Елбасы биылғы Қазақстан халқына жолдауында келесі 2019 жылды "Жастар жылы" деп атауды ұсынған болатын. Бұл ұсыныс қазақстандықтардың көңілінен шығып отыр. Осыған орай, Елбасының биылғы жолдауын түсіндіру, облыс тұрғындарымен пікір алмасу мақсатында Ақ жайық өңіріне  шенділер, депутаттар мен түрлі министрлер арнайы келіп жатыр. Жақында ғана құрылған қоғамдық даму министрлігінің жастар және отбасы комитетінің басшысы Дариян ауылының жастарымен кездесті. Ауыл жастарымен болған кездесу жайлы толығырақ, арна тілшісі тарқатып берсін.

Елбасы жастарға ерекше көңіл бөліп, әрдайым оларды қолдау үшін жаңа реформаларды қабылдап, жастардың дамуы үшін ерекше жағдай жасап отырады. Жастардың мәселесіне ел президенті биылғы жолдауында да ерекше көңіл бөліп, келесі 2019 жылы жастар жылы деп жариялауға ұсыныс білдірген еді.

Ел ертеңі жастардың 43 пайызы ауылдық жерде өмір сүреді. Жастарды қандай мәселе толғандырады, ауылдық жерде жастардың дамуы үшін тағы қандай жұмыстар атқарылуы керектігін білмек мақсатта Дариян ауылына арнайы жастар және отбасы комитетінің басшысы табан тіреді. Ол жұмыс сапары барысында биылғы жылы ашылған "Шабыт" жастар коворкинг орталығының жұмысымен танысқан болатын.

Жастар үшін маңызды мәселенің бірі қолжетімді спорт нысандары екені белгілі. Комитет басшысымен кездескен Дарияндық жастар пікірлерін ортаға салды. Түрлі кәсіпті меңгерген жастар өскелең ұрпақ үшін футбол алаңдарын әрбір ауылға салып беруді сұрады.

Елбасы биылғы жылғы жолдауында мектепке дейінгі білім беру жүйесіне байланысты нақты тапсырма жүктеген еді. Бүлдіршіндерді балабақшамен қамтамасыз ету үшін Зеленов ауданында 51 мектепке дейінгі балабақша қызмет жасап жатыр. Олардың төртеуі жекеменшік. Бүгінгі таңда аудан көлемінде бүлдіршіндерді балабақшамен қамту көрсеткіші 68,5 пайызды құрап отыр. Білім беру саласында атқарылып жатқан жұмыстардың баршасын аудан әкімі актив жиналысында баяндаған болатын.

Елбасының жолдауында кәсіпкерлерді қолдау мен оларға жағдай жасау бағыты ерекше айтылды. Жиында сөз алған аудан кәсіпкерлері мемлекеттің қолдауын сезініп жатқандығын, бизнес субьектілері олар үшін жасалынып жатқан қолайлы жағдайларды жіпке тізіп, жаңа жолдаудың тиімді тұстарын атап өткен еді.

Биылғы жылы Елбасының жолдауында мектеп туризмін дамытуға көңіл бөлініп, арнайы тапсырма жүктелген еді. Облыс көлемінде оқушылар арасында туризмді дамытуға арналған арнайы орталық жұмыстанып жатыр. Ондай орталықтың бірі Зеленов ауданында бар. Елбасы жолдауын талқылауға арналған жиында баланың бойына Отанға деген сүйіспеншілікті дарытатын мұғалімдер бірнеше мәселенің бар екендігін айтып, аудан әкіміне баяндаған болатын. Ұстаздарды көп жылдан бері қолданылып келе жатқан палаткалардың жай-күйі мен қажетті құрал-жабдықтардың жоқтығы алаңдатып отыр. Аудан әкімі педагогтардың уәжін тыңдап, Елбасы жүктеген міндеттерді шешуге уәде берді.

"7-20-25" бағдарламасының аясында өңірімізде 3000 отбасы жаңа қонысқа ие болмақ. Бұл туралы облыс әкімі актив жиналысында мәлімдеді. Жиналыс барысында Елбасының бесінші қазанда жүктеген жаңа жолдауы талқыланған еді. Елбасының жолдауы Ақ жайық өлкесінде қалай жүзеге асады?

Елбасы қазанның бесінші жұлдызында қазақстандықтарға жаңа жолдауды жүктеген еді. Бұл жолдау азаматтардың арасында үлкен қолдауға ие болып отыр. Ел президенті тоқталған ең маңызды мәселе ол азаматтарды қолжетімді баспанамен қамтамасыз ету. Елбасы жүктеген тапсырманы орындау барысында 3000 батысқазақстандық "7-20-25" бағдарламасының аясында жаңа қонысқа қол жеткізбек. Бұл жұмыстар биылғы жылы және келер жылы өз жалғасын таппақ. Биылғы жылы облыс орталығында жаңадан салынған көп қабатты тұрғын үй осы бағдарлама арқылы пайдалануға берілген болатын.

Елбасы биылғы жолдауында ұстаздардың мәртебесі туралы заң жобасын қабылдауға үкіметке тапсырма жүктеген еді. Президенттің өзі мұғалімдер қағазбастылықтан айырылып, балаға сабақ беруі тиіс деп ұстаздардың сабаққа дайындалуына ешкімнің кедергі болмауын қадап айтқан болатын. Облыс активінде оралдық ұстаздардың атынан сөйлеген Тамара Рудич есімді педагог өңіріміздегі білім беру саласында атқарылып жатқан жұмыстарды ортаға салды.

"Қазақстандықтардың әл-ауқатының өсуі. Табыс пен тұрмыс саласын арттыру" атты жолдауда инфраструктураның дамуына ерекше көңіл бөлінген еді. Елбасы өзінің тапсырмасында жолдардың жөнделуі де назардан тыс қалдырмады. Облыс әкімі президент тапсырмасына сәйкес, Орал -Тасқала-Ресейді жалғайтын тас жолдың құрылысы аяқталып келе жатқандығымен келер жылы Бөкей Орда, Қазталов пен Жәнібек аудандарына баратын тас жолдың құрылысы келер жылы басталатынын айтып берді.

Облыс активі Елбасының биылғы жолдауын талқылады. Жиында сөз алған азаматтар Нұрсұлтан Әбішұлының жолдауында айтылған мәселелердің маңыздылығын атап өтіп, өңіріміздіе атқарылып жатқан жұмыстарды жіпке тізген еді.  Елбасының алға қойған мақстары туралы толығырақ жаңалықтар топтамасынан көре аласыздар.