Жазғы мезгілдегі өрт қауіпсіздігін сақтау БҚО ТЖД қызметкерлерінің басты назарында. Тілсіз жау тұтана қалса, жалын ен дала мен орман алқабына таралып, бой бермей кетпей тұрғанда ауыздықтау мүмкіндігі зор болуы тиіс. Өткен жылғы Ақжайық ауданы аумағында пайда болған табиғи өрт зардабының биыл қайталануына жол берілмеуі керек. Төтеншеліктердің алдына қойылған тапсырмалар осындай. Естеріңізге салсақ, 2020 жылы 13 шілдеде Бударин ауылы аумағында орман алқабы мен құрғақ шөп өртеніп, қызыл жалын 435 гектар жерді шарпыған болатын. Тілсіз жаудың салдарынан Коловертное ауылында 2 үй, 4 шаруашылық құрылысы өртеніп кетті. Өртті сөндіру барысында 42 адам, 15 бас ірі қара, 25 бас ұсақ мал және 30 үй құсы эвакуацияланған. Енді осындай ірі шығынға жол бермес үшін орман және дала өрттерінің алдын алу және жою мақсатында бірнеше іс-шара қабылданыпты. Орман және дала өрттерінің басты себептері халықтың отты абайсыз қолдануы және құрғақ шөпті өртеу барысында қарапайым сақтық ережелерін сақтамау. Халыққа түсіндірме жұмыстарын жүргізу аясында облыс бойынша 65 адамнан тұратын 13 мобильді топ құрылған. Оған қоса жергілікті атқарушы органдармен 25 шақырым радиуста орналасқан 62 елдімекеннің өрт қауіпсіздігін қамтамасыз ететін 18 өрт сөндіру бекеті жасақталыпты. Департаменттің жауынгерлік есебі мен резервінде 83 бірлік негізгі техника бар.
Алдағы уақытта Ақжайық, Жаңақала, Қаратөбе аудандарында қосымша 4 өрт сөндіру бекетін құру жоспарланған. Батыс Қазақстан облысының аумағында дала және орман аймақтарында жану нүктесін дереу әуеден анықтау үшін «Қазақстан Ғарыш сапары» Ұлттық компаниясысымен 4 млн. теңгеге шарт жасалыпты. Айта кету керек, жыл басынан бері облыс аумағында 139 өрт оқиғасы тіркеліп, 4 адам қаза тауып, 3 адам өрт кезінде түрлі дәрежедегі жарақат алған. Өткен жылдың ұқсас кезеңімен салыстырғанда қызыл жалын саны 16 пайызға азайған.

БҚО-да төтеншеліктер дала өрттерін болдырмау үшін сақтық шараларын күшейтті. Табиғи өрттердің 90 пайызы адамдардың қауіпсіздік сақтамауынан орын алып отыр дейді мамандар. Əсіресе шылым тұқылы мен шыны шишаларды жол жиегіне лақтырудан, жаздың ыстығында жиі от тұтанатыны анықталған. Бүгін жанармай құю бекеттеріне кірген әр жүргізушінің шылымының қорабына мұндай әрекеттің табиғатқа қауіпті екенін еске салатын ескертулер жапсырылды. Рейд қала шетіндегі жергілікті полицияның постында жалғасты.

Дала өрттерінің күш бермей өршуінен қаншама шаруа қожалық жері пайдасыз болды. Көп жағдайда өрттің тұтануына адами фактор себеп болып отырғаны белгілі болған. Сондықтан дала жəне орман өрттерінің алдын алу мақсатында төтенше жағдай департаменті жүргізуші сапарға аттанарда міндетті түрде аялдайтын жанармай құю бекеттеріне ат басын бұрды. Осы жерде азаматтар жолға қажетті сусыны мен шылымын сатып алатыны мәлім. Төтеншеліктер әр шылымның қорабына, сатылатын өнімдерге ескертулер жапсырып, адамдардың бір салғырттығынан табиғат анаға өлшеусіз залал келіп жатырғанын түсіндірмек болды. Одан әрі рейд бірлескен түрде жергілікті полция қызметінің постында өткізілді.

Жолға шыққан автокөлік жүргізушілері тоқтатылып, ескерту үн парақтары табысталды. Айта кетейік, биыл облыста 3 орман өрті тіркеліп, қызыл жалын 24 гектар жасыл алқапты шарпыпты жəне 1 дала өрті орын алып, 3 мың 224 гектар алқап жанып кеткен. Аталмыш мәселе шынында да ойлантарлық дейді жүргізушілер.

Профилактикалық шаралар өрт қауіпсіздігі кезеңі аяқталғанға дейін жалғасады.

Биылғы жылдың өзінде өңіріміздің аумағында 57 табиғи жану орын алып, салдарынан 714 гектар жерге залал келтірілген. Бұл туралы өңірлік коммуникация алаңында белгілі болды. Сала мамандары қызыл жалынның орын алуының басты себебі адамдардың өрт қауіпсіздігіне салғырт қарауы мен құрғақ шөптерді рұқсатсыз жағуы,- дейді.