Негізгі қарызды төлеген салық төлеушілерден жалпы сомасы - 129 миллион теңге айыппұл есептен шығарылды. Мемлекеттік кірістер департаментінің мәліметінше, 4 қыркүйектегі жағдай бойынша қала кәсіпкерлерінің саны 926-ға жеткен. Олардың мемлекет алдындағы қарызы 318 миллионнан астам теңгені құраған. Сала мамандары ірі салық төлеушілер мен акцизделетін тауарларды өндірушілер және жеке тұлғалар салықтық амнистияға ұшырамайтынын еске салады. Еске салсақ, 2018 жылдың 1 қазанына дейін жинақталған қарыздың келесі жылдың аяғына дейін төлеу керек. Сонда кәсіпкерлер барлық айыппұлдар мен өсімақылардан босатылады.

Кез-келген сауда орнында сатушыдан түбіртекті талап етуге әр тұтынушының құқығы бар. Ол азаматтарға өз мүдделерін қорғауда да қажет болмақ. Мәселен, тауар немесе өнімді сатып алып, ол сапасыз болып шықса, қолында түбіртегі жоқ тұтынушының өз құқығын қорғауда дәйегі болмайды. Халықтың құқықтық мәдениетін қалыптастырудың мемлекеттік кірістер департаменті жұмысына да пайдасы зор.

Бас жүлдеге тігілген темір тұлпар ұтысы келе жылы ойнатылады. Акцияға қатысу үшін Wipon мобильді бағдарламасын өзіңіздің ұялы телефоныңызға жүктеп, сатушыдан алған фискальді түбіртектің суретін жіберуі керек.

Ел экономикасының дамуында көлеңкелі бизнеске жол бермеуге атсалысып, сондай-ақ бағалы ұтыс ойнына қатысамын десеңіз "Түбіртекті талап ет!" акциясынан қапы қалмаңыз!