Шаһар басшысы Мұрат Мұқаев көктемгі қар суынан келер залалдың алдын алу үшін "Жайық таза қала" қалай жұмыс жасап жатқандарын тексеріп, бірнеше мекен-жайды аралады. Оның ішінде жеке тұрғын үй секторлары маңында аула сыртына үйілген қарды тиеп, жолға жиналған шалшық суды сорғызу жұмыстарын көріп қайтты.

Орал қаласы аумағынан бүгінгі күні 270 мың текше метр қар шығарылып, 15 мың текше метр еріген қар суы сорғызылған. Күні-түні 60 техника жұмыс жасап, Сарытау, Жұлдыз, Деркөлдің ПДП-1 және ПДП-2 сияқты қауіпті аудандарына ерекше көңіл бөлуде. Түнгі мезгілде де күшейтілген режимде жұмыс жасайтын коммуналдықтар тұрғын үй секторларында аула сыртына үйілген қарды тиеп, жағалауға тасумен айналысуда.

Мұрат Мұқаев,
Орал қаласының әкімі
"Жайық таза қала" ЖШС-нің 350 жұмысшысы қар күреп, су сорғызу жұмысын жасап жатыр. Бұдан бөлек, сарбаздар мен студенттер, еріктілерден құралған 350 адам қосылды. Қазіргі күні жалпы саны 1000-ға жуық адам күші тартылған.

Қолда бар 30 су сорғыш техника барлық жолдар мен ойпаттарға жиналған шалшық суды сорғызуға жұмылдырылыпты. Ал арық жүйелерінің бүгінде 95 пайызы аршылыпты.

Асылбек Сакказов,
"Жайық таза қала" ЖШС директоры
Қаладағы арық жүйелері аршылып, тазаланды. Бұл еріген қар суының жолдар мен тұрғын үй маңына жиналмауы үшін маңызды. Сарытау, Жұлдыз, Құс фабрникасы аудандарында жағдай тұрақты.

Наурыз айында қаламызға 3 айлық нормадағы қар түсті. Мұндай жағдайда күн күрт жылынса еріген қар суынан келер қауіп арта түседі. Сол себепті қауіп-қатер жөнінде қаладағы 75 саяжай бірлестігіне ескертілген.

Орал қаласындағы "Жайық жылу қуат" АҚ мен "Батыс су арнасы" ЖШС-терінің жеке кассалары жабылып жатыр. Оның орнына пайда болған "Қазпошта" АҚ-ның кассасынан тұтынушылар бір түбіртек арқылы комиссиясыз төлем жасайтын болады. Енді оралдықтар 2 сәуірден бастап кейбір коммуналдық төлемдерді бір түбіртек арқылы төлейді.

Бір түбіртек арқылы коммуналдық төлемдерді төлеу жүйесі қанат қақты жоба аясында енгізіліп отыр. Әзірге оған "Жайық жылу қуат" АҚ мен "Батыс су арнасы" ЖШС ғана көшкен. Жоба цифрлық Қазақстан бағдарламасы бойынша жүзеге асырылуда. Бір түбіртек жүйесіне алдағы уақытта өзге коммуналдық кәсіпорындар да қосылатын болады дейді мамандар.

Ал кассадан тұтынған қызмет ақысын төлеп үйренген зейнеткерлер үшін бұл жүйе түсініксіз көрінді. Дегенмен әр жаңашылдықты қабылдау үшін уақыт қажет болары анық.

Ақылды қала қағидаты аясында қаладағы ірілі-ұсақты кассалардың барлығы жабылып, тек екеуі ғана қалмақ. Бұл дегеніміз жүздеген маман жұмыссыздар қатарын толықтырады деген сөз. Әрине, оларды жаңа қызметке орналастыру назардан тыс қалмайтын болады. Қазпоштада бұдан өзге ПИК өкілдерін де электронды форматта ғаламтор арқылы жұмыс жасап, басқаруға үйретуде.