Оралда қалалық мәслихатының 19-шы кезектен тыс сессиясы өтті. Жиында қала бюджеті бүтінделіп, оны тиімді жұмсау барысы талқыланды. Сондай-ақ халық қалаулыларымен бірге шешім қабылданды. Сессияның күн тәртібінде екі маңызды мәселе қаралады. Жастарды жұмыспен қамту және кенттердің биылғы бюджеті. Сессияның бірінші мәселесі жастарды жұмыспен қамтуға қатысты болды. Бұл тақырып өте өзекті, себебі жұмыссыздықтың алдын алу және жастардың еңбек нарығына интеграциялануы - бүгінгі таңда қоғамда кеңінен талқыланып отырған мәселелердің бірі. Күн тәртібінде оқу орындарының түлектерін қоғамдық жұмыстарға, әлеуметтік жұмыс орындарына қабылдау мәселелері қарастырылды. Және сессияда кезекпен сөз алған бөлім басшылары, алда атқарылатын іс-шаралардың кірісі мен шығынын мәслихат депутаттарының алдында мінберде оқып, талқыға салды. Кейбір күрмеулі көп мәселелерді депутаттар тарапынан сауалдар қойылып, нақтыланды.Жиында Орал қаласының экономикалық және бюджеттік жоспарлау бөлімінің басшысы Азамат Қадыров шаһар, кенттер мен ауылдық округтің 2025 жылға арналған бюджеттерінің жоспарлы түрде не мақсатта жұмсалатыны туралы баяндады.Оның айтуынша, Орал қаласының бюджеттік кірістері мен шығыстары теңдестіріліп, 22,7 млд. сомасына ұлғайту жоспарланған. Атап айтқанда, облыстық бюджеттен қарастырылған нысаналы трансферттер – 27,2 млрд.теңге, кредиттер – 10,6 млрд.теңге.Ұлы Жеңістің 80 жылдығына орай ҰОС ардагерлеріне 5 млн. теңге көлемінде біржолғы төлем жасау және қалалық мәдениет және демалыс саябағында Шаған өзені арқылы өтетін көпірді ағымдағы жөндеу, қалалық Жастар мәдениет сарайында креативті хаб ашу шығыстары жоспарланғанын жеткізді.
Сонымен қатар, сессияда Деркүл, Исатай, Байқоныс және Уразовка ауылы және кенттеріндегі жолдарды жөндеу мәселелері талқыланды. Сондай-ақ, бірқатар көше бойындағы үйлердің қасбеттерін жөндеп, жағалауды қалпына келтіру туралы шешім қабылданды.

Орал қаласының маңындағы кенттік окургтерде мал жайылымдық жерлері жетіспейді. Бұл туралы қалалық мәслихат депутаттарының халықпен байланысты нығайту бағытында өткізген отырысында 20-шы округ депутаты Мирболат Ерсаев мәлімдеді. Депутат сағатында көптеген мәселелер, атап айтқанда шаһардағы жол жөндеу, абаттандыру, қоғамдық көлік қозғалысы сынды әлеуметті толғандырған мәселелерді шешу жолдары айтылды. Қазір Деркөл кентінде бағдаршамдар жетіспейді. Оған қоса мал жайылымдық жерлердің аздығы да тұрғындардың көкейінде жүрген өзекті жәйт. Бұдан бөлек кенттегі шешімін табуы тиіс проблемаларды депутаттар атап өтті. Мал жайылымдық жерлерінің тапшылығы қала аумағындағы барлық кенттерге тән жағдай. Бүгінде Деркөлдің өзінде 6 мыңнан аса бас мал басы бар. Тұрғындар «Орал ауыл шаруашылығы тәжірибе станциясы» аумағынан жайылымдық жер сұрап, әкімдіктен осы мәселенің шешімін тауып беру үшін округ депутатына өтініш білдірген. Сонымен қатар Деркөл кентіне №7 қоғамдық көлік қатынайды. Аталмыш бағыттағы жолаушы тасымалымен шұғылданушы компанияға тұрғындар тарапынан шағым өте көп. Бүгінде 7-ші автобусқа жаңа 9 көлік сатып алынған. Айдың аяғына дейін тағы да екі автобус әкелінбек. Кенттегі күрмеуі қиын өзекті мәселелер алдағы уақытта кезең-кезеңімен шешілетінін атап өтті шаһар басшысы Абат Шыныбеков.