Қазақстанда ақбөкендердің популияциясы көбейіп жатыр. Бүгінде киіктердің саны 1млн 300 мыңнан асып отыр дейді экология министрлігінің өкілдері. Әзірге министрлікте ақбөкендердің санын азайтуға қатысты нақты шешім жоқ. Ал онсыз да саны артып жатқан дала еркесін пастереллез індетінен қорғау үшін бір бөлігін арнайы оқшаулау орнында ұстап, ғылыми-зерттеу жұмыстарын жүргізуді көздеп отыр. Ал кейбір ғалымдар саны артып жатқан киіктің етін ет комбинатына тапсырып, өнімін экспорттауды ұсынды. Осылайша миллиондаған табыс табуға болады дейді ғалымдар. Бүгін Орман шаруашылығы және жануарлар әлемі комитетінде ақбөкендер мәселесі талқыланған еді.

Қазақстанда киіктердің саны 1 миллион 318 мың басты құрап отыр. Ақбөкендер Батыс Қазақстан, Ақтөбе, Қарағанды, Ақмола және Қостанай облыстарын мекендейді. Былтыр батыс өңірінде киік саны тым артып, егін алқабына шығып кетіп шаруаларды әбігерге түсіргенді. Тіпті шаруалардың шағымынан соң экология министрлігі 80 мың киікті азайту туралы ұсынысты қарастырған болатын. Яғни киікті атуға рұқсат бермек болды. Бірақ Президенттің сынынан соң министрлік бұл бастамасынан бас тартты. Енді бүгін осы министрлікке қарасты жануаралар әлемін қорғайтын комитет киелі киіктерді сақтап қалу жолдарын қарастырып жатыр. Ол үшін еліміздегі ғылыми зерттеу мекемелері алдағы көктемде 1815 құралайды енесін айырып алып, зерттеуге алмақ. Киіктің лақтары арнайы оқшаулау орнында ұсталатын болады. Батыс Қазақстан облысында 20 гектарға жуық аймақта осындай орын қарастылады.

Киіктерді оқшаулап ұстап, зерттеуге үш жылға 750 млн теңге қаражат бөлінбек. Зерттеу жұмыстары жоғарыда аталған киіктер мекендейтін аймақтарда жүргізіледі. 20 жылдан астам уақыт киіктерді зерттеп жүрген ғалымдар, ақбөкендердің популияциясының көбеюінен қазынаға қаржы түсіру жолдарын қарастыруға болады дейді. Ғалымдар киіктердің белгілі бір бөлігінің етін ет комбинатына өткізіп, оның өнімін экспортқа шығарып қарық болуға болады деп отыр.

Нұрышев тіпті, дала еркесі көп мекендейтін ел ретінде киіктерді тереңдетіп зерттесек, Қазақстаннан бірнеше Нобель сыйлығының лауреаты шығуы мүмкін деген болжамын да алға тартты.