Облыс орталығында іскер әйелдердің форумы өтті. Бір қолымен бесік, екінші қолымен кәсіптерін тербеткен нәзік жандылар бизнесте де ерлерден қалыс қалмай, иық тіресе өз ісін дөңгелентіп келеді. Бүгінде аймақта кәсібін ашқан бизнес субъектілерінің 44 пайызы әйел адамдарға тиесілі.

Ақжайықтың іскер әйелдері арнайы форумда бас қосты. Басты мақсат-бизнесвумендердің атқарған жұмыстарын пысықтап, болашақты жоспарлау. Облыстың нәзік жандары бас қосқан жиында аймақ басшысы сөз алып, жаңа бастамаларға сәттілік тіледі.

Облыстың іскер әйелдер қауымдастығы таратқан ақпарға сүйенсек, облыста 22 мың шағын және орта бизнес өкілі тіркелген. Олардың 44 пайызы осы әйел адамдарға тиесілі. Мамандар жыл санап бизнеске келетін жандардың қарасы көбеюде,- дейді.

Былтыр іскер әйелдер қауымдастығының мұрындық болуымен облыста туризм ассоциациясы ашылды. Ассоциация ішкі туризмді дамытумен жұмыстанбақ. Биыл шеберлердің қауымдастығын құру жоспарлануда.

Теректі ауданында тіркелген кәсіпкерлердің тең жартысы нәзік жандылар. Олардың біліктігін артырып, білімін шыңдау мақсатында арнайы Подстепный ауылында іскер әйел адамдардың форумы өтті. Жиынға банк саласының, кәсіпкерлер палатасының және жас та болса өз кәсібін ашып, мемлекеттік қолдауға ие болған жандар мен жаңадан бизнес ашуды көздеген ауыл тұрғындары қатысты.

Ауылдық жерде нәзік жандыларға өз кәсібін ашуға ақпараттың аздығы қол байлайды. Аталмыш форумға келген әрбір нәзік жанды өз кәсібін ашуды армандайды. Солардың бірі -Майра Хамзина. 4 баланың анасы үйден тәтті тоқаштарды пісіргісі келеді.

Нәзік жандылардың өз кәсібін ашуға көмектесуді көздеген форум алдағы уақытта өзге де аудандарда ұйымдастырылмақ.

БҚО-да кәсіпкерлерік саласында әйелдер саны артып келе жатқаны аңғарылып отыр. Олардың көбі ақпараттық қолдау алу үшін Қазақстанның іскер әйелдері кеңесіне енуге ынталы. Айта кетейік, нәзік жандыларға гранттардан бастап салық, кеден заңдары саласында кеңес беруге дейінгі қызметтер көрсетіледі.

-"Бүгінгі күні облыста 5 мыңнан аса әйел кәсіпкер тіркелген. Олардың жартысынан астамы ғана, яғни 3 мыңдайы белсенді жұмыс жасайды. Әйелдердің белсенділігі артып, бағыттары айқын болғанын қалаймыз.

-"Біздің мақсатымыз - әйелдерге іс бастар кезде көп қателіктерге ұрынуға жол бермеу. Себебі бизнес жаңадан басталған кезде қиындыққа тап болып, зардап шегеді. Бастапқы 1-2 жылда бизнестердің 80 пайызы жабылып қалады. Оның алдын алу үшін біздің одақта шағын және орта бизнеске, стартаптарға арналған бағыт пен тәрбиелік жұмыс, әлеуметтік кәсіпкерлік, қайырымдылық қарастырылған",-дейді БҚО «Атамекен» КП жанындағы ІӘК төрайымы Жұлдыз Хуспанова.

Қызығушылықтың артуына байланысты іскер әйелдер кеңесі экономикалық мүмкіндіктердің дамуы, Қазақстандағы әлеуметтік кәсіпкерлік  және маркетинг құралдарын жеке өз ісін дамытуға қолдану тәсілдері жөнінде қатысушыларға ақпарат беретін ауқымды жиын өткізілді. Әр тілек білдіруші үйден шықпай-ақ кеңеске мүшелікке ене алады.

-"Іскер әйелдер кеңесіне ену үшін онлайн тіркелімнен өту керек. Онлайн тіркелімде сіз өзіңіздің тегіңіз бен атыңызды, әкеңіздің атын , этикалық кодекспен келісетініңізді көрсетесіз. Артынан танысып, әйелдер кеңесінің мүшесі екеніңізді растайсыз. Кеңес мүшесі болу сізге не береді? Біріншіден сізге барлық өтетін шаралар жөнінде ақпарат түсіп отырады",-дейді іскер әйелдер кеңесінің мүшесі Шолпан Утербаева.

Іскер әйелдер кеңесі белсенділерінің айтуынша, олардың басты мақсаттары-отбасыдағы, бизнестегі, қоғамдағы әйелдердің рөлін арттыру арқылы елдің жағдайын оңалту. Жыл бойы кеңеске қатысушыларға тәжірибелі мамандар шеберлік сағаттары мен түрлі тренингтер өткізеді.