7 қазанда Израиль қалаларына Газа секторынан екі мыңнан аса зымыран атқылаған деген мәлімет бар. Палестина-Израиль қақтығыс әлемді алаңдатып отыр. BBC News басылымының хабарлауынша, зымырандар атқылауы әрі жүздеген ХАМАС сарбазының шабуылы салдарынан Израильде кемінде 700 адам көз жұмған. Израильдің жауапты соққысынан кейін Газада 370-тен астам адам қаза тапқан. Израиль әскерилерінің мәліметінше, Израильдегі қақтығыс кезінде 400 палестиналық сарбаз көз жұмып, ондаған адам тұтқындалған. ХАМАС ұйымы жүзге жуық израильдікті, оның ішінде әскерилерді әрі қарапайым азаматтарды кепілге алған. Жалпы екі тараптан 4 мыңға жуық адам жарақат алған. Израиль үкіметі елдегі әскери жағдай туралы дабыл қақты. Ал қақтығыс аймағында қазақстандықтар да бар. Сыртқы істер министрілгінің мәліметінше, қазір Израильде 77 адам консулдық тіркеуде тұр. Олардың ішінде елшілік қызметкерлері мен отбасы мүшелері де бар.Ал Израильдің жоғары оқу орындарында 5 қазақстандық студент оқып жатыр. Сондай-ақ 30-ға жуық қазақстандық жергілікті медициналық мекемелерде тағылымдамадан өтуде. Барлығы - 112 адам. Сонымен қатар консулдық тіркеуге тұрмаған қазақстандықтардың саны 400 адамнан асады. Ресми өкіл Израильде қаза болған, зардап шеккен немесе кепілге алынған қазақстандықтар туралы ақпарат түскен жоқ дейді. Газа секторында жүрген қазақстандықтардан толық ақапарт алу қиындауда.

Ал қазақстандықтарды елге әкелу мәселесі пысықталып жатыр дейді.

АЙБЕК СМАДИЯРОВ - ҚР СІМ РЕСМИ ӨКІЛІ «Эйр Астана» рейсті алып тастады. Бұл жолаушылардың қауіпсіздігі үшін жасалды. Қазір отандастарымызды елге әкелу мәселесі пысықталып жатыр».

Еліміздің Азаматтық аивция комитетінің баспасөз қызметі Air Astana әуекомпаниясы 10 қазан күні Израильге Алматы - Тель-Авив - Алматы бағыты бойынша бір рейс орындауды жоспарлап отырғанын хабарлады. Қазіргі уақытта "Эйр Астана" әуе компаниясы Тель-Авив қаласының әуежайы тарапынан әуежайға рейстің келу және ұшу уақытын келісуі күтіледі. Ал "Эйр Астана" мәліметінше, Израильдегі жағдай шиеленіскен жағдайда рейстер орындалмауы мүмкін.