БҚО электр желілерін таратушы компаниясының қызметкерлері наразылық білдірді. Олар бүгін таңмен компания ғимараты алдына жиналып, жалақыларының тым аз екендігін айтып шағымданды. Кездесуге мекеменің басшылығы да келіп, жұмысшылардың базынасын тыңдаған сыңай танытты.
Жалақымыз тым аз, атқаратын жұмысымыз шаш етектен деп наразылық танытқан жұмысшылар бүгін компания алдына жиналды. Бұлардың бәрі БҚО электр желілерін таратушы компаниясының өкілдері. Бұл компания аймақты электр жарығымен қамтамассыз етіп отырған мекеме. Көбі электриктер, олардан басқа жүргізушілер, басқа да жұмысшылар бар.
Батыс Қазақстан электр желілерін таратушы компаниясы бұрын мемлекетке қарады, соңғы екі жылда сенімгерлік басқаруға берілген еді. Яғни, жеке қолға өтті. Осының салқыны тиді ме екен, компанияда еңбек нарығы, еңбек жағдайы күрт төмендеп кеткен. Мұны бізге жұмысшылар айтты. Олар бұрын мекеме мемлекеттің қол астында болғанда жағдайы жақсы болғанын айтады.
Компания басшылығы әр жұмысшының талап-тілегін тыңдады. Қызметкерлер жалақының тым аз екендігін, қауіпті жерде жұмыс жасағандары үшін қосымша ақы алмайтындықтарын, сүт берілмейтіндіктерін айтты. Бәрінен де қиыны -бұл компаниядағы барлық техника ескірген. Тракторы бар, басқа да ауыр технкалар үнемі сынады, үнемі істен шығады. Ал, ол үшін тракторшы мен жүргізуші жауап береді дейді. Тіпті сынған техника үшін талай түсініктеме жаздық деп шағымданды. Мына тұрған аға буын осы компанияда 25 жылдан астам жұмыс жасаған. Алды 30 жылға таяу еңбек еткендер. Осы уақыт аралығында бірде-бір техника жаңаланған жоқ дейді. Бізбен сұқбаттасқан компания басшылығы жұмысшылардан бетер еңіреп қоя берді. Айтуынша, компанияның қарызы бастан асады. Жарыққа төленетін тариф тым төмен. Компанияның жағдайы мәз емес.
Батыс қазақстан электр желілерін таратушы компаниясы облыстағы электр желілері үшін жауап беретін бірден-бір мекеме. Егер бұл мекеме жұмысы тоқтаса, жарықсыз қаламыз. Өкінішке орай, компания ешқандай мемлекеттік қолдау алмайды. Қаржылай да қолдау жоқ. Ол аз десеңіз алыс аудандарда электр желілері үзілсе, жөндеуге бару үшін де өздері тірлік етуі керек.
Бізбен сұқбаттасқан жұмысшылар жалақымыз төмен деп шағымданса, компания басшылығы мемлекеттен қолдау алмаймыз, жағдайымыз төмен деп екі жылады. Таяқтың екі ұшы секілді, бұл бір күрделі мәселе болды. Компания басшылығы тиісті министрліктерге компанияның жағдайын айтып хат жолдапты. Ал, жұмысшылар болса, кәсіп одақтан да күдерін үзген. Егер компания жалақыны көтермесе, басқа жұмыс қарауға мәжбүрміз дейді.