Бүгін соңғы қоңырау-оқу жылының соңғы күні. Облыс орталығындағы С. Сейфуллин атындағы дарынды балаларға арналған №11 облыстық мамандандырылған мектеп-интернатында соңғы қоңырау салтанатты іс-шарасы өтті. Оған облыс әкімі Ғали Есқалиев қатысып, жас түлектерге сәт сапар тіледі.Салтанатты жиын 11 жыл бойы білім алып, республикалық, халықаралық білім додаларының жеңімпаздары атанған мектеп түлектерін құрметтеп қарсы алумен басталды. Соңғы қоңырау салтанатына арнайы келген облыс әкімі Ғали Есқалиев 25 мамыр есте қалатын ерекше күндердің бірі екендігін атап өтті.Бір қызығы, 69 түлектің осы қалайы жоқ, бәрі де білім, өнер байқауларында жетістікке жетіп, жеңімпаз атанып үлгергендер екен. Қоңырау үнін сағынып келген Сәкен мектебінің 2002 жылғы түлектері білім ордасы ұжымына шынайы алғыс білдіріп, 1 000 000 теңгенің сертификатын табыстады. Ұстаздар мен шәкірттерді мерекемен құттықтаған ардагер мұғалім Ерсайын Сапаров мектепте жабылып қалған бастауыш сыныптарды қайта ашу қажеттігін облыс әкімінің назарына ұсынды. Салтанатты іс-шарада жыл бойы жоғары жетістікке қол жеткізген ұстаздар мен шәкірттер алғыс хаттармен, арнайы сыйлықтармен марапатталды. Ал балаларын білім нәрімен сусындатқан ұстаздарға ата-аналардың айтар алғысы шексіз.

Оралда қала әкімі Абат Шыныбековтың қатысуымен метан жанар жағар май станциясы ашылды. Станция Деркөл кентінде орналасқан. Қала әкімінің айтуы бойынша, бұл өзге жанар-жағармайлардың орнын алмастырып, халық қолданысына тиімді болмақ. Еуро-5 халықаралық стандартына сай келетін метан газы 83 градус салқындықта қатпайды.Оралда ерекше газ құю станциясы өз жұмысын бастады. Құбыр арқылы келіп жатқан табиғи газ тазартылып, көліктерге құйылады. Жоспар бойынша газ бекеті үздіксіз, демалыссыз жұмыс жасайдф. Әрі шикізат тапшылығы болмайды. Артықшылығы - экологиялық таза, көліктерден зиянды газ бөлінбейді. Әрі қоғамдық көліктердегі жолақы бағасын тұрақты ұстап тұруға септігін тигізеді. Осыған дейін БҚО әкімі Ғали Есқалиев өңірімізде метан жанар жағар май станциясы қызметін бастайтынын мәлімдген болатын. Онда сұйытылған газды қолдану экологиялық және экономикалық жағынан да тиімді болатынын атап өтті. Метан кептіріліп, тазартылып, сығымдалады. Айта кетейік, көліктер мен жолаушы тасымалдаушы автобустарға метанмен жүру үшін арнайы қондырғы қажет. Ал жергілікті әкімдік автопарктердегі қоғамдық көліктерді метан газына ауыстыру жұмысын бастайтын болады.Жоспар бойынша автобустар мен коммуналдық мекеме көліктері метан газымен жүреді. Ал станция күніне жүздеген көлікке қызмет көрсете алады.Сұйытылған газды алдағы уақытта қаламыздың барлық тұрғындары қолдана алады. Жыл соңына дейін тағы да осындай жанар-жағармай бекеті іске қосылады деп жоспарланып отыр. Өңірімізде өнеркәсіптік өндіріс пен автокөліктер санының артуы салдарынан қоршаған ортаның ластануы байқалып отыр. Ал бұл бастама мемлекет басшысыныӊ Қазақстан аумағында "Батыс Еуропа - Батыс Қытай" трансконтиненталдық автобан бағытында толық инфрақұрылым құру туралы тапсырмасына да сәйкес келеді.

Өткен жылдың ІІІ тоқсанының қорытындысы бойынша ауыл шаруашылығы саласындағы еңбек өнімділігі 1 адамға шаққанда 1 млн 845,1 мың теңгені құрады. Қайта өңделген ауыл шаруашылығы өнімін экспорттау көлемі 46 млн АҚШ долларынан асты. Бұл 2017 жылғы көрсеткіштен үш еседей артық. Облыстық мәслихаттың кезекті 9-сессиясында еліміздегі агроөнеркәсіптік кешенді дамыту бойынша 2017-2021 жылдарға арналған мемлекеттік бағдарламаның іске асырылуы туралы есеп тыңдалды. Сондай-ақ депутаттар мәслихат жанындағы тұрақты комиссиялардың жұмысын талқылады.Өңірде агроөнеркәсіп саласы бойынша жұмысын бастаған мемлекеттік бағдарламаларға бюджеттен 76,7 млрд. теңге бөлінген. Статистикалық мәліметтер бойынша агроөнеркәсіптік кешеннің негізгі капиталына тартылған инвестиция 88,3 млрд. теңгені құрайды. Бағдарламаны іске асыруда өңірде ауыл шаруашылығы саласы бойынша шұғылданушылар саны артқан. Отырыста саланың түрлі бағыты бойынша тартылған инвестициялар сомасы бойынша есеп тыңдалып, бір ауыздан қабылданды. Облыс әкімі Ғали Есқалиев салада атқарылған жұмыстар қашан да басты назарда болатынын айтып, мемлекеттен қолдау жүйелі түрде жүргізілетініне тоқталды. Сонымен қатар облыстық мәслихат жанындағы тұрақты комисиия мүшелері өткен жылы орындалған жұмыстарға есеп берді. Олар есептік кезеңде 41 отырыс ұйымдастырып, онда 100-ге жуық мәселе талқыға салынған. Сессия отырысында барлық баяндама қаперге алынды. Сондай-ақ депутаттық корпус бірқатар көтерілген мәселелерге өзгерістер енгізді. Кеңес соңында облыс әкімі Ғали Нәжімиденұлы бюджет қаражатын оңтайлы жұмсау үшін облыс халқы мен депутаттарды ұсыныс пікір білдіруге шақырды.

Бүгін қаламызда «Жайық Қолөнер» орталығы ашылды. Орталықтың мақсаты - ежелден үзілмей, ел ішінде сақталып келе жатырған қолөнер дәстүрін халық ішінде кеңінен насихаттау және осы кәсіпті қызметке айналдырғандарды бір арнаға тоғыстыру. Өңірдегі кәсіпкер әйелдер өткен жылдың күзінде БҚО әкімі Ғали Есқалиевтың қабылдауында болып, шеберлерге арналған орталық қажет екенін тілге тиек еткен еді. Ата-баба дәстүрін дамыту және ұрпақ бойына ұлттық құндылықты сіңіруге мұрындық болар «Жайық Қолөнер» орталығының ашылу салтанатына облыс әкімі Ғали Есқалиев қатысып, он саусағынан өнер тамғандардың қызметіне сәттілік тіледі.40 орынға жоспарланған бұл орталықтың әзірге тек 20 орны жасақталған. Көрме үстелдеріне көздің жауын алар зергерлік әшекей, тері, ағаш, тоқыма және матадан жасалған күнделікті тұрмыста қолданытын, сұраныстағы бұйымдар қойылған. Алдағы уақытта олардың қатары әлі де толықтырылады,- дейді шеберлер.Айта кеткен жөн, орталықтағы әр орынның жалға алу құны 1000, 1500 теңге аралығында. Бұл мемлекет тарапынан шағын және орта бизнесті қолдаудың тимді тетігі. Қолөнер орталығы арқылы қазақ халқының мәдениеті мен тарихы насихатталып қоймай, жұмыс орындары ашылып отыр. Алдағы уақытта бұл жерде оқыту курстары да ұйымдастырылуы мүмкін.

Биыл өңірде кем дегенде 15 мектептің құрылысы басталуы тиіс. Бұл туралы бүгін облыс әкімі Ғали Есқалиев аппараттық кеңесте мәлімдеді.Аймақта биылғы жылы 15 орта мектеп құрылысы аяқталуы тиіс. Өйткені бұл салаға бөлінген қаражат жеткілікті. Жоба бойынша барлық қажетті шаралар орындалған. Осылай деген аймақ басшысы Ғали Нәжмиденұлы басталған құрылыс жұмыстарының сапалы аяқталуына баса мән беру қажеттігін айтты. Кем дегенде бір құрылыс нысаны қолданысқа берілген соң халыққа 30 жылдан аса уақыт қызмет көрсетуі тиіс. Аппараттық кеңесте көтерілген тағы бір мәселе - азық-түлік қауіпсіздігін қамтамасыз ету жәйі. Облыс әкімі атап өткендей көктемгі егіс науқанына дайындық шаралары бірінші сәуірге дейін толықтай аяқталуы тиіс. Оған қоса шаруаларға мемлекеттен берілетін жанар-жағармайды тасымалдаушы компания қажет жерге дейін жеткізуі керек. Биыл облыс бойынша ауыл шаруашылығы дақылдарының егіс алқабы - 521 мың га құрайды деп жоспарланып отыр. Атап айтқанда дәнді-дақылдар 126 мың га болады деп күтілсе, оның ішінде күнбағысты 55 мың га дейін жеткізу жоспарлануда. Картоп 4020 га және көкөніс, бақша дақылдарын - 4885 га алқапқа егу жоспарда. Одан әрі 109 Call-орталығының жұмысы туралы мағұламат берілді. Ikomek қызметінің директоры Рақымғұл Айтмағамбетовтың айтуынша, бір жылда Call-орталығына хабарласқандар саны 150 мыңға жақындаған. Мәселен, өткен жылы түскен қоңыраулардың дені коронавирус инфекциясымен байланысты болыпты.Естеріңізге сала кетеміз, Ikomek қызметі арқылы коммуналдық мекемелердің байланыс қызметтері бір жерге тоғыстырылған. Мамандар тәулігіне 24 сағат, аптасына 7 күн шағымдарды қарастырып, әр істің атқарылуын қадағалайды.

БҚО-да 1200 шақырым жол салынды. Тәуелсіздік жылдарында бұдан бөлек 2 мың шақырымнан астам жол жөңделіп, 6 көпір жабдықталған. Бұл туралы Орталық коммуникациялар қызметі алаңында өткен брифингте аймақ басшысы Ғали Есқалиев мәлім етті.

Казталов-Жәнібек-Бөкейордасы аудандары автожолын жөндеу жұмыстарында кідіріс бар. Өңір басшысы Ғали Есқалиевтың мәліметінше, негізгі себеп - қазіргі таңдағы экономикалық дағдарыс пен құрылыс материалдарының күрт қымбаттауы. Бүгінде қалған екі аудан орталығына жол салу жұмыстары жүргізілуде. Құрылыс жұмыстары ауа райының қолайсыз болуынан кешігіп басталған. Яғни жоспарлы жұмыстар межеден кеш аяқталмақ. Аймақ басшысы Ғ.Есқалиев келтірген деректерге сүйенсек, осы жылы өңірде 324 шақырым жол жөңдеуден өткен. Үкіметтің қолдауымен «Атырау-Орал» жолын кеңейтуге және Орал қаласының айналма жолы құрылысына қаражат бөлініп, жобалық-сметалық құжаттамалары дайындалуда. Көлік инфрақұрылымына келер болсақ, облыс орталығында жеке инвестициялар есебінен автобекет қайта жаңғыртылған. Жуырда халықаралық әуежайды қайта жабдықтау жұмысы аяқталатын болады. Өздеріңізге белгілі аумақ халқының негізгі күнкөріс көзі -ата кәсіп мал шаруашылығымен тығыз байланысты. Өңір экономикасы мен ауыл шаруашылығының одан әрі дамуы суға тәуелді болып отыр. Биыл Үкіметтің қолдауы арқасында өңірдің оңтүстік-батыс аудандары үшін Ресейден жеткізілетін су көлемі 2019 жылғыдан 2 есеге көбейді. Ұзындығы 185,6 шақырымды құрайтын 3 магистраль каналды қайта жаңғырту жұмыстары басталды. Бұл Жайық өзенінің сол жақ жағалауында 350 мың гектарға дейін жайылымды ауыл шаруашылығы айналымын енгізуге мүмкіндік береді. Бүгінде 65 млн текше метрге Киров су қоймасын қайта жаңғырту жұмыстарын басталды. Сондай-ақ 40 млн текше метрге тағы 2 су қоймасын салуға жобалар дайындалуда. Осы жылы 6 мың гектарға дейін суармалы жүйе енгізіп, 2026 жылға дейін бұл көрсеткішті 50 мың гектарға дейін жеткіземіз»,- деді өңір басшысы.

Тәуелсіздіктің 30 жылдығына орай Орал қаласындағы «Жекпе-жек» спорт кешенінде 23-25 қараша күндері каратэ шито-рюден балалар, жасөспірімдер, жастар және ересектер арасында Қазақстан чемпионаты алауын жақты.Айтулы жарысқа Нұр-Сұлтан, Алматы, Шымкент қалалары мен 14 облыстың командалары қатысуда. Каратэ - кең тараған олимпиадалық жекпе-жек түрлерінің бірі. Өздеріңізге белгілі биылғы өткен Токио олимпиадасына қатысқан ел командасы жаман нәтижие көрсеткен жоқ. Яғни, елмізде қарқынды дамып келе жатқан спорт түрі деп атуға әбден болады. Чемпионаттың ашылу салтанатына қатысқан өңір басшысы спортшыларға сәтітілік тіледі.Каратэмен облыста 3 мыңға жуық спортшы айналысады. Оларды 24 жаттықтырушы-оқытушы баптап келеді. «Ел намысын абыроймен қорғап жүрген спортшылар жеткілікті. Бұл жолы Қазақстан чемпионатында Батыс Қазақстан облысынан 87 спортшы бақ сынауда. Боз кілемге алғашқылардың бірі болып шыққан жерлесіміз Ринат Мерғалиевтың шәкірті Темралиев Дархан маңғыстауық қарсыласынан басым түсіп, финалға жолдама алды. Оралда жалауын көтерген чемпионатқа 600-дей спортшы қатысуда. Олардың дені шаһарымызға алғаш рет аяқ басқандарын айтады.Чемпионат 25 қарашада мәресіне жетеді.

Тәж тажал індеті әсіресе, қарияларға қатер төндіріп тұр. Облыста коронавирус кесірінен қаза тапқандардың 84%-ы егде адамдар. Бұл туралы денсаулық сақтау басқармасы басшысының міндетін атқарушы Арман Қалибеков облыс әкімі Ғали Есқалиевтың төрағалығымен өткен жедел штаб отырысында мәлім етті.Облыс бойынша вакцина алғандардың 13%-ы жасы алпыстан асқандардың үлесінде. Нақтылап айтқанда, осы санаттағы 92 021 адамның 31%-ы ғана екпе алыпты. Медициналық бригадалар көмегімен 5 мыңға жуық қария вакцинаны үйде қабылдаған. Бірақ карантиндік шектеулер жеңілдегелі көпшілік шоғырланған жерлерде санитарлық талапқа салғырт қарау күшейіп келеді. Облыстық санитариялық-эпидемиологиялық бақылау департаменті басшысының міндетін атқарушы Нұрлыбек Мұстаев мониторинг топтары қоғамдық тамақтану орындары мен сауда үйлеріндегі тәртіпті қадағалауға ден қоюы керектігін атап өтті.Облыстық кәсіпкерлер палатасының директоры Нұржан Мақсотовтың мәліметіне сүйенсек, өңірде 4 173 объекті «Ashuq» мобильдік қосымшасымен жұмыс істеуде. Биылғы 26 сәуірден бері «қызыл» мәртебемен жүрген 1196, «сары» дәрежедегі 770 адам «Ashuq» сүзгісіне тұтылған. Әсіресе, Орал қаласы мен Бөрлі және Бәйтерек аудандарында карантиндік шектеуге көз жұма қарайтындар көп.

Бүгін Оралда «Kodokan Spirit» дзюдо орталығы жұмысына кірісті. Спорттық нысанның салтанатты ашылу рәсіміне облыс әкімі Ғали Есқалиев қатысты. Дзюдо орталығы жекеншік серіктестік аясында салынған.Кәсіпкер спорттық нысан құрылысына 250 млн. теңге жұмсаған. Енді кәсіби тұрғыда дзюдомен айналысушылар саны артқанын сеніммен айтқан облыс әкімі Ғали Есқалиев көп функционалды спорттық нысанның жұмысына сәттілік тіледі.Дзюдо күресі олимпиадалық ойындар тізіміне енгендіктен бүгінде осы спорт түріне басым бағыт берілуде. Ал мұндай кәсіби орталық еліміздің аумағында саусақпен санарлық. Облыста аталмыш спортқа жалпы саны 300- ден аса адам ден қойыпты. Ғимарат кореялық жоба бойынша бой көтерген. Көп функционалды спорттық кешен болғандықтан мұнда 20-ға жуық үйірме жұмыс жасайтын болады.Спорт сабақтары ақылы түрде де өткізілмек. Жаңа кешен 30-ға жуық адамды жұмыспен қамтып отыр.

Облысқа білім беру мекемелерін салуға инвесторлар тарту қажет. Бұл туралы облыс әкімі Ғали Есқалиев мәлімдеді. Өңір басшысының айтуынша өзге аймақтарда 26- 27 мектеп кәсіпкерлер есебінен бой көтерсе, біздің өңірде не бары екі білім беру ошағы инвестор қаражатына тұрғызылуда.Бүгінгі күні облыста бюджет есебінен сегіз және екі жеке мектептің құрылысы жүргізілуде. Әкімдікте атап өткендей, іс-жүзінде бизнесмендер есебінен білім ошақтарын салу тиімділігін көрсетіп келеді. Инвесторлардың бастапқы кезде жоба сомасының тек 10 пайыз шығынын төлей отырып, құрылысты бастауға мүмкіндігі бар. Қалған 90 пайыз қаражатты екінші деңгейді банктер арқылы төменгі пайызбен несие алу арқылы қолға алады. Облыстық білім басқармасының басшысы Айгүл Мыңбаеваның мәліметінше бүгінде Сырым ауданына жаңа мектеп қажет. Ал облыс әкімінің айтуынша, инвесторлар шығынын мемлекет уақыт өте келе толықтай өтеп береді. Кәсіпкер мектеп құрылысын қолға алған жағдайда оның интернатына мемлекет қаражат бөлуге қауқарлы. Қажет жағдайда мұғалімдер мен қызметкерлерді жұмылдыру бойынша да тиісті жұмыстар жүргізіледі. Тек осы істе инвесторлар тартуда қажетті жұмыстар атқарылуы тиіс.  Құрылыс басқармасының мәліметінше, облыста тұрғызылып жатырған білім ошақтары уақытында тапсырылады. Бүгінгі күні бұл орайда ешқандай мәселе жоқ. Солардың бірі- Оралдағы №33 ЖББОМ. Нысанның құрылысы көп ұзамай аяқталып, жаңа оқу жылында 300 орындық жаңа мектеп пайдалануға беріледі деп жоспарлынып отыр.