БҚО-да 170-тен аса тойхана мен мейрамхана, ал шаһарда 70-тен аса тойхана өз жұмысын тоқтатқан. Карантиндік шараларға байланысты кәсіпкерлер шығынға батып отыр. Сол себепті мейрамхана иелері тығырықтан шығудың барлық жолын қарастыруда. Дағдарыстан шығудың амалымен Орал қаласында кәсіпкердің тойханасы әкімдіктің қолдауымен енді шығармашылық орталық ретінде жұмыс жасайтын болды.
Расымен, екі қабатты тойхана 1 жылдан астам жұмыс жасамай келген. Кәсіпкер жеке қаражатына ғимараттың ішкі жұмыстарын жасапты. Зашаған кентінде орналасқан бұл орталық жұмыс күндері тұрғындарды күтетін болады. Өзге кәсіп көзіне айналған мейрамхана мен тойхана иелеріне мемлекет жалға алу ақысын төлеп береді. Шамамен бір шаршы метр ауданға қарастырылған демеу қаржының көлемі - 2000-2500 теңге аралығында. Кәсіпкер мен мемлекет 3 жылға дейін екі жақты келісімшарт жасайды.
Бұрынғы тойханада енді 14 үйірме жұмыс жасайтын болады. Иесі сұхбат барысында мемлекет тарапынан берілетін жалға алу құнын айтпады. Алайда ғимараттың көлемі 1724 шаршы метр екенін ескерсек, айына 4 млн астам қаражат шығып тұр. Ал өзге кәсіпкерлердің басым бөлігі бұндай қадамға әзірге дайын емес көрінеді. Жалпы Орал қаласында осы кезге дейін «Ақбосаға» банкет залы электротауарлар сататын дүкенге айналса, «Ай луна» мейрамханасы киім-кешек дүкені ретінде жұмысын қайта бастаған болатын.

Теректіде коронавирус инфекциясының таралуына тоқсауыл болу үшін аудандық мемлекеттік санитарлық дәрігер жаңа қаулы шығарды. Қаулыда бірқатар шектеу шаралары енгізілген. Шектеу шараларының көбі аудан орталығы Федоровка ауылының тұрғындарына қатысты.

Қаулыға сәйкес аудан орталығының 65 жастан асқан қарияларына аса қажет болмаса көшеге шығуға шектеу қойылды. Және Федоровка ауылының аумағында ірі азық-түлік және азық-түлік емес базарлар мен сауда желілерінің жұмысы тоқтады. Шектеу шаралары спорт нысандары мен саябақтарды да айналып өткен жоқ. Енді ауыл тұрғындары тынымбақтарда да серуендей алмайды. Сала мамандары бұл шаралардың барлығы ауданда коронавирус инфекциясының таралуына жол бермес үшін қабылданып жатыр,- дейді.

Сала мамандарының таратқан ақпарына сүйенсек, Теректі ауданында жұқпалы вирусты жұқтырған 10 дерек тіркелген. Қалыптасқан жағдайға байланысты ауыл тұрғындарымен телефон арқылы тілдестік. Өз есімін атамауды сұраған азамат жағдайдың бірқалыпты екенін айтты. Оларға ауылдағы барлық базарлар мен нысандардың жұмысы тоқтайтыны туралы әлеуметтік желілер арқылы хабарлама таратқан.

13-ші қыркүйектегі мәліметке қарағанда БҚО коронавирус инфекциясын жұқтырған 7 науқас тіркеліпті. 22 азамат ауруынан құлан-таза айыққан.