Оралда жаңбыр зардабы жойыла бастады. Алайда ауа райын болжаушылардың дерегінше, шаһар аумағында бірер күнде тағы жаңбыр жауады. «Батыс су арнасы» ЖШС мамандары кәріз коллекторларынан аққан шайынды суларды сорып, жері опырылған аудандардағы жарылған кәріз желілерін жаңартуда. Оралдықтар өткен аптадағы нөсер жаңбырдан кейін әлі ес жия алар емес. Жауын суына лық толған қалалық кәріз жүйесі істен шықты. Салдарынан бұл сауда нысанының маңында орасан зор шұңқыр пайда болып, коммуналдықтарды әбігерге салуда. Абырой болғанда, ешкім жапа шекпеген. Опырылған жердегі кәріз құбырын ауыстыруды қолға алған «Батыс су арнасының» қызметкерлері әлі де болса тереңде орналасқан құбырды қазып алмаған. Өйткені шайынды суға арналған құбыр өте тереңге салыныпты.Естеріңізге сала кетеміз толассыз жауған жауынның салдарынан орталық көшелердің жолдары бірінен соң бірі опырылып, кейбір шұңқырларға көлік те түсіп кеткен еді. Төтеншеліктер қала ішіндегі бес көшенің осылай бүлінгенін айтса, жергілікті әкімдік өкілдері бірер күнде бәрін реттейміз,- деп сендірді. «Батыс су арнасының» басшылығы Шолхов көшесі бойындағы шайынды суға арналған құбырды жөндеу жұмыстары биыл толықтай аяқталатынын, оған қоса бірнеше көшеде апатты құбырлар ауыстырылап жатқанын тілге тиек етті.

Оралда толассыз жауған жаңбыр салдарынан көпқабатты үйлердің жертөлелері шайынды суға толып, тұрғындардың тыныштығы бұзылды. Бүгінде коммуналдықтар жағдайды қалыпқа келтіруде жұмысты күшейткен.Қатты жауған нөсер жаңбыр Оралдағы жолдардың сапасын анықтап бергендей. Абай даңғылы бойындағы асфальт көлік қозғалысы кезінде опырылып түскен. Жүргізушілерге айтарлықтай шығын келіпті. Сонымен қатар өзге де кәсіпкерлік субъектілері зардап шеккен. Қалалық әкімдік жанынан арнайы комиссия құрылып, бүгінгі таңда шығын есептелуде.Омега зауыты маңында кәріз коллекторы жарылып, бұл орын шайынды суға толған. Оқиға орнында экологтар топырақтан арнайы сынамалар алып, қоршаған ортаға келген зиянды анықтауға кіріскен. «Батыс су арнасы» ЖШС бригадасы лас суды сору жұмыстарын қолға алыпты.Толассыз жауған жаңбырдың салдарнан №3 кәріз-сорғы стансасында апатты жағдай орын алып, Орал қаласында салқын су беру уақытша тоқтатылған болатын. Оған қоса аталмыш мекеменің бригадасы жөндеу-қалпына келтіру жұмыстарын атқарып, қазіргі кезде су берілді. Бұл Назарбаев даңғылы 216-шы үй. Аталмыш тұрғынжайдың жертөлесі жаңбыр суына толған. Өткен ғасырда бой көтерген үй тұрғындары бұл жағдайдың алғаш рет орын алғанын айтып, болашақта баспаналары құлап қала ма деп қорқады. 3 маусым күнгі жауған жаңбырдың салдарынан 40-тан астам тұрғын үйдің аула аумағы, 7 әлеуметтік нысанның жертөлесі суға толып, 8000 абонемент жарықсыз қалған болатын.

"Астана" ықшам ауданында орналасқан мына үйдегі әр пәтер автономды жылыту жүйесіне қосылған. Демек, жылыту құбырлары қара суға тікелей тәуелді. Ал 2019 жылдан бері түнгі 12-ден кейін су қысымы әлсіреп, тіпті мүлдем ажырап қалады. Сәйкесінше, жоғарғы қабаттағы пәтерлерге су бармай, жылыту қондырғысы автономды түрді жұмысын тоқтатады.
Түнгі сағат 12-ден кейін суға зәру болатын тұрғындар наразылығын жасырмады. Тіршілік көзінің бұлай ажырауы жас сәбилі аналарға, егде жастағы қарияларға қиын соғуда.
Жалпы 5 қабатты тұрғын үй 2012 жылы қолданысқа берілген. Құрылыс жұмыстарына жауапты мердігер компания пәтер кілтін табыстар алдында уәдені үйіп-төккен көрінеді. Алайда баяғы жартас, сол жартас күйінде қалып, тұрғындар түн ауса болды судан қол үзіп қалады.
Аталған жағдай бойынша "Батыс Су Арнасы" ЖШС хабарластық. Кәсіпорындағылар мұндай проблема барын жасырмады. Айтуларынша, құрылыс кезінде құбырлар жоба бойынша салынбаған. Сол себепті су көзі жоғарғы қабаттағы пәтерге жеткенше қысым төмендеп кететін көрінеді.
Бақсақ, бар гәп сол баяғы құрылыс жұмыстарының нашарлығында болып шықты. Осының кесірінен судың қысымы тежеліп қалады екен. Кеткен олқылықты мердігер қайта түзетуіне кепілдік уақыты біткен. Онсыз да мұның зардабын татып жүрген тұрғындардың осы күнге дейін жауаптылар көмек қолын созар деген үміттері бекер болып шықты. Құзырлылардан құбырларды тұрғындар тек өздері бірігіп алмастырып алуы тиіс деген жауапты естідік. Ал жұмысын сапасыз атқарған мердігерге қандай шара қолданылары белгісіз.

Оралда сәуір айынан бастап су бағасының тарифі - 200 теңгеге қымбаттауы мүмкін. Өйткені «Батыс су арнасы» ЖШС табиғи монополияларды реттеу департаментіне бағаны өсіру туралы өтініш беріпті. «Батыс су арнасы» ЖШС директоры Қайырғали Имашев коммуналдық мекеме қызметі үшін қолданыстағы тариф құны осыдан 5 жыл бұрын бекітілді дейді. Тариф бағасын өсіруге бірнеше негізгі себеп бар көрінеді. Қазір кәсіпорын қарызға белшеден батқан. Сонымен қатар жер асты құбырларын жаңғырту мен қызметкерлер жалақсын көтеру сынды өзекті проблемалардың шешімі бұл коммуналдық ақыны көтеру. Сол себепті сұранысты монополистер бекітетін болса, бір куб метр су ақысы 96 теңгеден 200 тегеге қымбаттауы мүмкін.Ал табиғи монополияларды реттеу мекемесі мамандары қазіргі уақытта тариф құнын көтеру туралы шешімнің шықпағанын айтты. Бағаны өсіруге негіз болғанымен бірден бұлай екі есеге көтеру негізсіз дейді. Су тарифінің бағасына қатысты нақты шешім алдағы айдың 7-ші жұлдызында шығатын болады.

Ақпанда толассыз жауған жаңбыр тұрығындарды әбден әбігерге салды. Оралда бірқатар шағын ауданға су беру тоқтатылып, сарқынды сулар мөлшері деңгейінен бірнеше есе жоғарылағаны белгілі болды. Салдарынан кешелі-бүгін Зашағандықтар суды арнайы кесте бойынша тұтынуда.Оралға көктем ерте келді ме? Бірнеше күннен бері толассыз жауған жауын тұрғындардың тыныштығын алды. Онсыз да қызметі тынымсыз коммуналдық мекемелер күні-түні еріген қар суына қоса, жаңбыр суын да сорып әлек. Бір күнде 610 текше метр куб қар суы қала сыртына төгілген. Кешелі-бүгін қардың күрт еруінен Зашаған кентіндегі өздігінен ағатын кәріз коллекторындағы сарқынды сулар деңгейі көтеріліпті. Қысымның күрт артуынан «Батыс су арнасы» ЖШС ауыз суды уақытша тоқтатуға мәжбүр болған.Ал синоптиктер болса көктемге әлі ерте дейді. 5 ақпан күні түннен бастап күн райының суытатынын мәлімдеді. Бір апта жаңбырдың соңы қарға ұласатыны туралы да болжам бар. Коммуналдық мекемелер қосымша қар тазалауға қажетті техникаларды ұйымдастырдық деп отыр.

Бүгін Орал қаласының бір бөлігі тағы да сусыз қалды. Бұған себеп 12 тамыз күні сағат 12.30-дар шамасында шаһардағы басты көшелердің бірі - Еуразия даңғылы бойында кәріз коллекторының жарылуы. «Батыс су арнасы» ЖШС мамандарының айтуынша ауыз су бүгін де берілмеуі мүмкін. Қазіргі кезде апаттың себебі анықталу үстінде. Апатқа байланысты бүгін сағат 07.00-ден бастап теміржол вокзалынан Нұрсұлтан Назарбаев даңғылымен Сарайшық көшесіне дейін, одан 2-база ауданына дейін (5194 абонент) су беру тоқтатылды.Су тасымалы ұйымдастырылды. Оқиға орнында  "Батыс су арнасының" бригадасы (12 қызметкер, 3 техника) жөндеу-қалпына келтіру жұмыстарын жүргізуде. Тұрғындардың сөзіне қарағанда, су Зачаган кентінде де жоқ. Айта кетейік, Орал қаласында ауызсу проблемасы көптен бері туындап келеді. Тұрғындар кезекті рет сусыз қалған биылғы шілде айында БҚО әкімі Ғали Есқалиев жағдайға түсінік берген болатын.

Бірнеше аптадан бері облыс орталығының тұрғындарына су беру арнайы кесте бойынша жүзеге асқаны аян. Бұл жүйе енді жеке секторларға да қолданылатын болады. Атап айтқанда қаланың Солтүстік-Шығыс ауданы (ескі аэропорт), қаланың ергесіндегі саяжай алқабтары, Зачаганск, Мичурин, Асан ауылдарындағы аз қабатты жеке тұрғын үйлерге су беру шектеліп, кесте бойынша берілетін болады.
Мұндай шектеу шараларына коммуналдық мекеме амалдың жоқтығынан барып отыр. Өйткені қала іргесіндегі елдімекендер атап айтсақ саяжайлар мен Зачаганск кентінің тұрғындары ауыз суды шамадан тыс көп тұтынып, нәтижесінде су тазалау стансасына түскен салмақ екі есеге артқан. Яғни бау-бақша дақылдарын суаруға орталық коммуналдық жүйе қызметін пайдаланудың салдарын көп қабатты үй тұрғындары көріп, 4 және 5-ші қабатқа ауыз су жетпей отыр. Сол себепті енді «Жайықжылуқуат» АҚ-ның бір жылыту қазандағының жұмысын шектеу қойылып, ыссы су температурасы төмендетілмек. Сондай-ақ қазандықты салқындатудан шыққан 200 куб су қосымша «Батыссуарнасына» бағытталып, 1600 м3 су сағатына тазарту қондырғыларына жіберілетін болады. Оған қоса жеке секторлардағы тұрғын үйлерге су беру шектеліп, кесте бойынша берілетін болады. Ауыз су беруді кестеге сәйкес жүргізудің басты себебі жазғы мезгілде ауыз су тұтыну мөлшері өсуіне және қалалық кәріздік желідегі қайта құру жұмыстарына байланысты болып отыр. «Батыссуарнасы» мекемесімен қалаға мамыр айында орташа тәуліктік су беру көлемі 49 500 м3 болса, қазіргі уақытта 55 000 м3 жетіп отыр. Коммуналдық мекеме директоры Қайырғали Имашевтың айтуынша мұның негізгі себебі суды ысырапсыз пайдалнудың салдары. – Оған қоса апатты жағдайдағы Шолохов көшесіндегі айналмалы кәріздік коллекторды ауыстыруға байланысты қаланың солтүстік шығыс аумағы, жаңа шағын аудандар, орталық аумақтағы барлық кәріздік ағындардың 70 проценті Неусыпов көшесіндегі шайынды су коллекторы арқылы өткізілуде. Сәйкесінше осыншама жүктемеге бұл желі шыдамай апатты жағдайға келіп отыр. Сондықтан осындай шектеу шараларын алуға тура келді. Оған қоса су тазалу стансасы жаңғыртуды талап етеді. Бүгінде қосымша су көздерін тарту жұмыстары жүргізілуде. Зачаган халқы үшін жаңа су тазалу стансасын салу жоспары бар. Жобалық құжаттары дайындалу үстінде. Болашақта бұл мәселе тағы да қайталануы мүмкін. Сол себепті қосымша 22 су көзін ашу жоспары бар,– деді «Батыссуарнасы» ЖШС директоры Қ. Имашев. Суды шектеу арқылы берудің негізгі себебі шаһарды тіршілік нәрімен қамтып отырған "Жайық" өзенінің суының азаюы және әрі жерасты ұңғымаларындағы су деңгейі төмендеуі. Сонымен қатар тұрғындардың суды ысырапсыз пайдалануынан. Бұл мәселе коллекторларды жөндеу жұмыстары мен бау- бақша науқаны аяқталар сәтте ғана шешілуі мүмкін.