Бұған дейін алты жылға сотталған Назарбаевтың бауыры Қайрат Сатыбалдының тағы да басы дауға қалды. Ағасы ел басқарып тұрғанда Сатыбалдының қолы жүріп тұрды. 2018 жылы қазақстандық Forbes журналында 50 ең бай бизнесмендердің қатарында тұрды. Оның байлығы 163 миллион долларға бағаланды. Тіпті 35 жасында генерал болды. Діни жолындағы азаматтарды қолдауын да аңғардық. Алайда, қаралы қаңтар тарегдиясынан соң Қайраттың да басына қара бұлт төнді. Ол Дубайға қашып бара жатқан жерінде, 1,5 миллиард доллармен қолға түсті. Бұл 15 тонна ақша. Қайрат Сатыбалды бұған дейін «Қазақтелекомнан» 12,7 млрд теңге, «Көлік сервисі орталығынан» 28,6 млрд теңге жымқырған деп айыпталып, 6 жылға сотталғанды. Қазір ол жазасын өтеп жатыр. Ал бүгін өткен сотта Назарбаевтың бауыры 67 миллиард теңгені немесе 149 млн долларды жылыстатты деп айыпталып отыр.

ЕЛДАР НҰРМАХАНОВ - ПРОКУРОР «Қазақстан аумағындағы мүлік құны 34 миллиард 860 миллион теңгеден асып жығылады. Шетелдерде 32 миллиард 791 миллионнан асса, толық сомасы 67 миллиард 655 миллион 203 мың 758 теңгені құрайды»

Осылайша Сатыбалдыға тағы да "Қылмыстық жолмен алынған ақшаны және (немесе)өзге мүлікті заңдастыру (жылыстату)") бойынша айып тағылып отыр. Өз кезегінде сотталушы өзіне тағылған айыпты толық мойындады. Тіпті Қайрат Сатыбалдыұлы айыптау актісінде көрсетілген сомаларға да келісті. Сондай-ақ, тергеу барысында алынған айғақтарды даулаудан да бас тартты.

Сатыбалдыұлының қорғаушысы кінәні мойындау туралы мәміле түріндегі процессуалдық келісім жасау және заңсыз алынған мүлікті қайтару туралы өтініш берді. Осыған байланысты сот процессуалдық келісім жасау туралы мәселені шешуге уақыт берді. Сот отырысы белгісіз мерзімге кейінге шегерілді. Ал Сыбайлас жемқорлыққа қарсы қызмет экс-президенттің немере інісі бұған дейінгі қылмысы үшін мемлекетке 732,8 млрд теңге қайтарылғанын мәлімдегенді.

Астанада экс-президент Нұрсұлтан Назарбаевтың немере інісі Қайрат Сатыбалдының ісі бойынша кезекті сот отырысы басталды. Айта кету керек сот отырысы онлайн режимде өтті. Айыпталушы Сатыбалдының өзі сотқа онлайн қатысты. Еске сала кетейік, Қайрат Сатыбалды Қылмыстық кодекстің 195-бабы яғни алдау немесе сенiмді теріс пайдалану жолымен мүлiктiк залал келтiру және 189-бап ( сенiп тапсырылған бөтен мүлiктi иемденiп алу немесе талан-таражға салу) бойынша айыпталып жатыр. Сотқа тартылып жатқан Қайрат Сатыбалды сот отырысы барысында бейнебайланыс арқылы туған-туыстарымен сөйлесіп, олар камераға түспеуді айтты. Сот отырысы барысында мәлім болғандай, "Қазақтелеком" АҚ-ның және "Көлік сервисі орталығы" қаражатын аса ірі көлемде жымқырды деп айыпталып отырған Қайрат Сатыбалды компанияға келтірген 40 млрд теңге шығынды өтеуге медициялық келісімге келді. Айыпталушылардың қорғаушысы олар өз кінәсін мойындайтынын айтты. Оның ішінде 12 млрд теңгені Қайрат Сатыбалды өтейді. Қалғанын Сатыбалдының сыбайластары өтейді. Ал өзіне тағылған айып бойынша, қарыздың бір бөлігін қашан қайтарасыз деген журналистердің сұрағына сот аяқталмай, түсініктеме бермейтінін айтты. Онлайн режимде өткен сот отырысынан видео-аудио түсірілімді жариялауға шектеу қойылды. Естеріңізге салсақ, осы жылдың наурыз айында сыбайлас жемқорлыққа қарсы қызмет Қайрат Сатыбалдыны Алматы әуежайында Дубайға ұшпақшы болған сәтінде ұстаған болатын. Ол "Қазақтелеком" АҚ-ның қаражатын аса ірі көлемде жымқырды деген күдікке ілінді. Кейін агенттік оның басқа да қылмыстарға қатысы барын тексерді. Ал тамыз айында Сыбайлас жемқорлыққа қарсы қызмет Қайрат Сатыбалдыға және басқа да тұлғаларға қатысты "Қазақтелеком" АҚ және "Көлік сервисі орталығы" АҚ-ның қаржысын ірі көлемде жымқыру фактілері бойынша сотқа дейінгі тергеуді аяқтап сотқа жолдағанды. Айыпталып отырған Қайрат Сатыбалдының бұрынғы әйелі Гүлмира Сатыбалды да қамауға алынғаны мәлім. Ол Универсиада-2017 нысандарын жөндеуге бөлінген ақшаны ұрлады деп айыпталып жатыр.Тергеу кезінде айыпталушылардың 240 миллиард теңгеден яғни 500 миллион доллардан астам заңсыз активтері мен қаржысы мемлекетке қайтарылды.