Денсаулық сақтау министрі Ажар Ғиният дәрігерлердің қателігі үшін жазаны жеңілдетуді ұсынды. Парламент мәжілісінде медицина саласы қызметкерлерінің мәртебесін көтеру, науқастардың құқығын қорғау, медициналық көмек сапасын арттыру мәселелерін қамтыған заң жобасының тұсау кесері өтті. Бас дәрігердің айтуынша, бүгінде дәрігерлік қателік үшін жаза қатаң, соның салдарынан білікті мамандар денсаулық сақтау саласына келмейді, я болмаса, кетіп қалып жатады. Министр таныстырған заң жобасында денсаулыққа байқаусызда орташа және ауыр зиян келтіргені үшін айыппұл мөлшерін және қамауға алу мерзімін азайту, денсаулығына ауыр зиян келген немесе науқас қайтыс болған жағдайда бас бостандығын айыру жазасының мерзімін қайта қарап, бас бостандығын шектеуге ауыстырылсын деген норма енгізіліп отыр.

Денсаулық сақтау министрі Ажар Ғиният өзінің алғашқы дәрігерлік қателігін еске алды.

АЖАР ҒИНИЯТ –ҚР ДЕНСАУЛЫҚ САҚТАУ МИНИСТРІ «Өзімнің алғашқы қателігім әлі де есімде. Кезінде ішек инфекциясы індеті бойынша баланы емдеген едім. Баланың дене қызуы түсіп, жағдайы жақсарып келе жатқан болатын. Ал үшінші күні дене қызуы қайта көтерлді. Бала бозарып кетті. Сол кезде әріптестерімнен кеңес сұрадым. Мен баланы ішек инфекциясы бойынша емдеп жүрсем, онда пневмония болған.

Баланың жағдайы жақсарғанша, жансақтау бөлімінен шықпадым».
Жоғарыда аталған заң жобасында дәрігердің қателігінен зардап шеккен науқастарды қорғау нормасы да бар. Министр ханымның баяндауынша, медициналық оқиға салдарынан зардап шеккен қазақстандықтарға өтемақы төленеді. Ол үшін медицина қызметкерлері қызметіне міндетті сақтандыру енгізілмек. Жыл сайын елімізде дәрігерлерге қатысты қызметтік міндеттерін тиісінше орындамағаны үшін 300-ге жуық қымыстық іс қозғалады. Қылмыстық істер өлім қаупі бар хирург мамандарына қатысты жиі қозғалады дейді министр. Жәбірленушілердің пайдасына келтірілген моральдық және материалдық залалды өтеудің жалпы сомасы 40 миллион теңгеден асады. Ал мұндай жағдайда медицина қызметкерінің жалақысы науқастың денсаулығына келтірілген зиянды өз бетімен өтеуге жетпейді. Дәрігердің қателігінен науқас қайтыс болған жағдайда сақтандыру компаниясы 3 млн 180 мың теңге төлейді. Бірінші топтағы мүгедек болып қалған жағдайда 2 млн 544 мың теңге, екінші топтағы мүгедектік үшін 1 млн 590 мың теңге төлейді