Парламент мәжілісінің депутаты Дания Еспаева белгілі кәсіпкер Біржан Қожақовтың шеберханасында болды. Депутат бизнес субъектісінің жасаған қолөнер бұйымдарымен танысып, қызметкерге 5-ші маусымда болатын референдум жөнінде түсіндіру жұмысын жүргізді.

Аймаққа жұмыс сапарымен келген депутат Дания Еспаева "Ғибадат" шеберханасының жұмысымен танысты. Жұмысшылармен жүздескен халық қалаулысы 5-ші маусымда өтетін референдум туралы айтып, азаматтардың сұрақтарына жауап берді. Маусымда өтетін рефендумда Ата Заңның 33 бабына 56 өзгеріс енбек. Өзгерістердің бірі депутаттарға қатысты. Мәжіліс депутаттарының 70 пайызын партиядан ұсынса, қалған 30 пайызын азаматтар дауыс беру арқылы таңдайды. Дауыс беру арқылы бұқара халық аудан мен қалалық мәслихат депутаттарын сайлайды. Ал, облыстық мәслихаттың депутаттарының тең жартысын саяси партиялар таңдаса, жартысы халықтың даусымен анықталмақ.

Өңірге жұмыс сапарымен келген мәжілісмен ұлттық нақышта жиһаз жасап, өзге өндіріс ошақтарымен тең жұмыс істеп келе жатқан кәсіпорынның жағдайымен танысты. Кәсіпкердің қарамағында 17 адам нәпақасын тауып отыр. Олардың көбі- мүмкіндігі шектеулі жандар. Он екі мүшесі сау кәсіпкерлермен иық тіресе жұмыс жасап жүрген Біржан Қожақов кәсібін дөңгелентуге кедергі жасап жүрген проблемаларын айтып берді.

Кәсіпкердің мұң-мұқтажын тыңдаған депутат сал ауруымен ауратын балаларға арналған құрылғыға назар аударып, сырқат бөбектердің саулығын дұрыстауға септігін тигізетін құрылғыларды сатып алу мәселесін мемлекет көтеру керектігін айтты.

Ата Заңға өзгеріс - "Жаңа Қазақстанды" құруға, яғни болашақ үшін қажет! ҚР Президенті Қасым-Жомарт Тоқаев 5 маусымда республикалық референдум өткізу туралы Жарлыққа қол қойды. Референдумға сәйкес ҚР Конституциясының 33 бабына 56 өзгеріс енгізілмек. Қазір аталмыш мәселе бойынша халық арасында түсіндіру жұмыстары басталды. Осы мақсатта облысқа ҚР Парламент Мәжілісі депутаттары Ерлан Барлыбаев пен Дания Еспаева келді. Студент жастармен кездесіп, ата заңға енгізілуі қажет өзгерістерді айтып өтті.

ҚР Парламент Мәжілісі депутаттарының өңірдегі іс-сапары 90 жылдық тарихы бар білім ордасында басталды. Халық қалаулылары Махамбет Өтемісов атындағы БҚУ оқытушылары және студенттерімен кездесті. Сөз алған Ерлан Барлыбаев пен Дания Еспаева конституцияға түзетулер енгізу бойынша 5 маусымда өтетін референдум жайына тоқталып өтті. Айтуларынша, жалпы алғанда 33 бапқа 56 толықтыру енгізу жоспарланып отыр екен. Жиын барысындағы қызу талқылаулар кезінде студент жастардың референдумды қолдайтындығы анық байқалды.
"Ақжол" партиясы атынан сайланған ҚР Парламент Мәжілісі депутаттарының негізгі мақсаты- конституцияға енгізілетін өзгерістер мен толықтыруларды халыққа түсіндіру. Түзетулерді еліміздің барлық азаматтарына жеткізу. Олардың ұсыныстарымен танысып, референдумда сәйкес шешім қабылдау. Өйткені, "Бюллетень формасында "иә" немесе "жоқ" деген қысқа жауаптар ғана болады. Демек, "Ақжолдықтар" айтып отырған қажетті өзгерістер еліміздің болашағына ауадай қажет. Мысалға, референдумда конституциялық сотты қайта құру мәселесі қаралған. Президентке саяси партияларға мүше болуға, ал оның жақындары мен туыстарына саяси және квазимемлекеттік секторда лауазымды қызмет атқаруға тыйым салынған. Қала берді парламент жұмысы мен сайлау жүйесін өзгерту мәселелері қамтылған.
Айта кетсек, Президент Қасым-Жомарт Тоқаев 5 маусымда Конституцияға өзгерістер мен толықтырулар енгізу бойынша республикалық референдум өткізу туралы жарлыққа қол қойды. Мемлекет басшысы өз жолдауында аталмыш бастамалар Қазақстан Республикасының саяси жүйесін түбегейлі өзгертуге бағытталғанын атап өтті. Қазір осы мәселе бойынша халық арасында түсіндіру жұмыстары жүргізілуде. Бұл іске Қазақстанның «Ақ жол» демократиялық партиясы да білек сыбана кірісті.

Қазақстан Республикасы Парламент Мәжілісінің депутаты Дания Еспаева Ақжайық өлкесіне жасаған жұмыс сапары барысында "Орал сауда-өнеркәсіп" компаниясының жұмысшыларымен кездесті. Мәжіліс депутаты оралдықтармен жүздесіп, 5-ші маусымда өтетін референдумның маңыздылығын түсіндіріп өтті

"Ақжол" партиясының атынан Қазақстан Республикасы Парламенті Мәжіліс депутаты болып сайланған Дания Еспаева мен Ерлан Барлыбаев жұмыс сапарымен Орал қаласына табан тіреді. Қос депутат ең алдымен студенттермен кездескен еді. Кездесулер легі "Орал сауда-өнеркәсіп" кәсіпорны қызметкерлерімен жүздесумен жалғасты. Жиын барысында мәжілісмен 5-ші маусымда өтетін референдумның не үшін ұйымдастырылатынын түсіндіріп берді.

Жалпы кездесу өткен зауытта 160 астам азамат жұмыс жасайды. Бүгінде өндіріс ошағы су, газбен жабдықтаумен айналысып, телекоммуникация жүйелеріне арналған полиэтилен құбырларын, металл плиткаларын жасайды.

Мәжіліс депутаттарымен кездесу жалғаспақ. Олар еңбек ұжымдарында референдумға байланысты түсіндіру жұмыстарын ұйымдастырады.