"Аялаған алақан" қоры көптеген қайырымдылық шараларына мұрындық болып келеді. Қор жетекшісі Рада Хайрушеваның айтуынша, мұқтаж жандарға көмек қолын созу туралы ой осыдан 8 жыл бұрын өз перзенттерін дүниеге әкеліп, ана атанған сәтте пайда болған. Ол сол кезде перзентхана қабырғасында шырылдап жылап анасын іздеген тастанды балаларды өз көзімен көріп, жүрегі шыдамайды. Өмірге келіп үлгермей жатып, тағдыр тауқыметін татқан сәбилерге қамқорлық көрсетуден басталған ісін тұрақты түрде жалғастыру үшін "Аялақан алақан" деп аталатын қайырылымдық қорын құрады. Бұл жерде өзі сынды ерікті түрде жақсылық жасауға құштар жандардың басын қосып, мейірбандыққа зәру адамдармен жан жылуын бөлісіп келеді. Бүгінде қор жетімдер мен жесірлерге, аз қамтылған отбасылар мен мүмкіндігі шектеулі жандарға жанашырлық танытып, қолдан келген көмегін көрсетіп келеді. "Әлем балалар көзімен" деп аталатын бұл көрмеде сөйлеу, есту қабілеті бұзылған және ерекше қамқорлықты қажет ететін мектеп интернаттың тәрбиеленушілерінің туындылары қойылған.

Бұл суреттер арқылы балалар әлемге деген махаббатары мен өмір сүруге деген құлшыныстарын паш еткендей. Тегін үйірмелер арқылы бейнелеу өнерінің қыр-сырын меңгерген қылқалам шеберлері туындыларының көрмелері бір мезетте Қазақстанның түкпір-түкпірінде өтеп жатыр.

Биыл еріктілер жылы. Қайырымдылық жасау ісін жандарына серік еткен қор өкілдері биыл балаларды түрлі өнерге тегін баулып, әлем тілдерін меңгеруде. Қор жетекшісі Рада Хайрушева болашақта балалардың туындыларын әлемдік деңгейге шығарып, шетелдерде көрме ұйымдастыруды жоспарлап отырғанын мәлімдеді.

Әр саланың өкілі осы қорда бірлесе жұмыс жасайда. Бірі мұғалім, бірі дәрігер, енді бірі шенеунік болса, бірі суретші. Олар мұқтаж жандарға жәрдемдесіп, еш ақысыз балаларға білгенін үйретеді. Балалардың қуанышын, жетістігін көруден асқан бақыт жоқ,- дейді еріктілер.

Аялақан алақан қоры көп балалы аналар мен жетімдер үйінің түлектерін де назардан тыс қалдырмайды. Бір жағадан бас, бір жеңнен қол шығара отырып, бірлігі жарасқан мейірбан жандар біздің мақсатымыз-теңізге құйылған бір тамшыдай болса да атқарған ісімізбен қоғамға пайда тигізу дейді.

Орал қаласында Нұрай Темірғали есімді бойжеткен тұрады. Бұл қыздың өзгелерден айырмашылығы бойжеткен ерікті түрде қоршаған ортаны, құстарды қорғаумен айналысып жүр. Қыста құстарға жемсауыттар қояды, ұя орнатады. Былайша айтқанда құс біткенді қамқорлығына алған ба дерсін. Нұрай Темірғалидың бұл тірлікпен айналысқанына екі жылдай уақыт болған. Ешкімнен ештене күтпей, ешқандай ақша дәметпей табиғатқа қамор болып жүрген қаршадай қыздың тірлігіне сүйсінбеген жан қалмаған. Ал, сіз қоғамға қандай пайда тигізіп жүрсіз? Осы сұраққа жауап іздеп көрдіңіз бе? Биылғы жыл волонтерлер жылы деп жарияланғаны белгілі. Осы жылдың аясында елге, жұртқа пайдалы бір іс тыңдыруға кім кедергі?
Бұл Орал қаласындағы мәдениет және демалыс саябағы. Бұл жер адамдардың сүйікті демалыс орны. Осы демалыс орны үшін пайдам тисін дейтін адамдар аз. Дегенмен бар. Сондай жандардың бірі- Нұрай Темірғали. Нұрай осы саябақта тізіліп тұрған ұялар мен жемсауыттарды орнатушы волонтер. Табиғатқа, құстарға деген жанашырлығы осы істі бастауына себепші болған. Биылғы жыл ресми түрде волонтерлер жылы деп жарияланды. Ал Нұрай бұл игі дәстүрді ешқандай президенттік тапсырма күтпей-ақ бастап кеткендердің бірі. Міне осылайша туған күн тойланбай, оның орнына құстарға қамқорлық жасау идеясы келген. Осының арқасында қазір Орал қаласындағы мәдениет және демалыс саябағында Нұрай Темірғали орнатқан жемсауыттар мен ұялар тізіп тұр. Қаршадай қыздың табиғатқа деген, құстарға деген жанашырлығы үлкен сауапты іске ұласып отыр.
Нұрай Темірғали көпке үлгі. Әр жас осылайша қоршаған ортаға пайдам тисін деген мақсат қойса несі жаман?! Волонтерлер жылын пайдаланып қоғамға пайдалы болуға тырысайық. Волонтерлік іс жаспен өлшенбейді. Қайымдылық жасаймын деген адамның жасына да, жағдайына да шектеу қойылмаған. БҚО дәл қазіргі сәтте 5 мыңнан астам волонтер ресми тіркелген. Волонтерліктің түбі адамға, қоғамға пайдаңды тигіз деген үгітте жатыр.
Әр істің шикі тұсы болады ғой. Биылғы волонтерлер ісінде де піспей, жетілмей жатырған тұстары баршылық. Атап айтсақ бұл жұмыс әлі жүйеленбеген. Әр сала бойынша жауапты мамандар жоқ.Мысалы сіз белгілі бір сала бойынша волонтер боламын деп шешсеңіз кімге бару керек, қайда бару керек деген сұрақпен бас қатырасыз. Яғни мәденит саласы, денсаулық саласы болсын, әр саланың өзінің жауапты мамандары бекітілмеген,- дейді бізбен сұхбаттасқан Айболат Құрымбаев.

Оралда төртінші қайырылымдылық гранд балл өтті. Биылғы жылы ұйымдастырылған қайырымдылық шарасының ауқымы кеңейіп, республикалық сипатқа ие болған. Ақ жайық өлкесінде ұйымдастырылған салтанатты шараға ат басын бұрып келген жұлдызды қонақтардың саны да екі есеге дейін артып, биылғы жылы шаһарымызға 15 жұлдыз келген еді. Қызыл кілемнің үстінде жүріп өткен жұлдыздарды көруге келген Оралдықтардың да қарасы қалың болды. Қайырымдылық шарасынан түскен қаражаттың барлығы Гулхая Жуашбаеваның емделуіне жұмсалмақ.

Оралда төртінші мәрте ұйымдастырылған қайырымдылық шарасы жұлдыздардың қызыл кілемнің үстінен жүріп өтуінен басталды. Шара қайырымды, өзге адамға қамқор болуға үндейді.

Биылғы жылы облыс орталығында ұйымдастырылған қайырымдылық балына 120 дебютант қатысты. Олар бір айдың көлемінде түрлі қайырымдылық шарасына қатысып, қам көңіл жандарға көмек қолын соза білді. Төртінші мәрте ұйымдастырылып отырған шараның биылғы жылы ауқымы кеңейіп, республикалық деңгейге көтеріліп отыр. Қайырымдылық шарасына қатысқан жастар еліміздің түрлі қаласының тумалары. Жастардың бірі оқу орынында білім алса, енді бірі түрлі салада қызмет жасап жатыр.

Биылғы жылы ұйымдастырылып отырған шараға қазақ эстрадасының 15 жұлдызы арнайы табан тіреді. Олардың қатарында Төреғали Төреәлі, Мөлдір Әуелбекова, Гүлнұр Оразымбетова, Тамара Асар сынды
танымал әншілер болды. Олар сахнаға шығып, жүрекжарды пікірілерін білдіріп, әуезді әнін көрерменге сыйлаған еді.

Кештің жұлдызды қонақтарының ішінде белгілі кинопродюссер Нұрлан Қоянбаев та бар еді. Атақты продюссер қайырылымдылық шарасынан алған әсерін былай деп жеткізді.

Биылғы жылы ұйымдастырылған кештің басты ерекшелігі -  егде тартқан жандардың биі еді. Біраз жасты еңсерген жандар жастық кезін естеріне түсіріп, көрерменге керемет биді тарту етті.

Бұл жолы мүмкіндігі шектеулі балаларға көңіл бөлген партия өкілдері "Сити центр" ойын-сауық орталығындағы кинотеатрда тегін көрсетілім ұйымдастырған болатын. Шараның өтуіне "Мейірім" мүгедек балалар мен олардың ата-аналарының қоғамдық бірлестігі өз үндерін қосты.

"Ақжол" ҚДП БҚОФ үнемі қайрымдылық шараларына зор көңіл бөледі. Әлеуметтік аз қамтылған отбасылар мен мүмкіндігі шектеулі жандардың мұң-мұқтажын тыңдап, қолдан келгенше көмегін көрсетуден аянып қалған емес. Бұл жолғы шарада тірек-қимыл жүйесі зақымданған балалар мен олардың ата-аналарына көңіл бөлген партия өкілдері бүлдіршіндерге тәтті сыйлықтар тарту етіп, қызықты мультфильм көрсетті.
Қам көңіл жандардың жүрек жарды алғысы мен балалардың қуанышына бөленген "Ақжол" партиясы алдағы уақытта да мұндай жұмыстар жалғасын табатынын мәлімдеді.

Толқын Исатайқызы - өмірдің қиындығын көп көрген жалғызбасты ана. Бес баланың анасы 2009 жылы өкпенің қатерлі дертіне шалдығып, жұмысқа жарамсыз болып қалыпты. Содан бері қамкөңіл жанға облыс жамағаты қол ұшын созып келеді.

Пәтерден-пәтерге көшіп шаршаған жанды "Қарекет" қайырымдылық қоры шаттыққа бөледі. Құрылғанына алты ай болған олар бүгін міне, еліміз бойынша үшінші баспананың кілтін табыстап отыр. Қайырымды жандардың көмегімен Толқын Исатайқызы қала маңындағы Озерный ауылынан кең үйге қол жеткізді. Қор жетекшісі Алғадай Әбілғазыұлы осылайша қазақтың "жылу" сынды ескі дәстүрі жаңғыртпақ ниетте.

Елге танымал "Өнер қырандары" театрының ұжымы да "Қарекетке" ашылғалы бері ақпараттық қолдау көрсетіп келеді. Ұжымның белді мүшесі Сырымбет Бибосынов та қуанышты жағдайға куә болды.

Осынау игі шараның басы қасында жүрген қайырымды жандарға облысымыздың бас имамы Еркебұлан Ибрайымұлы да алғысын білдіріп, қор жұмысына береке тіледі.

Облыстық мешіт жамағаты болса, Толқын Исатайқызына берілген үйге жиһаз-жабдықтар алып, материалдық көмек бермек.

Оралда үшінші қайырымдылық гранд балы өтті. 100 жас, 50 жұп Салтанат сарайында өнер көрсетіп, осылайша жиналған қаражаттан қамкөңіл жандарға көмек көрсетті. Қайырымдылық шарасына Димаш Құдайбергенов, Ринат Гайсин мен «Еуровидение-2011» байқауының жеңімпазы Эльдар Гасымов те арнайы қатысқан болатын. Сәні мен салтанаты жарасқан шараға шақырылған Қазақстан эстрадасының жарық жұлдыздары, танымал әртістер ең алдымен қызыл кілем үстімен жүріп өтіп, кешке келгендермен суретке түсті. Ал смокинг киінген бозбалалар мен аппақ көйлекті бойжеткендер құдды ертегі әлеміне енгендей...Балдың 100 дебютанты Салтанат сарайының төрінде бар өнерлерін паш етті. Мәртебелі меймандарға хош келдің айтып, ыстық лебізін білдіруге облыс басшысы Алтай Көлгінов те арнайы келген. Кастинг арқылы іріктеліп, Гранд балға қатысу мүмкіндігіне ие болған жастарды еліміздің ең беделді балетмейстерлерінің бірі Қарлығаш Қадырбекқызы мен Досжан Табылды арнайы дайындапты. 1 ай бойы шеберліктерін шыңдаған жастар павана, кадриль, финдік полька мен Шәмші әндеріне де би биледі. Биыл үшінші рет өткізіліп тұрған салтанатты гранд бал қайырымдылық ниетін ту етеді. Бұл ниеттерін қазақ эстрада жұлдыздары да қолдап, жұртшылықты адал махаббаттарымен тәнті еткен Анель мен Марлен, Ринат Гайсин, Асылхан Төлепов пен ерекше дауыс иесі Димаш Құдайбергенов те арнайы Ақ жайыққа ат басын бұрыпты. Салтанатты шара соңында Мақсат Абуов пен Камилла Халелова гранд-балдың ханзадасы мен ханшайымы болып танылды.
Ал қайырымдылық гранд балының толық нұсқасын бейсенбі күні 19.50де біздің арнадан тамашалай аласыздар!