Биыл Қазақстанның Қарулы Күштерінің құрылғанына 30 жыл толып отыр. 7 мамыр Отан қорғаушылар күні және Жеңіс мейрамы қарсаңында Ақорда әскерилерге құрмет көрсетті. Мемлекет басшысы Қасым-Жомарт Тоқаев күштік құрылым өкілдерін құттықтап, еліміздің қауіпсіздігін қамтамасыз ету ісіндегі әскери қызметшілер мен арнаулы мемлекеттік органдар қызметкерлерінің үлесі ерекше екенін айтты. Өз ісінде ерлік танытып, адал қызмет еткендер еленіп, мемлекеттік наградалармен марапатталды.
Жеңіс мейрамымен қатар келіп отырған Отан қорғаушылар күнін атап өту басталып кетті. Ақорда бүгін күштік құрылым өкілдеріне есігін айқара ашты. Айта кету керек, 7 мамыр мерекесін атап өту қазақстандық әскерилер үшін ерекше болып отыр. Себебі биыл Қазақстан Қарулы Күштерінің құрылғанына 30 жыл толды. Президент Қасым-Жомарт Тоқаев қазақстандық әскердің мықты, айбынды болуына тілек білдірді.

Ақордада өткен салтанатты жиында Екінші дүниежүзілік соғысқа қатысқан ардагерлеріміздің ерен еңбегін еске алды. Тоқаев бұл соғыста 500-ге жуық жерлесіміз Кеңес Одағының батыры атанғанын, бірақ көптеген майдангеріміздің ерліктері түрлі себептерге байланысты елеусіз қалғанын еске салды. Президент Қазақстанның күштік құрылымында ерен еңбегімен көзге түскен, адал қызметімен еленген әскерилерді мемлекеттік наградалармен марапаттап, жоғары әскери және арнаулы атақтар, сыныптық шендер берді.

Еске сала кетейік, қаралы қаңтар оқиғалары елдегі күштік құрылымдардың осал тұстарын айқындап берген еді. Осыған орай Президенттің тапсырмасы бойынша үкімет қазынадан күштік құрылымдарды жасақатуға 2,2 трлн теңге бөліп отыр. Айтпақшы биыл 9 мамырда елде әскери шеру болмайды. Қорғаныс министрі Руслан Жақсылықов журналситерге берген сұхбатында әскери шеру үлкен шығынды талап етеді. Шеру өткізуге 4 млрд теңге шығындалады, одан да бұл қаражатты әскери дайындыққа жұмсаған жөн деген еді.