Мазаны алған маса маусымда азаяды. Мамандар осылай деп сендіріп отыр. Қазіргі уақытта қалада масаға қарсы профилактикалық дезинсекциялау жұмыстарының екінші кезеңі басталды. Улау жұмыстарын «Магтоксин» ЖШС атқаруда. Жұмыстар қыркүйекке дейін жалғаспақ. Мамандардың айтуынша, дезинсекциялық шаралар арқылы маусым айының ортасына қарай маса азайып, тұрғындарға қолайлы жағдай тумақ. Бүгінде масаның тым көбеюі қалалықтардың мазазын кетірді. Әсіресе, Зашаған, Коминтерн, Құс фабрикасы, қалалық мәдениет және демалыс саябағы аудандары бойынша шағым көп. Биыл Орал қаласы мен қалаға жақын орналасқан ауылдарды дезинсекциялауға бюджеттен 93 306,0 мың теңге бөлінген. Мемлекеттік сатып алу қорытындысына сәйкес, улау жұмысын бұл салада тәжірибелі «Магтоксин» ЖШС атқаруда. Серіктестік сәуір айының ортасынан бастап шыбын-шіркейлердің дәрнәсілдерін өңдеуді жүргізген болатын. Яғни бүгіні күнге дейін дернәсілдер тіршілік ететін өзен ағыстары, тоғандар, су шалғындары, су қоймаларының барлық түрлерінде қолданылатын «бактицид» биологиялық препаратымен өңделді. Дәрнәсіл сатысы аяқталып, енді мамандар қанатты шіркей сатысын өңдеуді бастады.Улау жұмысына арнайы 8 техника пайдаланылуда. Серіктестік қарауында 18 дезинфектор жұмыс істейді. Қансорғыштарды улау Орал қаласының аумағында, Серебряков, Круглоозерное, Коминтерн, Желаев, Асан, Мичурин, Новенький, Трекин Володарка, Достық ауылы аумақтары мен орман белдеулерінде және де қалалық мәдениет және демалыс саябағы аумағы мен Хан тоғайы, Перевалочная тоғайы, Анискино көлі бойынша жүргізіледі. Қолданылатын химиялық қоспа жасыл желектерге кері әсерін бермейді. Бірақ өңдеу учаскелерінде адамдардың ұзақ тұрмағаны абзал. Тұрғындарға дизенцекция жасалған аумаққа төрт сағатқа бармауға кеңес беріледі.