Оралда құдық атаулының бетіне тор қойылып жатыр.  Яғни тор - қақпақ ұрланған күннің өзінде құдыққа адамның, жан-жануардың түсіп кетуінен сақтайды. Қазір «Батыс су арнасы» ЖШС –нің  авариялық қызмет көрсету бригадасы  50-ге жуық  құдыққа осындай тор орнатқан.  Жылына  бір-екі рет тор алынып, құдық тазартылып отырады дейді сала мамандары. Темір торды шеңберге шегелеу қарапайым ғана жұмыс. Шойын қақпақтың астына бекітілген шеңберді қажет кезінде ашып жабуға да оңай дейді орнатушылар. Арнайы тапсырыспен дайындалатын заманауи торлар немесе жаңа технологияны қолдану қымбат, ол үшін барлық кәріз жүйесін жаңарту қажет. Сондықтан осындай арзан және қауіпсіз әдісті қолдануды қабылдаған. Бүгінде «Батыс су арнасы» ЖШС-нің құзыретіне кіретін 10 мыңнан аса құдық бар. Қалада қақпақты құдықтардың саны 30  мың болса, олардың  25 мыңнан астамы коммуналдық мекемелер меншігі саналады. Олардың бәрін түгендеп, тұрғындардың құдыққа құламауын қамтамасыз ету қиын. Тек былтырдан бері  «Батыс су арнасын» тиесілі  жүзден аса шойын қақпақ қолды болған. Темір тор кемі 200 келі салмақты көтереді. Олар үлкен және орталық тас жолдарға қойылмайды. Талай адамның тағдыры қыршынынан қиылып, қапыда қайғы әкелген жайттар аз емес. Ал, көлік дөңгелегінің кептеліп қалуы мен сынуын санап жатқан жан жоқ. Бұндай оқиғалар қоғамдық резонанс тудырған соң ғана қақпаққа қарайтындар құдықты қауіпсіз етудің әдісін тапқан.