Бірнеше аптадан бері облыс орталығының тұрғындарына су беру арнайы кесте бойынша жүзеге асқаны аян. Бұл жүйе енді жеке секторларға да қолданылатын болады. Атап айтқанда қаланың Солтүстік-Шығыс ауданы (ескі аэропорт), қаланың ергесіндегі саяжай алқабтары, Зачаганск, Мичурин, Асан ауылдарындағы аз қабатты жеке тұрғын үйлерге су беру шектеліп, кесте бойынша берілетін болады.
Мұндай шектеу шараларына коммуналдық мекеме амалдың жоқтығынан барып отыр. Өйткені қала іргесіндегі елдімекендер атап айтсақ саяжайлар мен Зачаганск кентінің тұрғындары ауыз суды шамадан тыс көп тұтынып, нәтижесінде су тазалау стансасына түскен салмақ екі есеге артқан. Яғни бау-бақша дақылдарын суаруға орталық коммуналдық жүйе қызметін пайдаланудың салдарын көп қабатты үй тұрғындары көріп, 4 және 5-ші қабатқа ауыз су жетпей отыр. Сол себепті енді «Жайықжылуқуат» АҚ-ның бір жылыту қазандағының жұмысын шектеу қойылып, ыссы су температурасы төмендетілмек. Сондай-ақ қазандықты салқындатудан шыққан 200 куб су қосымша «Батыссуарнасына» бағытталып, 1600 м3 су сағатына тазарту қондырғыларына жіберілетін болады. Оған қоса жеке секторлардағы тұрғын үйлерге су беру шектеліп, кесте бойынша берілетін болады. Ауыз су беруді кестеге сәйкес жүргізудің басты себебі жазғы мезгілде ауыз су тұтыну мөлшері өсуіне және қалалық кәріздік желідегі қайта құру жұмыстарына байланысты болып отыр. «Батыссуарнасы» мекемесімен қалаға мамыр айында орташа тәуліктік су беру көлемі 49 500 м3 болса, қазіргі уақытта 55 000 м3 жетіп отыр. Коммуналдық мекеме директоры Қайырғали Имашевтың айтуынша мұның негізгі себебі суды ысырапсыз пайдалнудың салдары. – Оған қоса апатты жағдайдағы Шолохов көшесіндегі айналмалы кәріздік коллекторды ауыстыруға байланысты қаланың солтүстік шығыс аумағы, жаңа шағын аудандар, орталық аумақтағы барлық кәріздік ағындардың 70 проценті Неусыпов көшесіндегі шайынды су коллекторы арқылы өткізілуде. Сәйкесінше осыншама жүктемеге бұл желі шыдамай апатты жағдайға келіп отыр. Сондықтан осындай шектеу шараларын алуға тура келді. Оған қоса су тазалу стансасы жаңғыртуды талап етеді. Бүгінде қосымша су көздерін тарту жұмыстары жүргізілуде. Зачаган халқы үшін жаңа су тазалу стансасын салу жоспары бар. Жобалық құжаттары дайындалу үстінде. Болашақта бұл мәселе тағы да қайталануы мүмкін. Сол себепті қосымша 22 су көзін ашу жоспары бар,– деді «Батыссуарнасы» ЖШС директоры Қ. Имашев. Суды шектеу арқылы берудің негізгі себебі шаһарды тіршілік нәрімен қамтып отырған "Жайық" өзенінің суының азаюы және әрі жерасты ұңғымаларындағы су деңгейі төмендеуі. Сонымен қатар тұрғындардың суды ысырапсыз пайдалануынан. Бұл мәселе коллекторларды жөндеу жұмыстары мен бау- бақша науқаны аяқталар сәтте ғана шешілуі мүмкін.

"Шолохов" көшесінің бойындағы кәріз коллекторында орын алған апатқа және ағынды сулар көлемінің ұлғаюына байланысты 70 мың оралдық ауыз сусыз отыр. Алайда әлеуметтік-мәдени мақсаттағы нысандарды- ауруханалар, мектептер, бала-бақшалар және өзге де мекемелерді сумен қамту тоқтатылмайды. Алайда қалыпқа келтіру жұмыстары 1 айға созылуы бек мүмкін. Апат орнында «Батыс су арнасы» ЖШС қызметкерлерінен бөлек, қосымша кәсіпорындардан 40-қа жуық техника тартылған.  Болжам бойынша сапасы нашар металл пластик құбыр жарылып отыр. Аталмыш олқылықты жоюға барлық күш тартылуда. Оралдағы Шолохов көшесі бойындағы ығн суға арналған кәріз коллекторындағы апат осыдан екі күн бұрын орын алған еді. Кәріз желісі істен шығуы себепті жоғары қысымға шыдас бермеген ағынды сулар енді құдықтардан шығып коммуналдықтарды әбден әбігерге салуда. Коллектордың апаттық учаскесін жөндеуге бюджеттен 1 млрд 200 млн теңге бөлінген. Жұмыстар екі кезеңде жүзеге аспақшы. Биылғы жылы 800 млн теңгені игеру жоспарланған.Кешелі-бүгін қала билігі ауыз суды халыққа көлікпен тасымалдап жеткізіп жатыр. Шаһардың бірнеше аумағынан орын белгіленген.

Оралдық "Батыс су арнасы" мекемесі құбыр өндіруші компанияның жұмысын сынға алды. Нақтырақ айтсақ, құбырлардың сапасыздығы салдарынан бірнеше мәрте апат  болып қала сусыз қалды дейді мекеме мамандары. Ал, құбырды өндіруші, «Amitech Astana» компаниясы бұл ақпаратты теріске шығарып отыр. Мәселен, Шолхов көшесі бойындағы кәріз коллекторынның құрылысына 3 компаниядан құбыр тасымалданған. Қазіргі уақытта сол үш компанияның біреуі ғана жұмыс жасайды. Ол -  Нұр-сұлтан қаласында орналасқан «Amitech Astana» компаниясы. Құбырдың сапасына күдік келтіріп отырған "Батыс су арнасы" қазір құбыр өндіруші мекемелермен келісіөзер жүргізуде. Бірақ «Amitech Astana» компаниясы өздері жасаған құбырдың сапасы жоғары екендіктерін айтып сендіреді. Тіпті апат болған күні-ақ, құбырдың сапасына сарпатама жасату туралы ұсыныс та жасадық, бірақ ешкім келіскен жоқ деген базыналарын айтады. Қала берді "Amitech Астана" басшылығы апат тек құбырда ғана емес, құбырларды жобалау, монтаждау немесе пайдалану кезінде қателер болуы мүмкін деп санайды. Ал, "Батыс су арнасының" мамандары Деркөл аумағында орын алған апаттағы құбыр Ақтөбеде жасалғанын айтады. Тәуелсіз сараптама құбырдағы апат құбырдың сапасыздығынан екендігін дәлелдеп берген. Ал, бір қызығы кезінде осы құбырларды өндірген компаниялар қазір нарықта жоқ. Ал, жауапты тұлғаларды анықтау, жауапқа тарту мәселесін кім жүргізеді, қай мекеме айналысады, әзірге жабық күйінде қалып отыр.

Бүгін Орал қаласында коллекторды қалпына келтіру жұмыстары аяқталып кәріз желісіндегі ақау толықтай жойылды. Тұрғындарға біртіндеп ауыз су беріле бастады. Осыған дейін 60 мыңнан аса тұрғын ауыз сусыз отырғанын хабарлаған болатынбыз. Деркөл ауылындағы №19 кәріз сорғы стансасындағы кәріз құбыры 29 мамыр күні түсқайта жарылған болатын.Ауыз судың тоқтатылуы тұрғындарға оңай тиген жоқ. Оларға су жеткізіп беру жұмыстары жүйелі түрде ұйымдастырылды. «Батыс су арнасы» ЖШС-ның күшімен түнгі жұмыс нәтижесінде аталған учаскеден 5500 текше метр су сорылды. Бүгін таңнан бастап  демонтаждау жұмыстары жүргізіліп, құбыр ауыстырылды. Жауапты сала мамандары олқылықты ең ұзағы 3 күнде жоямыз деп уәде берген болатын. Жүйелі түрде жүргізілген жұмыстар нәтижесінде су 3 тәулікке жетпей таратыла бастады.

Орал қаласының 60 мыңнан аса тұрғыны «бір қасық суға» зәру. Себебі қаладағы шайынды су ағатын кәріз құбыры жарылған. Ал істен шыққан коллектор 2009 жылы салынған көрінеді. Осы орайда бүгін Орал қаласының әкімінің орынбасары Сергей Доля БАҚ өкілдеріне ақпарат берді. Дегенмен, мәселенің қашан және қай кезде шешілері әлі де беймәлім. Кеше кештен бері дүңгіршектерден суды литрлеп сатып алып жатқан  тұрғындардың қарасы қалың. Тіпті су сатып алуға келгендердің саны жоқ десе де болады. Солардың бірі қалмыздағы 6-шағын ауданның тұрғыны  Шамұрат Нәженов кешеден бері бір ұрттам суға зар болғанын айтады.– Су жоқ. Мына баклашканы көріп тұрсыз ғой. Осымен  сатып алып жатырмыз. Тіпті тамақ пісіретін су болмай қалды. Коллектор істен шыққан дейді. Қазір тағы да  кезекте тұрмыз. Су тоқтайтыны туралы ақпаратты ерте айту қажет еді. Мәселен, мен әлеуемттік желіге тіркелмегенмін. Сол себепті ақпарат маған өте кеш жетті. Сатып алған су қашанға жетеді, – дейді зейнеткер.Кешеден бері көрген қиындығын тұрғындар айтып тауыса алар емес. Үйге келіп тұрған қара судың қадірін олар енді түсінгендей. Мамандардың сөзінше, кеше кеште Деркөл кентінде №19 А кәріз сорғы стансасы маңындағы құбырдың тесілуіне байланысты ірі апат орын алған.  Нәтижесінде 120 мыңға тарта оралдық сусыз қалды. «Батыссуарнасы» ЖШС мамандары жер астында 7,5 метр тереңде жатқан құбырдың диаметрі шамамен 800 мм көлемінде тесілгенін айтады. Қазір апат болған жерде серіктестіктің 70 адамы мен 39 техникасы құбыр сыртына жайылған лас суды тазалауға бар күшті салуда. Қала әкімдігінің өкілдері апаттың салдары кем дегенде үш күнде қалпына келтіріледі дейді.–  Кеше қаланың солтүстік-шығыс аумағы, Зачаганск кенті мен қала орталығының бірқатар аудандарындағы тұрғын үйлерде ыстық және суық су уақытша тоқтатылды. Түнде Зачаганскіде қайта су берілді. Қазір шамамен 60 мыңдай тұрғын сусыз отыр. Арнайы құрылған комиссия бүгінде апаттың неден болғанын анықтауда. Бірнеше су тоқтаған нысандар мен тұрғын үйлерге су тасымалы ұйымдастырылуда. Бір де бір мектепке дейінгі білім беру ошақтарының жұмысы тоқтаған жоқ. Коллектордың ұзындығы 7,5 шақырымды құрайды. Құбырды ауыстыруға байланысты жобалық-сметалық құжат дайын.  Көп ұзамай  конкурс арқылы мердігерді анықтаймыз. Құбыр кезең-кезеңімен жаңғыртылатын болады, – деді Орал қаласы әкімінің орынбасары Сергей Доля.Осыдан 10 жыл бұрын мамандар осыған дейін пайдаланылып келген темір құбырдан бас тартып, әйнекпластик материалдан жасалған құбырды орнатқан болатын. Содан бері осы құбыр бірнеше мәрте істен шығып, зардабын қарапайым халық көруде. Өйткені салынған кезде бұл маңда қозғалыс аз, ғимараттар да сирек болған. Қазір «Батыс су арнасы» мекемесінің қызметкерлері апатты жою үшін тәулік бойы жұмыстануда. Қаланың су жоқ аудандарына су жеткізу шаралары ұйымдастырылып, аталған жерлерде қазіргі уақытта су таратылып жатыр. Естеріңізге сала кетейік, су жеткізу шаралары кешкі 23.00-ге дейін созылады. Бүгін төмендегі мекенжайларда тұрғындарға су жеткізілуде:

1. Д. Қонаев шағын ауданы («Жеңіс» базарына қарама-қарсы»)
2. 4 шағын аудан («Манасян» кафесінің жанында»)
3. 5 шағын аудан (№5 үйдің жанында)
4. 9 шағын аудан («Сәтті» дүкенінің жанында)
5. 7 шағын аудан (№2 көшеде)
6. «Строитель» шағын ауданы (Циолковский көшесіндегі № 10 үйдің жанында.)
7. «Солтүстік-Шығыс» шағын ауданы («Олимп» маңы)
8. «Айгүл» шағын ауданы (Ватутин-Чуйков көшесінің қиылысында, № 16 ЖОМ жанында)
9. Ларин көшесі №1 «дәріхана» маңы
10. «Ет комбинаты» ауданы (№2 маршруттың соңғы аялдамасы).

Дегенмен сала мамандары жағдай әбден тұрақталғанша тұрғындарға суды көбірек жинап алуға кеңес береді. Өйткені, уақытша коллектор іске қосылғанға дейін су әлі тоқтатылуы мүмкін.