Бұған дейін ауа-райын болжаушы ұйым өткен жылдың желтоқсанында әкімдерге биылғы көктемде судың көп болатынын ескерткен. Алайда оған құлақ асып, тасқын суға қамданған әкімдердің жұмысының нәтижесін көзіміз көріп отыр. Еліміздің 10 өңірін су басты. Төтенше жағдай жарияланып, халық сумен әлек болып жатыр. Қарғын судың әлегінен соң, өзендер арнасынан асып-тасып, ауыл-аймақтарды су басып жатыр.Онсыз да шекаралас жатқан Жайықтан қауіп төніп, су тасқынымен күресіп жатқан батыс жұрты тағы да әбіргерге түсетін түрі бар. «Қазгидромет» өкілдерінің айтуынша, Ресейден келіп жатқан тасқынның қаупі әлі сейілген жоқ. Алдағы бір аптада соң Атырау және Батыс Қазақстан облыстарында екінші кезеңі басталады.

Ал Атыраудағы жағдайды бақылап жүрген премьер-министрдің орынбасары Қанат Бозымбаев пен облыс әкімі Серік Шәпкенов Жайық өзені бойын тікұшақпен әуеден барлап, жергілікті халықпен кездесуде су тасқынынан қорғануға ауыл жастарын да тарту қажеттігін айтты.

Сондай-ақ, ауа-райын болжаушылар алдағы 3-5 күнде Қазақстанның басым бөлігінде жауын-шашын жауады деп отыр. Солтүстік, орталық, шығыс өңірлерде кей күндері толассыз жаңбыр жаууы мүмкін. Бұл арнасынан асып жатқан өзендер мен су қоймаларына қосымша ауыртпашылық болатыны сөзсіз. Бүгінгі күні СҚО Сергеевка су қоймасы 180 пайызға толып кеткен. ТЖМ хабарлауынша өңірде ауыл тұрығндарын алдын ала қауіпсіз жерге көшіру жұмыстары жүргізіліп жатыр. Көктемде су басып, бәгіреге түсіп жатқанда, алдағы жазда кей өңірлерде қуаңшылық боулы да мүмкін.

Алайда,Қазгидрометтің өкілі бұл болжам әлі де нақтыланатынын айтады.