"Атамекен" өнер ордасында көрісу күніне арналған мерекелік концерт ұйымдастырылды. Концерт басталмас бұрын облыс әкімі Ғали Есқалиев ақсақалдармен көрісті. Көрісу мейрамы -еліміздің батысында сақталған, ежелгі дәстүр. Бұрындары алты ай қыстан аман шыққан ағайын көптен көрмеген туыстарына арнайы барып қос қолдап амандасып, "Бір жасыңмен" деп есендескен. Көне дәстүр бүгінде еліміздің батысында жақсы сақталған.

Атадан балаға мирас болып қалған игі дәстүр бүгінде өз жалғасын тапты. Таң сәріден бастап жасы кішілер ақсақалдар мен ақжаулықты аналарға сәлем беріп, есендік сұрасып, "Бір жасыңмен" деген ақжарма тілектерін айтуда. Көненің көзіндей бұл дәстүр еліміздің батысында сақталған. Аталмыш мерекені Маңғыстаулық ағайын "Амал" мерекесі деп те атайды. Ақжайық өлкесінде мейрам "Көрісу күні" деген атаумен кеңінен тойланады.

Көрісу күнінің мән-мағынасы зор. Қыстан аман шыққан ағайын, тума-туыстарын іздеп, игі-жақсылардың амандығын біліп, есендік сұрайды. Бұл күні тігілген қазанда ас қайнап, көже қайнатылып, мәре-сәре болады. Ежелден келе жатқан дәстүр бүгінде өзгермей, қаз-қалпында сақталды деуге болады. Облыс басшысы өңірдің ақсақалдарымен көрісіп, амандық сұрасты.

Ақсақалдар кеңесінде сөз алған белгілі тарихшы Жайсаң Ақбай мерекенің маңыздылығына тоқталды.

Ақсақалдармен кездесу мерекелік концертке ұласты. Ақжайықтың өнерпаздары игі дәстүрді насихаттап, көрермен назарына театрландырылған қойылым ұсынды.

Театрландырылған қойылым барысында әншілер ән шырқап, бишілер мың бұрала биледі. Өнерпаздардың тартуы Ақжайық жұртшылығының көңілінен шыққандай. Ерекше форматта өткен концертті тамашалаушылардың көптігі соншалық, залда ине шаншар орын болмады.

Облыс тұрғындары наурыз мерекесін көрісу күнінен бастады. Енді сәуір айына дейін батысқазақстандықтар наурыз мерекесін тойламақ.

Жастар мәдениет үйінде "Тамыры берік салт-дәстүр" атты фестиваль өтті. Өнер иелері атадан балаға мирас болып, аға буыннан жас буынға жалғасып, ұрпақ сабақтастығын қалыптастырған салт-дәстүрлерден көрініс қойып, әннен шашу шашты.

Оралдық өнер иелері Ұлыстың ұлы күні-Наурыз мерекесіне орай арнайы фестиваль ұйымдастырды. Аталмыш шара «Тамыры берік салт-дәстүр» деген атаумен өтті. Өнер жұлдыздары көненің көзі болып, атадан балаға мирас болып қалған ата дәстүрді сахналады.

Жиында сөз алған жастар мәдениет үйінің директоры халықты Әз-наурыз мерекесімен құттықтап, ақ жарма тілегін арнады.

Шара барысында өнер иелері дүнеиеге келген сәбиді бесікке салу, қырқынан шығару, ат қою мен тұсау кесу рәсімдерінен көріністер көрсетті.

Салт-дәстүрден бөлек өнер жұлдыздары әннен шашу шашып, мың бұрала билеп, қазақтың ұлттық тағамдары қойылған дастарханнан дәм татқызды.

Облыс әкімдігі жанына алтыбақан құрылып, Хадиша Бөкеева атындағы қазақ драма театры әртістерінің қатысуымен театрланған көрініс ұйымдастырылды. Ұйымдастырушылар бағдарламаны тамашалай келген қала тұрғындарымен қол алысып көрісіп, бауырсақтан дәм татқызды.

Абай алаңы маңында Хадиша Бөкеева атындағы қазақ драма театры әртістерінің қатысуымен өткен театрландырылған қойылым қала тұрғындарына ерекше әсер сыйлады. Тұрғындардың бір-біріне білдірген ыстық ықыласы күннің райын да жылытып жібергендей. Көктемгі жайма шуақ орнап, жиналғандар бауырсақтан дәм татып, алтыбақан тепті.

Көрісу айт мерекесін бүгінде жастар қауымы кеңінен атап өтетін болған. Жастардың салт-дәстүрге бет бұруы оң серпін дейді ұйымдастырушылар.

Көрісу тек біздің БҚО-да ғана сақталып қалған ежелгі дәстүр. Қыстан шыққан халықтың аман-саулық сұрасып, төс қағыстырып амандасу дәстүрі-адамдар арасындағы қарым-қатынасты нығайтып, кешірімді, қайырымды, бауырмал болуға үнедейді.