1 қыркүйек - білім күні тек орта мектептерде ғана емес, ЖОО-на да кеңінен аталып өтті. Мәселен, ғасырға жуық тарихы бар, аймағымыздағы маңдайалды қасиетті қарашаңырақ М. Өтемісов атындағы БҚМУ-і биыл да өз түлектерін құшақ жая қарсы алды. Ғылым мен тәжірибенің үздік жетістіктерін күнделікті жұмыс барысына арқау еткен қасиетті білім ордасы биыл - 1700 студентті қа­былдады. Бүгінге дейін университет мыңдаған жанның бағын ашты. Қазір 5 мыңнан аса студент университет қабырғасында білім алуда. Олардың қатарына дипломға дейінгі білім беру, магистратура, докторантура саласында оқып жүргендердің барлығы кіреді. Бұл еліміздегі педагогикалық бағытта кадр дайындау ісінде оқ бойы озық тұрған ең көрнекті білім ордаларының бірі.ЖОО-н бітірген түлектер еңбек нарығында өз орындарын таба білді. Статистикалық мәліметтерге сүйенер болсақ, білім ордасын бітірушілердің 80 пайызы бүгінде жұмыспен қамтылған. Бүгінде  университетке батыс өңірлерден бөлек, оңтүстік аймақтардан да келіп білім алушылар саны аз емес.
Батыр атындағы іргелі оқу ордасында қазір 75 мамандық бойынша кадр даярланады. Соңғы жылдары оқу процессінде шетел оқу орындарының да тәжрибесі сынақтан өткізілуде.

1-ші қыркүйек жексенбі болғандығына қарамастан, еліміздің барлық мектептерінде білім күніне арналған салтанатты жиын өтті. Биыл оралдық 6000 мыңнан астам бүлдіршін алғаш рет мектеп табалдырығын аттанады. Білім күніне арналған салтанатты жиында сөз алған шаһар басшысы білім саласында атқарылып жатқан жұмыстарға тоқталды.

Жиында сөз алған №37 мектептің директоры оқушыларға сәттілік тілеп, өткен оқу жылында білім ордасы қандай табыстарға жеткендігін жіпке тізіп, келешектегі жоспарларымен де бөлісті.

Биыл қала көлемінде 51 мектеп 47мың оқушыны оқытпақ. Үш аусымды және апатты деп танылған қауіпті мектептерді азайту мақсатында Зашаған кентінде 52-ші білім ордасының құрылысы жүріп жатыр.

Зеленов ауданына қарасты Дариян ауылында көп жылдан бері оқушылардың арманына айналған жаңа мектептің құрылысы аяқталып, алғашқы қоңырау соғылды. Аталмыш нысанның құрылысы өткен жылдың мамырында басталған еді. Жобаның құны 1 млрд теңгеден асып жығылады. Бүгінгі таңда, аталмыш оқу ордасында 300 оқушы білім алмақ. Биылғы жылы Дариян қазақ мектебіне гимназия деген атау берілді.

Бұл мектептің қабырғасы өткен жылдың мамырда қалынып, мердігер компания құрылысты биылғы жылы аяқтаған еді. Құрылыс жұмыстары үшін ұлттық фонд 1 млрдтан астам қаржыны бөлген болатын. Бүгінгі кескіні келіскен ғимараттың өзі 300 орынға арналған. Сондай-ақ, мектеп жанында 100 балаға арналған мектеп интернатта өз жұмысын бастамақшы.

Мектептің ашылу салтанаты мен алғашқы қоңырауға арналған жиында ғимараттың кілті салтанатты түрде ұстаздарға тапсырылған болатын. Кезінде тар ғимаратта білім алып келген оқушылар үшін биылғы алғашқы қоңыраудың алатын орны ерекше. Ал, биылғы жылы 23 бүлдіршін алғаш рет мектеп табалдырығын атап отыр.

Жас буын өкілдері жүрек жарды пікірлерін ортаға салып, елімізде атқарылып жатқан оңды істерді баяндап, тілектерін білдірді.

Салтанатты жиында сөз алған аудан әкімі барша Дариян ауылының тұрғындарын қуанышпен құттықтап, Зеленовта білім беру саласы үшін атқарылып жатқан жұмыстарын жіпке тізді.

Бауыр еті баласын мектепке жетектеп келген ата-аналар білім ордасының сәулетті ғимаратымен, қажетті құрал-жабдықтарын атап өткен еді.

Биылғы жылы облысымыздың мектептерінде ашыла бастаған жаңашыл іт-сыныптың біреуі осы қазақ мектебінде өз жұмысын бастамақ.