Қазақстан мен Германия арасындағы сауда-экономика қарым қатынасқа тоқталсақ. Неміс жұртшылығы Қазақстанның ең ірі 10 сауда серіктесінің қатарына еніп отыр. Өткен жылы екі елдің тауар айналымы 1,5 есеге өсіп, 4 млрд долларға жуықтады. Оның 742,3 млн доллары Қазақстан экспортына тиесілі болса, қалған басым бөлігі яғни 3,1 млрд доллары Германиядан келген импортты құрайды. Ал биыл бұл көрсеткіш оң динамика беріп, соңғы жеті айда өзара сауда-саттық көлемі 2,3 млрд доллардан асты. 2005 жылдан бері Германиядан шамамен 6,7 миллиард доллар көлемінде тікелей инвестиция тартылған. Бұл қаржының 90 пайызы шикізаттық емес секторға құйылды. Бүгінде Қазақстанда мыңнан астам неміс компаниясы жұмыс істеп жатыр.
Ақордада өткен кездесуде Қазақстан Президенті Қасым-Жомарт Тоқаев пен Германия канцлері Олаф Шольц екіжақты қарым-қатынасты одан ары нығайту, сауда-экономика, инвестиция салаларындағы ықпалдастықты тереңдету мәселелерін талқылады. Қазақ басшысы Қазақстан мен Германия арасында өзара сенім бар, берік достық қатынас орнағанын айта келе, геосаяси ахуалға да тоқталды

Өз кезегінде Германия канцлері Қазақстанға тікелей инвестиция салу және сауда айналымының көлемін арттыру мәселесін сөз етті.

ОЛАФ ШОЛЬЦ – ГЕРМАНИЯНЫҢ ФЕДЕРАЛДЫҚ КАНЦЛЕРІ «Сіздің елге тікелей инвестиция салу және сауда айналымының көлемін арттыру үшін экономикалық байланыстарымызды жақсартуға барлық жағдайды жасаймыз. Әрине, экономикалық ынтымақтастықты барлық салада дамытқымыз келеді. Энергетика саласындағы серіктестігіміз алға жылжып келе жатқанына ризамыз. Екі ел арасында сенімді әрі жүйелі ынтымақтастық орнаған. Бұл – бүкіл әлемге жақсы үлгі. Сондай-ақ біздің алдымызда тұрған халықаралық сын-қатерлер төңірегінде жан-жақты пікір алмасқанымызға қуаныштымыз»

Одан әрі екі ел басшылары өзара тиімді сауда-экономикалық ынтымақтастықты арттыруға, әсіресе, энергетика, «жасыл» трансформация, тау-кен өнеркәсібі, көлік-логистика, климатты қорғау, экология және ауыл шаруашылығы салаларындағы ықпалдастықты күшейтуге келісті. Қазақ-герман мәдени-гуманитарлық байланыстарын нығайту перспективасы қарастырылды. Ақордадағы кездесуде
Қасым-Жомарт Тоқаев пен Олаф Шольц Қазақстан мен Германия арасындағы ынтымақтастық туралы Бірлескен декларацияны қабылдады. Кездесу қортындысы бойынша, банктер арасындағы, білім саласындағы бірқатар құжаттарға қол қойылды.