Оралда ұн мен нан қымбаттады. Кәсіпкерлер бұған өңірдегі қуаңшылық себеп болғанын айтады. Осының кесірінен олар былтырғымен салыстырғанда, биыл шығынға еселеп батқан. Бірақ ас атасы - нанның бағасы әлі де қымбаттауы мүмкін. Осыған дейін 140 теңгеден сатылған жоғарғы сортты бір таба нанның бағасы қазір 150 теңге. Нан ғана емес, ұн да 100 теңгеге қымбаттапты. Наубайшылар мұның себебін бидай бағасының өскенімен түсіндіреді.Биыл қуаңшылықтың кесірінен астық бітік шықпады. Осылайша қамбалар қаңырап бос қалды. Бұл аздай, дизельдің қымбаттауы да жығылғанға жұдырық болды. Шаруалар бидайын қымбатқа сатты, олардан наубайшылар да қалыспады. Наубайхана өкілдері қымбатшылық құрсауында қалған соң, өз өнімінің бағасын өсіруге мәжбүр болдық дейді. Осылайша, нан ғана емес, макарон өнімдері де 11 пайызға қымбаттапты. Осылай күйінген кәсіпкерлерді жауапты орган өкілдері жұбатқандай болды. Баға шарықтауының алдын-алу үшін арнайы қор құрылмақ.Енді шаруалар әліптің артын бағып, бағаның қымбаттағанын күтеді. Осылайша өз өнімін сатуға асықпайды, -дейді наубайшылар. Демек баға әлі де өседі. Наубайшылардың сөзінше, жоғары сортты нанның бағасы кемінде 180 теңгеден кем болмауы керек. Ал қазіргі бағам 150 теңге межесінде.

БҚО-ның Теректі ауданында жаңғыртудан кейін өсімдік майын өндіретін «Теректі май комбинаты» ЖШС күніне 140 тоннаға дейін өнім шығаруда. Мұнда орнатылған еуропалық құрал-жабдықтар мен заманауи технология өндіріс көлемін екі еседей арттыруға мүмкіндік береді. Мысалы, бұрын жылына 20 мың тонна шикізат өңделсе, қазір 45 мың тоннаға жетеді. Бұрын майлы дақылдардан 30 пайыз май алынса, енді жаңа желі арқылы 43 пайызға дейін алуға болады. Анығырақ айтқанда, бұрын тәулігіне 70 тонна шикізат өңделіп, 20 тонна май алынса, қазір бұл көрсеткіштер сәйкесінше 144 тонна және 50 тоннаға жетіп отыр.Аталмыш зауытқа мемлекет тарапынан үлкен қолдау көрсетілген. Көп қаражат құйылып, жаңадан технологиялар әкелінуінің нәтижесінде жаңа жұмыс орындарын ашып, өңір қажетін өтеумен бірге шетелге өнім шығаруға мүмкіндік туған. Екіншіден, бұл шаруа қожалықтарына да тиімді. Олар өсірген майлы дақылдарын осында өткізеді. Жаңғырту жұмыстарына барлығы 2,3 млрд теңге кеткен. Жаңадан бу қазандығы орнатылып, шикізат дайындайтын, дәнді сығымдап, тазартатын, экстракциялайтын цехтар іске қосылды. Дәнінен ажыратылған күнбағыс қабығы жағылып, одан бу өндіріледі.Мұнда өсімдік майының «Белес» күнбағыс майы деп аталатын екі түрі, яғни тазартылған, иіссіздендірілген, мұздатылған, оған қоса рафинадталмаған түрлері өндіріледі. Зауыт өнімдері Батыс Қазақстан, Ақтөбе, Атырау облыстарында сатылуда. Жақында «Белес» майының 50 тоннасы Өзбекстанға жөнелтілді. Ең бастысы, өнім халықаралық талаптарға сай келеді. Күні бүгін зауытта 150-ден астам адам тұрақты еңбек етеді. 80 пайызы жергілікті тұрғындар.Алдағы уақытта кәсіпорын аясын одан әрі кеңейтіп, маргарин мен май, құрамажем, ауыз су өндіру көзделуде.