Ақжайық өлкесіне қазақтың Қыз Жібегі атанған актриса Меруерт Өтекешова табан тіреді. Кино және театр майталманы Орал қаласында дүниеге келген. Өнер иесімен кездесуге келген бұқараның қарасы қалың.

Көрерменнің көзайымына айналып, өнерімен көпті тәнті етіп, қазақтың "Қыз Жібегі" атанған Меруерт Өтекешова туған қаласына табан тіреді. Кино және театр актрисасын елі құшақ жая қарсы алды. Хадиша Бөкеева атындағы қазақ драмма театрында арнайы кездесу өтті. Кеште келместің кемесіне мініп, бақиға атанған кино және театр актері, Меруерт Өтекешованың жары Құман Тастанбеков жайлы деректі фильм көрсетілді.

1970 жылы экранға шыққан "Қыз Жібек" фильмінде Құман Тастанбеков пен Меруерт Өтекешова басты рөлді сомдайды. Фильмнің сценарийін атақты Ғабит Мүсірепов, музыкасын Нұрғиса Тілендиев жазды. Сұлтанахмет Қожықов көркем туындының режиссері. Тарихтан белгілі болғандай режиссер Төлегеннің рөліне Құман Нұрмағанұлын бекітіпті. Ал Қыз Жібекті сомдайтын актрисаны ұзақ іздейді. Тіпті 400-ге жуық қыз бала Жібекті сомдауға үміткер болып, кастингке қатысқан деседі. 1968 жылы осы рөлді ойнауға мектепті жаңа бітірген Меруерт Қаратайқызы көп сұлудың ішінен таңдалып алынады.

"Қыз Жібек" қазақ кино өнерінің төлқұжаты іспеттес. Нағыз қазақ фильмінің классикасына айналды. Өнер туындысын бірнеше ұрпақ көріп өсті.

Меруерт Өтекешова туған елінде жарты ғасыр экраннан түспей келе жатқан "Қыз жібек" кинотуындысы жайлы деректі фильмнің түсірілгенін хабарлады.

Ақжайықтың Жібегімен өткен кездесуге өнерді бағалайтын жандар келді. Ақ жаулықты ананы сөзге тартып көрдік.

Қыз Жібек фильмінде басты рөлді сомдаған Құман Тастанбеков пен Меруерт Өтекешованың өмірі мен өнер жолы көпке үлгі! Талантты актерлар ұл-қыз өсіріп, қазақ театры мен киносы үшін тер төгіп, жас таланттарды шыңдауға атсалысты. Енді Меруерт Қаратайқызы 52 жыл көгілдір экранның сәнін келтірген кино туынды туралы кітап жазбақ.

Сурет https://tengrinews.kz/ сайтынан жүктелді