Орал қаласындағы Жәңгір хан 11 мекенжайында орналасқан тұрғын үйдің шатырынан 5 жылдан бері су кетіп тұр. Азаматтар тығырықтан шығу үшін тұрғын үйлерді жаңғырту бағдарламасы бойынша шатыры мен жылу жүйелерін алмастырғысы келеді.

Бұл, қаламыздағы Жәңгір хан 11 мекенжайында орналасқан- тұрғын үй.
Аталмыш көп қабатты ғимарат өткен ғасырдың 71 жылы тұрғызылған. Үйдің иелері баспанамызға күрделі жөндеу жұмыстары жүргізілмеді, тек ішінара шатыр алмастырылды, -дейді. Тұрғындар 5 жылдан бері шатырдан су кеткен пәтерлерін жөндеуден жалығыпты. Аталмыш проблемадан арылу үшін 90 пәтер тұрғын үй модернизациясына қатысуға шешім қабылдапты.

Азаматтар тұрғын үйдің модернизациясы бойынша құжаттарымыз дайын, тіпті мердігер компанияны таңдадық,-дейді. Алайда, азаматтар қаражаттың тапшы болуына байланысты бағдарламаның шарапатын көре алмай, шатырымыздың мәселесі шешілмей ме деп алаңдап отыр. Шатыр мен жылу жүйелерін алмастыруды көздеген жобаның құны 50 млн теңге деп бағаланған.

Қазіргі таңда шаһар бюджетінен үш тұрғын үйдің күрделі жөндеуі үшін 68 млн теңгедей қаражат бөлінген. Сала мамандары биыл қар көп түсіп, он бес шақты тұрғын үйдің шатырына залал келгеннен кейін, тұрғын үйді жаңғырту бағдарламасына қатысам деген жандардың саны артты,- дейді.
Биыл қала бюджетінен тиісті қаржы табылмаса, Жәңгір хан 11 мекенжайы тұрғындарының шатыр алмастырам деген армандары орындалмайтын секілді.