БҚО-да 4 отбасы теріс діннің ықпалынан шыға алмай, аяғында жауапкершілікке тартылып отыр. Бұл отбасылардың ішінде қырғын шайқас жүріп жатқан Сирия секілді елге кетіп бара жатқан жерінен шекарадан ұсталғандары бар, тіпті шекараны кесіп өтіп Сирияға барып келген отбасылар да бар. Теологтар мен имамдардың, құқық қорғаушылардың бірлескен жұмыстарының нәтижесінде осы төрт отбасының үшеуі дәстүрлі дінге оралған. Ал, бір отбасы жазасын темір тордың ар жағында өтеуде.

Биылғы жылы өңірімізде шетелдік 5 МИССИОНЕ́Р жұмыс жасап жатыр. Бұл туралы дін істері басқармасының мамандары мәлімдеп отыр. Шетелдік азаматтар Украина, Польша, Араб пен Мысыр елінен келген.

Сала мамандары облыс көлемінде 3 ауданда діни ахуал қиын дегенді айтып берді. Сондай-ақ, Зеленов, Жаңақала мен Бөкей Орда аудандарында жоғарғы оқуды аяқтаған маман жоқ. Білікті кадрдың тапшылығын жою мақсатында көптеген жұмыстар атқарылып жатыр. Биылғы жылдың өзінде 25  батыс қазақстандық студент "Нұр мүбәрак" университетінде білім алуда.

Қазіргі таңда облыс көлемінде 9 конфессия мен 78 діни субьекті жұмыстанып жатыр.

Қоғамда әйел адамдардың бетін тұмшалауы мен ер адамдардың сақал өсіруі жиі сынға ілігіп жататыны жасырын емес. Аталмыш мәселені заңды тұрғыда реттеу үшін еліміздің парламенті арнайы заң жобасын қарастырып жатыр. Жаңа заң жобасына сәйкес әйел адамға бет әлпетін тұмшалауға болмайды. Егер азаматша заң талаптарын бұзған жағдайда оған қатысты бірінші рет ескерту жасалады. Кейін, бұл қылығын тағы бір қайталаса әкімшілік жауапкершілікке тартылады. Сала мамандары бұл заң жобасы бірінші кезекте қауіпсіздік үшін қажет,-дейді.

Жаңа заң талаптарына сәйкес шетелде діни білім алғысы келетін жандар, ең алдымен еліміздің діни оқу орындарынында білім алуы керек деген ереже қабылдануы мүмкін.

Қазіргі таңда дін саласындағы ең өзекті мәселе азаматтардың радикал топтардың құрамына енуі екендігі сөзсіз. Сала мамандарының зерттеуі бойынша радикал топтардың құрамына енуге діни сауатсыздық себеп болады.

Дін саласындағы өзекті мәселелердің бірі ол кадр дайындау мәселесі болып тұр. Мәселен, 2017 жылы дін істер басқармасы мен Қазақстан мұсылмандары діни басқармасы бірлесе отырып, 30 жас түлекті Алматыда бой түзеген "Нұр-Мубарак"университетіне түсу үшін арнайы дайындапты. Алайда, қазіргі таңда аталған түлектердің тек 17-сі ғана осы оқу орынында білім алып жатыр. 11 баланың ата-анасы бауыр еті баласының радикал топтарының құрамына тап болуы мүмкін деген үреймен Алматыға оқуға жібермей қалыпты. Қазіргі таңда, 10 азамат "Нұр-Мубарақ" университетін бітіріп, өңірмізде қызмет жасап жатыр. Сондай-ақ, Мысырдағы Ислам мәдениеті университетінде өңіріміздің 40 студенті білімдерін шыңдап жатыр.