Бүгін сондай-ақ елімізде мемлекеттік қызметшілер күні. Осы орайда облыстық әкімдікте салатынатты шара өтіп, саланың үздіктері марапатталып, жас мамандар ант қабылдады. Оған облыс әкімінің бірінші орынбасары Мұхтар Манкеев қатысты.Бұл атаулы күннің тарихы ХХІ ғасырдан бастау алады. 2003 жылдың наурызында БҰҰ Бас Ассамблеясы 23 маусымды Мемлекеттік қызмет күні деп жариялаған қарар қабылдаған болатын. Араға 10 жыл салып, Тұңғыш Президент - Елбасы Нұрсұлтан Назарбаевтың Жарлығымен 2013 жылы 23 маусым бізде де мемлекеттік қызметшілер күні болып бекітілді. 2014 жылдан бастап Қазақстанда мемлекеттік қызметкерлер күні аталып өтіле бастады. Салтанатты шарада мемлекеттік қызметшілер қатарына қосылған екі жас маман ант қабылдады. Олар Орал қаласы әкімі аппаратының бас маманы Бақтығали Ильдар мен БҚО бойынша мемлекеттік сатып алу басқармасы тауарлар мен көрсетілетін қызметтер бойынша мемлекеттік сатып алу рәсімдерін жүргізу бөлімінің бас маманы Мөлдір Мажитова. 2021 жылдың 1 қаңтарындағы жағдай бойынша Қазақстандағы мемлекеттік қызметшілердің штат саны - 96 910 болса, облыста 3903 мемлекеттік қызметші ел дамуы жолында еңбек етуде. Салтанатты жиында облыс әкімінің бірінші орынбасары Мұхтар Манкеев қоғам дамуында елеулі қызмет атқарып жүрген мамандарды облыс әкімі Ғали Есқалиевтың атынан құттықтады. Бұдан соң үздіктер марапатталды. Мәселен «Үздік мемлекеттік қызметші» төсбелгісіне облыстық мәдениет басқармасында табан аудармастан ондаған жыл еңбек етіп жүрген Қазақстан Журналистер Одағының мүшесі, ҚР Мәденеит саласының үздігі, Мемлекеттік қызметші әнінің авторы - Сәуле Қарабалина ие болды. Бұдан басқа облыс әкімінің алғыс хатымен 13 мемлекеттік қызметші мадақталды.Жуырда ел дамуына өлшеусіз үлес қосып, уақытпен санаспай еңбек етуші мамандардың жалақысы айтарлықтай жоғарылайтын болады. Яғни қызметіне қалтқысыз жандардың еңбектері бағалауы тиіс деген, ҚР Мемлекеттік қызмет істері агенттігінің БҚО бойынша департаментінің басшысы, Әдеп жөніндегі кеңес төрағасы Ғалым Тұрсынбаев әріптестеріне сәттілік тіледі. Салтанатты шарада Мемлекеттік қызмет істері агенттігінің БҚО бойынша департаментінің және облыстық ішкі саясат бақармасы атынан да құттықтаулар болды.