Жоғары аудиторлық палата «Қазақстан Темір Жолы» ҰК қарызға белшеден батып отыр деп мәлімдегенді. Еске сала кетейік, бас аудитор Әлихан Смайылов ҚТЖ соңғы төрт жылда теміржол саласын дамытуға шамамен 2 трлн теңге, соның ішінде бюджет қаражаты есебінен 332 млрд теңге жұмсаған.Алайда, қыруар қаржыны компания дұрыс игермеген. Теміржол желілері, локомотивтер, вагондар әбден тозған, - деген еді. Смайыловтың айтуынша, бүгінде Қазақстан теміржолының халі мүшкіл. Кезінде өзін-өзі қамтамасыз еткен компания тиімсіз және консервативті басқару, мемлекет иелігінен дұрыс ойластырылмай шығару салдарынан бүгінде әрең күн көруде. Барлық табысы жоғары қызметтер меншік компаниялардың қолына берілген. ҚТЖ-ның айналасындағы делдалдар пайдаға кенеліп отыр. Яғни ұлттық компания дефолтқа ұшыраудың алдында деді. Оның қарызы 2024 жылдың басында 3 трлн теңгеге жуықтады. Бірақ көлік министрі ҚТЖ-ң өз қарызын өзі жабуға шамасы жетеді деп отыр.

Министрдің айтуынша, қазір жолаушылар паркін салу мен жаңартуға және локомотив паркін жаңартуға бағытталған барлық ірі жобаларды ҚТЖ өз қаражаты есебінен жүзеге асырылуда. Белгілі бір жағдайларда мемлекет олардың шығындарының бір бөлігін субсидиялайды. Ал депутаттардың дерегінше, соңғы он жылда мемлекет Қазақстан теміржолына 1 трлн. теңгеге жуық қаржы құйды. Сөйте тұра, компанияның қарызы 3 триллионға жуықтаған. Депутаттар прокуратурадан ұлттық компанияға қаржылық талдау жасауды және алынған қарыздардың мақсатты жұмсалуын тексеруді сұраған болатын. Әзірге оның нәтижесін көріп отырған жоқпыз.