі, көктерек, емен секілді ағаштың түрлері өседі. Сала мамандары осы ормандарды күтіп ұстап, оларды тілсіз жаудан қорғау үшін барын салуда. Десек те, биыл екі өрт оқиғасы тіркеліпті. Соның кесірінен 7,9 гектар жерге залал келген.

Табиғат жанашырлары мен атқарушы билік ормандарды сақтап қалу үшін тал-терек егіп, жанталасып жатса, қасақана ағаштарды отап, оны жағып жүргендер бар. Сала мамандары ормандарда өрт қауіпсіздігін сақтауға шақырады. Заң талаптарын бұзған жандар әкімшілік жауапкершілікке тартылады.

Оралда қала әкімі аппаратының басшысы Алтай Құлқаевқа қызметтік баспана берген комиссия мүшелері жауапкершілікке тартылды. Әдеп кеңесінің мүшелері қала әкімінің орынбасары Жандос Дүйсенғалиев, қаржы бөлімінің басшысы Ербол Шүкірғалиев, тұрғын үй-коммуналдық шаруашылығы бөлімі басшысының орынбасары Алмат Ашиков, қала әкімі аппаратының бірыңғай мемлекеттік-құқықтық жұмыстар қызметі бөлімінің басшысы Әлихан Мыңжасаровқа қызметіне толық сәйкес келмейді деген ескерту түріндегі тәртіптік жаза тағайындау туралы шешім қабылданды.

Әдеп кеңесінде қала прокуратурасының қызметкері баяндама жасады.

Тәртіптік іс қаралған шақта қала әкімі аппаратының басшысы қызметтік пәтерін босатып беріп, мемлекет меншігіне қайтарғаны анықталды. Тұрғын үй заңнамасы бойынша басында баспанасы болған жандар 5 жыл толмай, пәтер кезегіне тұрып, қызметтік пәтер ала алмайды екен. Межелі уақыт өтпей қызметтік баспана беруге шешім қабылдаған комиссия мүшелері оқиғаны баяндап берді.

Қолданыстағы заңнамаға сәйкес қызметтік пәтерде тұрған мемлекеттік қызметші 5 жылдан соң арзан бағаға сол баспанасын сатып алатын мүмкіндікке ие. Әдеп кеңесінің мүшелері баспана мәселесін жіті қарап, біраз ойларын ортаға салды. Нәтижесінде комиссия мүшелеріне қызметіне толық сәйкес келмейді деп ескерту түріндегі тәртіптік жаза тағайындады.
Әдеп кеңесінде жер қатынастары бөлімі басшысының орынбасарына сөгіс жариялады. Ол жеке тұлғадан қарызға ақша алады. Қарызын өзінің немесе жұбайының есепшотына аудартып отырған. Сондай-ақ, жиын барысында дене шынықтыру және спорт басқармасына қатысты сыбайлас жемқорлық тәуекелдеріне сыртқы талдаудың нәтижесі айтылды.

Санаулы күндерден соң жаңа оқу жылы басталады. 2024-2025 оқу жылының сапалы әрі қиындықсыз өтуі үшін тыңғылықты дайындық қажет.

Өскелең ұрпақтың сапалы білім алуы үшін заман талабына сай жабдықталған мектеп керек. Облыста 10 үш аусымда оқитын, 16 апатты деп танылған білім ордасы бар. Осы мәселені жою үшін аймақта "Жайлы мектеп" ұлттық жобасы аясында 2023-2025 жылдары 18 мектептің құрылысы жоспарланды.

Жаңа ғимараттың құрылысынан бөлек, алты мектеп күрделі жөндеуден өтуде. Екі нысанның жөндеуі өткен жылы басталды.
Білім саласында сапаны қамтамасыз ету департаменті оқу процесін бақылап отырады. Мемлекет басшысы оқушылардың әлеуметтік статусына қарамастан ыстық тамақпен қамтуды тапсырған еді.

Жаңа оқу жылының қарсаңында оқушыларды оқулықтармен қамту ісі де бақылауда. Биыл облыстық бюджет есебінен 13 баспадан 661 754 дана кітап сатып алынды. Оқулықтарды тасымалдау үшін қазынадан 33,5 мнл теңге бөлінді. Кітаптарды толықтай өңірге тасымалдау ісі 25 тамызда аяқталады деп күтілуде.

СУРЕТ https://qarmaqshy-tany.kz/ САЙТЫНАН ЖҮКТЕЛДІ.