Қайрат Сатыбалдыға қатысты тағы бір істің беті ашылды. Сыбайлас жемқорлыққа қарсы күрес агенттігінің хабарлауынша, Қайрат Сатыбалдыұлының бақылауындағы екі компанияның басшылары ұсталып, сот санкциясымен қамауға алынды. Тергеу барысында Қ.Сатыбалдыұлының компаниялары кірме теміржол желілері иелерінің ақша жымқырғанын анықталды.
Наурыз айындағы басты жаңалық- тұңғыш Президенттің немере інісі Қайрат Сатыбалдының қамауға алынуы болды. Оған қатысты "Қазақтелеком" АҚ-ның лауазымдық өкілеттіктерін асыра пайдалану және қаражатын аса ірі мөлшерде ұрлау дерегі бойынша қылмыстық істі тергеліп жатыр. Агенттік қазір қамауда отырған Сатыбалдының басқа да қылмыстарға қатысы бар-жоғын анықтап жатқан еді. Бүгін мәлім болғандай, тергеу Қ.Сатыбалдыұлының бақылауындағы компаниялар – кірме теміржол желілері (соңғы километр) иелерінің ақша жымқырғанын анықтады. Осыған орай екі компанияның басшылары ұсталып, сот санкциясымен қамауға алынды.

Енді қолға түскен компаниялардың басшыларының кінәсын сот анықтайды. Тергеу барысына байланысты басқа ақпараттар жария етілмей отыр. Айта кетейік, Қайрат Сатыбалдыұлының бұрынғы әйелі Гүлмира Сатыбалдыға қатысты бизнесті рейдерлік басып алу дерегі бойынша соталды тергеу басталған болатын. Ол 2 айға қамауға алынды. Гүлмира Сатыбалды аса ірі көлемде яғни 747 миллион теңге бюджет қаражатын жымқыру дерегі бойынша тергеліп жатыр.