14-ші сәуірден бастап "Ashyq" мобильді қосымшасы жұмысын бастайтын болады. Бұл туралы облыстық жедел штаб отырысында айтылды. Яғни қызыл аймақтағы кәсіпкерлік секторлары жаңа формат бойынша талаптарды орындап, жұмысын жалғастыра алады."Ashyq" мобильді қосымшасы 14-ші сәуірден бастап жүзеге асады деп жоспарланып отыр. Тұрғындар смартфонына "Ashyq" мобильді қосымшасын жүктеп, үйін, телефон нөмірін, тұрғылықты мекенжайын тіркейді. Кейін СПА орталықтарына, бассейндер мен боулинг алаңдарына кірер кезде оның QR-кодын тереді. Сол кезде аталмыш орталықтағы қызметкердің, не келушілердің індет жұқтырғанын не жұқтырмағанын, тіпті КВИ-мен ауырған адаммен қарым-қатынаста болғанын білуге болады. Мекеме қызметкерлері де өз кезегінде келушінің ЖСН-ін тексеру арқылы індет жұқтырғанын анықтай алады. Қосымшада тұрғындар тапсырған ПЦР талдаманың қорытындысы да сақталмақ. Айта кеткен жөн, бұл жоба бойынша облыстағы 700-ден аса кәсіпкерлік субъектісі жұмысын үздіксіз жалғастыруға мүмкіндік алады. Бүгіннің өзінде 25 компаниядан өтініш түскен.
Қосымша сәтті жүзеге асқан жағдайда індет таралу көрсеткіші "қызыл" аймақтар тізіміне енгеніне қарамастан бұл нысандар жұмысын жалғастыра бермек. Облыс он алтыншы наурыздан бері "қызыл" аймақтар тізімінде. Ал өңір бойынша Орал, Ақжайық, Бөрлі, Бәйтерек, Казталов, Тасқала, Шыңғырлау аудандарында індет өршіп тұр. Облыстың бас дәрігері Арман Қалибековтың айтуынша, қазір тұрғындар арасында вакцина алуға ниет танытқандар қатары артуда. КВИ-ге шалдыққан науқасқа шамамен емдеуге 500-900 мың теңге көлемінде қаржы жұмсалады. Яғни ауру жұқтыру дерегі енді азаймаса, өңірдің экономикасы әлсіруі мүмкін.

Жиында БҚО санитарлық-эпидемиологиялық бақылау департаменті басшысының орынбасары Нұрлыбек Мұстаев пен облыстық денсаулық сақтау басқармасы басшысының міндетін атқарушы Арман Қалибеков «қызыл» аймаққа кірген өңірдегі эпидемиологиялық ахуалға тоқталды. А.Қалибековтің сөзіне қарағанда, осы кезге дейін 13878 адам коронавирус жұқтырса, соның 7938-і немесе 57,1 пайызы Орал қаласының үлесіне тиеді.Қала әкімі Абат Шыныбеков шаһар бойынша 22 мониторингтік топпен наурыз айы басталғалы кафелер мен мейрамханаларда  11 бұзушылық фактісі тіркелгенін атап өтті.  Қазір дәмхана-мейрамханалар сағат 00.00-ге дейін жұмыс жасауда. Мониторингтік топтар бақылау шараларын жалғастыра береді. Десе де, өңірдің «қызыл» аймаққа енгенін ескере отырып,  қоғамдық тамақтандыру нысандарының жұмыс уақытын 22.00-ге дейін қысқартуды ұсынды Абат Шыныбеков. Облыс басшысы Ғ.Есқалиев мектептерде, сондай-ақ автобустарда, қоғамдық тамақтандыру орындарында санитарлық талаптардың сақталуын бақылауды күшейтіп, қажет болған жағдайда карантиндік шараларды қатаңдату керектігін атап көрсетті.Сондай-ақ облыс басшысы Наурыз мейрамына орай мерекелік шараларды онлайн түрде ұйымдастыруды тапсырды. Карантиндік талаптарға байланысты нақты шешім бейсенбі, 18 наурыз күні шығарылмақ. Егер эпидемиологиялық ахуалдың қолайсыздығы жалғаса берсе, шектеу шаралары қатаңдатылады

Желтоқсан айының 1-інен бастап облыста коронавирус індетін жұқтыруға қатысты 997 дерек анықталды. Оның 33% жағдайы бойынша адамдардың жақын қарым-қатынасы салдарынан ауру тараған. Яғни бір үйдегі отбасы мүшелерінің бір-біріне залалы тиюде. Облыстық əкімдік ғимаратында өткен жедел штаб отырысында санитарлық-эпидемиологиялық бақылау департаментінің басшысы Мұхамғали Арыспаев қазан айынан бері эпидемиологиялық ахуал қайта күрделеніп келе жатқанын хабарлады. Вахталық əдіспен жұмыс істейтіндер арасында қауіпті дерт жиі анықталады.Желтоқсан айында скрининг нəтижесінде Қарашығанақ кен орны жұмысшылары арасынан 80-нен астам дерек тіркелген. Олардың 70%-ында ауру белгісі жоқ. «Жайықмұнай» ЖШС қызметкерлерінен де коронавирус инфекциясы анықталуда. «Екі кешен бойынша компаниялар басшыларына сақтық шараларын күшейту керектігі ескертілген. Облыстың барлық аудандарында ауру жұқтыру дерегі тіркелген. Жедел штаб отырысында Орал қаласы əкімінің орынбасары Мирас Мүлкәй желтоқсан айында мониторинг қорытындысы бойынша шектеу шараларын бұзуға қатысты 57 талап бұзушылық анықталғанын айтты. Осы орайда облыс әкімі Ғали Есқалиев жасырын мерекелік жиындарға, көпшілік шараларға мемлекеттік қызметкерлердің бармауын қадағалау қажеттігін басқарма басшыларына ескертті. «Егер мемлекеттік құрылымдар мен бюджеттік мекемелер қызметкерлерінің көп адам жиналып, көңіл көтеретін жерде жүргені анықталса, бұл деректі бірден тіркеуге алып, жұмыстан босату керек. Өйткені күніне 40-45 адамның коронавирус инфекциясын жұқтырғаны анықталуда.Штаб отырысында облыстық полиция департаменті басшысының бірінші орынбасары, полиция полковнигі Жанболат Жаншин мас күйінде көлік жүргізу тыйылмай тұрғанын хабарлады. Облыстық ақпараттандыру, мемлекеттік көрсетілетін қызметтер жəне архивтер басқармасы басшысының міндетін уақытша атқарушы Петр Лежников stopcovid.kz порталын жетілдіру жұмысы мен коронавирус инфекциясы бойынша жағдайды бақылау үшін цифрлы əкімшілендірудің бірыңғай ахуал орталығы қызметі туралы баяндады.