Гүлге оранған Орал қайда?! Осы сұрақ қала тұрғындарын мазалап жүргелі қашан? Бұрын әдемі гүлзар, егілген тал-терек, жасыл желек Оралдың мақтанышы еді. Ал қазіргі жағдайы мүшкіл. Қураған гүлзар, күтіп ұсталмаған ағаштар көзге күйік болып тұрғандай. Оны қала тұрғындары да тілге тиек етті. Орал қаласын гүлдендіру бағытында екі мердігер компаниямен үш жылға келісім шарт жасалған. Тал-теректер мен гүлдер отырғызуға, қураған, апатты ағаштарды кесу секілді басқа да көгалдандыру жұмыстарына 830 млн. теңге бөлініпті. Оның 330 млн. теңгесі "Уланов" ШҚ тиесілі екен. Алайда жауапты мекеме қаражатты тиімді жұмсамай жатырған көрінеді. Қалалық ТҮКШ-ы атқарылған жұмыстарды сапасыз деп таныған.
Ал "Уланов" ШҚ басшысы Елена Уланованың өз уәжі бар. Айтуынша, келісішартта қосымша жұмыстарға қаражат бөлу қарастырылмаған. Гүлдерді күтіп ұстау бойынша шығындар артқан. Сол себепті шаһардың көркі болады деген гүлзардың басым бөлігі қурап кетіпті.
Жыл сайын гүлдермен безендірілген түрлі бейнелер қалаға көрік беріп тұратын. Алайда өткен жылдан бастап көшедегі гүлзарлардың түсі солғын тартып, сұрықсыз күйге ене бастады. Жауапты мекеме қатты соққан желдің салдарынан бірнеше көшедегі ескі ағаштар опырылып, сынып, құлады дейді. Отырғызылған көпжылдық гүлдер де сол кезде ұшып кеткенін алға тартады. Сонда осы жұмысқа деп бөлінген млн.дардың да желге ұшқаны ма? Ал осының салдарынан жасыл желегі жайқалған Жайық өңірінің келбеті солғын тартып барады.

Қаламыз бойынша көгалдандыру жұмыстары 5 жоспар бойынша жүзеге асады. Аталмыш жобалардың 4  «Жасұлан флора» мекемесі, ал қала көшелеріне бір жылдық және көп жылдық жасыл екпелерді отырғызу жобасын «Уланов» шаруа қожалығы ұтып алған. Жобадағы жоспарлар бойынша жасыл екпелерді отырғызу жұмыстары ағымдағы жылдың 4 мамырында басталған болатын. Бүгінде Ассамблея алаңы, Салтанат сарайы, Жайық самалы сынды жерлерге бір жылдық «шырайгүл, герань, цинерария, барқыт» және көп жылдық «роза» гүлдері отырғызылды.
Қалаға көрік беру мақсатында Мөңкеұлы тынымбағына 130 дана, Әзербайжан көшесіне 262 дана шырша егілді. Ал шаһардағы адамдар көп шоғырланатын демалыс орнының бірі Тұңғыш Президент алаңына жауапты мекеме бүгінде жұмыс жоспар бойынша орындалып жатырғанын жеткізді.
Облыс орталығындағы гүл егу жұмыстары шілде айының соңына дейін жалғасатын болады. Жалпы жоспар бойынша қаламызда 42000 жуық түп жасыл екпе егу жоспарланған.

Бүгін Орал қаласының ардагерлер кеңесі гүлдер бағын өсіруші 77 жастағы Валентина Шаринаға қонаққа барды. Зейнеткер 35 жылдан бері құртқашаш гүлдерін өсірумен айналысады екен. Ауласында ирис гүлдерінің 230 сұрыпын өсіріп отырған зейнеткердің еңбегі көпшілікті таңқалдырды.

Валентина Шаринаның гүл өсіру сүйікті ісі екен. Бұдан бөлек зейнеткер іс тігетін цехта жұмыс жасайды. 77 жасқа толса да ирис гүлдерін баптауды қиынсынбайды. Керісінше, бар сүйіспеншілігімен гүлдерін мәпелеп, шаршағанын ұмытады. Балаларымен қария Жұлдыз шағын ауданындағы жеке үйде тұрады. Бұрын Валентина Шарина Диана тігін фабрикасын басқарған. Алғашқы рет осындай бақты іс сапарда жүргенде көріп, өзі өсіруге бел байлайды.

35 жылдан бері ирис гүлдерінің құпиясын зерттеп, сұлулығына тамсанған зейнеткер қызылды, жасылды, алуан түсті гүлдерімен қонақтарын таңғалдырады. 20 соты0 алқапты бақта ирис гүлінің 230 сұрыпы өсірілген. Қалалық ардагерлер кеңесінде 10 мың жарымдай қария болса, олардың біразы бүгін Валентина Шаринаның бағында серуендеп, ауладағы асханадан дәм татты.

Ардагерлер кеңесінің мүшелері жастарына қарамастан қоғам үшін маңызды шараларға атсалысуға тырысып келеді. "Рухани жаңғыру" бағдарламасын жүзеге асыруға да олар өз үлестерін қосып бағуда.