Сырым Датов пен Гагарин көшесі қиылысындағы тұрғын үй иелері жаңа жол айрықтың қолайсыз тұстарын жіпке тізіп отыр. Жобаны жүзеге асыру үшін бұл аумақта біраз өзгеріс жасауға тура келіпті. Оны құп көрмеген тұрғындар наразылық білдіруде. Гагарин 67 мекен-жайының тұрғыны Виктор Навозенко жаңа жол айрықтың пайда болуы жолдағы қауіпті арттырады деп санайды.

Бұл нысанда "Бірлік" ЖШС жұмыс жасап жатыр. Мердігер кәсіпорын мойнына 3 бірдей бағдаршамның рұқсат беру түсін күтпей бұрылуына арналған жолақ салу жүктеліпті. Осы маңда құрылыс алаңының қоршалмауынан бір адам шұңқырға құлап кеткен жағдай да болыпты. Тек содан соң бір шара қолдана бастаған.

Ал жолаушы көлігі және авто көлік жолдары бөлімі жоба құзырлы орган мамандарымен жан-жақты зерттеліп, қаралып барып, қолдауға ие болғанын мәлімдеді. Көлік ағыны артқан қала жолында кептелісті азайтуға бағытталған жол айрықтар күзге таман қолданысқа берілуі тиіс. Ал тұрғындар қиылыстағы қауіпсіздікке көңіл бөлу назардан тыс қалмаса деген тілектерін білдіруде.

Әсіресе жаңадан жөнделген көше жолдарында. Орал қаласының Әбілхайыр хан даңғылының бойындағы 7-ші және 9-шы шағын ауданды бөліп тұрған жол қиылысына қатысты тұрғындардың арызы осындай. №3 көше аталған жөндеуден кейінгі жол мен Әбілхайыр даңғылының қиылысында жаяу жүргінші жолағының белгісі қойылған. Бірақ тұрғындар бәрібір бұл жолдан өтуге жүрексінеді. Ал көліктер көп жүретін уақытта бір-біріне жол бергісі келмеген жүргізушілер үлкен кептеліс туғызатын көрінеді. Жол-көлік оқиғаларының тіркелуіне де бағдаршамның жоқтығы себеп болып отыр дейді тұрғындар.

Бұл жол "Қарашығанақ петролеум оперейтинг" компаниясының қаражатына 2017-жылы жөнделген болатын. Жоба бойынша бағдаршам орнату қарастырылғанымен, әзірге оның жұмысы кейінге қалдырылған көрінеді.

Шаһарымызда бағдаршамға зәру қиылыстар бойынша жоспарлар жасалып жатыр дейді мамандар. Сол себепті қауіпті қиылыста сақтық шарасын қаперде ұстап, бағдаршамның орнатылуын күте тұруға тура келеді.