Өткен сәрсенбіде яғни 25 желтоқсанда Ақтау түбінде апатқа ұшыраған Әзірабйжан ұшағының бортында 67 адам, оның ішінде бес экипаж мүшесі болған еді. Оқиға салдарынан 38 жолаушы қаза тапты. Жолаушылардың ішінде 42 Әзербайжан азаматы, 3 Қырғызстан азаматы және 16 Ресей азаматы және 6 Қазақстан болды. Апаттан 29 адам тірі қалды Өкінішке қарай, ұшақта болған алты қазақстандықтың бәрі мерт болды. Еске сала кетсек, бұл ұшақ Бакудан Грозныйға бет алған еді. Алайда, Грозный мен Ресейдің өзге қалалары лайнерді қабылдамады. Әзербайжан ұшағы Каспий арқылы Қазақстанның Ақтау қаласына қонуға рұқсат сұрады. Жергілікті әуежай әуе кемесін қабылдауға дайын болғанымен, діттеген жеріне жетпей қала түбінде апатқа ұшырағаны мәлім. Өзінің әуе кеңістігін берген, құтқару жұмыстарына жұмыла кіріскен қазақстандықтарға әлеуметтік желіде айтылып жатқан алғыста шек жоқ.

Ұшақ құласымен әлемдік БАҚ-та әртүрлі болжамдар айтыла, жазыла бастады. "Росавиация" "ұшаққа құстар соғылып, апат содан болуы мүмкін" деп хабарлаған еді. Бірақ Euronews-тің хабарламасынан кейін ақпарат бетінде Ақтауда орын алған Azerbaijan Airlines ұшағының апатына Ресейдің зениттік зымыраны себеп болған деген болжам тез тарады. Зымыран Грозный аспанында дронға қарсы режим күшінде болған кезде ұшырылған, снаряд ұшаққа жақын жерде жарылып, сынықтары ұшаққа тиген. Жолаушылар мен экипаж мүшелері жарақат алған. Бұл мәліметтерді апаттан аман қалғандар өз сұқбатында айтып жатты. Қазақ жерінде орын алған ұшақ апатына қатысты сан- қилы алып-қашпа әңгімелер де жарыса жазылып, айтылып жатты. Апаттың себеп-салдарын тергеу әділ өтетініне күмән білдірген де жоқ емес. Алайда Қазақстан «қара жәшікті» Бразилияның авиациялық оқиғаларды тергеу және алдын алу орталығына тапсырды. Сарапшылар бұл дұрыс қабылданған шешім дейді.

Ұшақ қазақ жеріне құлағанымен, иесі - Әзербайжан. Қаза болғандардың көбі - Әзербайжан азаматы. Сарапшылардың айтуынша, әрі қарай мәселенің қалай зерттелетініне сол ресми Бакудың және Бразилияның, Мәскеудің өзара ықпалдастығы әсер етеді. «Зымыран соққысы болуы мүмкін» деген де нұсқаны ұшақты шығарған Embraer компаниясы жылы жауап қоя алмайды дейді олар. Ал жалпы ұшақ апатын тергеуге бір жыл кетуі мүмкін.

Өткен демалыс күндері Ресей президенті Владимир Путин Әзербайжан басшысы Ильхам Әлиевтен Azerbaijan Airlines ұшағы апаты үшін кешірім сұрап көңіл айтқаны туралы Кремльдің хабарламасы тарады.