7-тамызда Орал қаласының Солтүстік -Шығыс ықшам ауданында орналасқан бес қабатты тұрғын үйден өрт шықты. Абырой болғанда тұрғындар дін аман. Өрт сөндірушілер тілсіз жауды 1 сағатта сөндіріп үлгерген. Бесінші қабатта қызыл жалыннан шыға алмай қалған әйел адам мен балаларды Азамат есімді қала тұрғыны құтқарыпты. Өз өмірін қатерге тіккен ер адам бұл ісін ерлік деп санамайды. Бүгінгі күннің батырымен арна тілшілері кездесіп, тілдесіп қайтты.

Оқиға тамыздың жетісінде қаланың Солтүстік-Шығыс ауданында орналасқан тұрғын үйде болыпты. Азамат түскі мезгілде үйінен шыққанда қызыл жалынға оранған ғимаратты көреді. Қасына барғанда бесінші қабаттың терезе жақтауында әзер тұрған қос бүлдіршін мен көмек сұраған әйел адамды көзі шалады. Ол үш адамның өмірін ойланбастан құтқаруға шешім қабылдапты. Бесінші қабатқа көмекке асыққан жандармен бірге көтеріледі. Тілсіз жау тұтанған дәлізді тапқанда бөгде адамдардың есікті бұзып жатқанын көріпті. Есік бұзылған бойда дәліз қара түтінге боялған. Азамат бірден жүресінен отырып, жорғалап, жанып жатқан бөлмеге кіреді.

Абырой болғанда Азамат қара түтін қаптаған бөлмеден үш адамды құтқарып, қауіпсіз жерге шығарады. Өрт сөндірушілер қызыл жалынды 1 сағатта сөндіріпті. Тілсіз жаумен күресу үшін 8 маман жұмылдырылған.

Екі бала мен әйел адамды ажалдан арашалап қалған Азамат бұл ісімді батырлыққа баламаймын. Қиын жағдайда әрбір адам осындай қадамға барар еді,- дейді. Бүгінгі күннің батыры өрт кезіндегі дағдыны әскерде үйренгенін айтады. Үш адамның тағдырына араша түскен батырдың ерлігі әлеуметтік желіде тез таралып, көпшілік тәнті болды. Алайда Азаматты сынаған жандар да аз емес.

Батыс Қазақстан облысында қызыл жалыннан екі адамды құтқарған мектеп оқушысы марапатталды. Ол тұрғын үй өртке оранған тұста, өрттен кішкентай бала мен ересек адамды құтқарған. Оқиға ақпанның 22 сі күні Ақжайық ауданына қарасты Тайпақ ауылында орын алыпты.

Бұл, 11 сыныптың оқушысы- Мирас Жүнісов. Бір қарағанда жеткіншек өзге оқушылардан еш айырмашылығы жоқтай. Бірақ, бұл бозбала қызыл жалынға оранған үйден еш қаймықтай, екі адамды құтқарған -бүгінгі күннің батыры. Оқиға ақпанның 22-сі күні Ақжайық ауданына қарасты Тайпақ ауылында орын алған. Мирас көрші үйдің өртке оранғандығын көріп, оларға хабарлау үшін оқиға орынына барады.

Тілсіз жаудан адам өмірін аман сақтап қалған бозбала бұл ерлігі үшін "Өртке көрсеткен қайсарлығы" үшін деген арнайы медальмен марапатталды. Сондай-ақ, оның анасы арнайы министрдің наградасына ие болды.

Тілсіз жаудан қаймықпаған бозбаланың ерлігі бүгін де көпке үлгі.