ҚР Парламент Мәжілісінің депутаттары Ерлан Барлыбаев пен Мақсат Раманқұлов дзюдо орталығына табан тіреді. Нысан ішін аралап, үйірме жұмыстарымен танысты. Заманауи үлгіде салынған кешеннің жұмысына халық қалаулыларының көңілдері толғандай. Бүгінде спорт кешеніндегі үйірмелер 500-ге жуық баланы қамтып отыр екен.

Расымен, жеке кәсіпкердің арқасында салынған орталық барлық талаптарға сай. Арнайы бөлмелерден бастап қажетті спорттық саймандарға дейін қарастырылған. Көпбейінді кешенде тіпті 130 орындық көрермен залы мен спорттық киімдер дүкені бар. Орналасқан жері де келісті. №10 шағынаудан қарқынды дамып келеді. Алдағы уақытта халқы 70-мыңға жетеді деген болжам бар. Осы орайда депутаттар нысан жұмысының маңыздылығын атап өтті.

Айта кетсек, орталық шілде айында ашылған еді. Сол кезден бастап бүлдіршіндер үйірмелерге жазыла бастады. Оның үстіне орталықта ірі облыстық, республикалық сайыстар жүйелі түрде өтіп тұрады.

Кітапханалар жүйесі қала тұрғындарының жан-жақты білім алып, саяси санасын қалыптастыру үшін түрлі ұйымдар және мекемелермен бірлесіп жұмыс атқаруда. Демек, қаламыздың мәдени өмірінде кітапхананың алатын орны ерекше. Ел тәуелсіздігінің 30 жылдығына орай кітапхана үздіктерін анықтайтын салтанатты шара ұйымдастырылды. Кеш барысында қалалық кітапхананың жыл бойы атқарған жұмысы рет-ретімен баяндалды.

Мерекелік кеш аясында кітапхана ісінің үздіктері марапатталды. Атап айтқанда, "Жыл меңгерушісі", "Жыл кітапханашысы", "Жыл кітапханасы", "Ең жас оқырман" сынды номинация бойынша кіл мықталар анықталды. Қалалық кітапханалар жүйесі көптеген келелі іс-шаралардың бастаушысы. Соның бірі-жақында өткен «Тәуелсіздік - ұраным, таусылмайтын жыр-әнім!» атты қалалық жас ақындар мүшәйрасы. Айта кетсек, мүшәйраны өткізуге Қазақстанның «Aқжол» демократиялық партиясы БҚО-тық филиалы мұрындық болған-ды. Бүгінгі кеште осы мүшәйра жүлдегерлерін аудандық мәслихат депутаты Омаров Тоқтар Мерекеұлы және мүшәйраның қазылар алқасы, қалалық «Ақберен» жас ақындар мектебінің жетекшісі Талап Таймасұлы марапаттады.

Жалпы, шаһар бойынша 16 кітапхананың басын біріктіріп, әдебиет пен мәдениеттің дамуына сүбелі үлесін қосып жүрген кітапханалар жүйесінде 72 кітапханашы қызмет атқарады екен. Тарихы тереңге бойлаған кітапхана жүйесінде еңбек етіп, бар өмірлерін кітапхана жұмысына арнаған қызметкерлер де жетерлік. Шара аясында ардагер қызметкерлердің еңбектері еленіп, алғыс хаттар табысталды.

Шабыт балалар шығармашылық орталығында «Бақытты жанұя – бақытты ел» отбасылық форумы өтті. Форумды ұйымдастыруға "Интеграл", "Жайық таңы" қоғамдық бірлестігі, Зашаған кенті әкімдігі, қалалық білім беру бөлімі мен полиция басқармасы мұрындық болды. Шараға отбасы мүшелері толық түрде қатыса алды. Форум аясында аналар мен ұл-қыздары бір-біріне жылы сөз айтып, әкелер бірге байқауға қатысып, бір серпіліп қалды. Барлық бала бақытты болуға лайықты. Форумның басты ұраны да осы.

Форум аясында үш жақты меморандумға қол қойылды. Келісім бойынша жергілікті балалар мектептен тыс жұмыс орталығы мен "Шабыт" балалар шығармашылығы орталығымен тығыз қарым-қатынаста болмақ. Негізгі мақсаты-достық көпірін орнату, ата-ананы қолдау, балалалардың уақытын тиімді өткізу, отбасы институтының құндылығын арттырып, рухты көтеру, Тәуелсіз елдің бақытты отбасын қалыптастыру.

Форум аясында ата-аналар мамандардан кеңес алды. Түрлі отбасылық ойындар ойналып, шеберлік сағаттары ұйымдастырылды. Шараның көздегені біреу-балалардың бойына отбасына деген сүйіспеншілік ұялата отырып, ата-ана мен бала арасындағы сыйластықты қалыптастыру. Тәрбиенің алғашқы алтын қазығы өз туған ұясы екенін жете түсіндіру.

Жаңа сыныпта ақынның жинақтары, өлеңдер топтамасы, еңбектері қойылды. Осы жерде жас ақындар қара өлең жазу дағдыларын үйреніп, бос уақытын тиімді өткізе алады. Өмірін өлеңмен ұштастырған жанның бірі-Саян Ерсайын. Ақындар мектебіне барып жүргеніне 5 жылдан асқан. Енді ол алысқа бармай-ақ төл туындыларын осы жерден жаза алады.

Айта кетсек, орталық бұрынғы мейрамхана ғимаратында ашылған болатын. Мектептен тыс жұмыс орталығында 14 үйірме жұмыс істейді. Яғни, бүлдіршіндер қосымша білім алып, шеберліктерін жетілдіреді.

Бұл семинарда ағылшын тілі пәні мұғалімдері бас қосты. Ондағы мақсат-ағылшын тілі пәні мұғалімдерінің кәсіби педагогикалық өсуі мен шығармашылығын ынталандыру. Ұстаздардың біліктілігін көтеру, педагогикалық инновацияларды енгізу, жаңашыл идеяларды насихаттау. Оқыту семинарына Фулбрайт бағдарламасы бойынша АҚШ-тың Вермонт штатының ағылшын тілі пәні мұғалімі Линдсей Гатчфилд шақырылды. Шараға аудан және қалалық білім беру ұйымдарының ағылшын тілі пәні мұғалімдері қатысты.

Семинарға қатысқан Линдсей Гатчфилд ұстаздарға дәріс оқыды. Мұғалімнің педагогикалық мәдениетін жетілдіру мен белсенді оқытудың жаңа әдістері мен формаларын қолдану бағытында өзінің іс-тәжірибесімен бөлісті. Сонымен қатар, ағылшын тілінің аймақтық офисіндегі Қазақстандағы ағылшын тілін оқыту бағдарламаларына тоқталып өтті.

Ұстаздар өз кезегінде облыстық білім басқармасына алғысын білдірді. Бүгінгі семинардан алған дағдыларды сабақ барысында қолданамыз деп бекініп отыр.

Облыста халық санағы қызу жүруде. Тіпті аз уақытта түгел дерлік санақтан өтіп үлгерген аудандар да бар екен. Мұндай жұмыстардың атқарылуы халықты сұхбаттаушының белсенділігіне байланысты. Өз округіне тиесілі тұрғындары аяқтай аралап, санақ бойынша тіркеген жанның бірі-Кәмшат Жұмағалиева. 2018 жылдан бері Желаев кенттік округінде газ мекемесінің бақылаушысы болып қызмет етіп келеді. Санақ жұмыстарын қатар атқаруды ұйғарған. 1-19 қазан аралығында 185 үйді аралап, 804 тұрғынды тіркепті. Кәмшат ханымның еңбегі ескеріліп, марапатталды. Жалпы, облыс аумағында 303 мыңнан астам адам онлайн режимдегі санақтан өткен.

Жәңгір хан атындағы Батыс Қазақстан аграрлық-техникалық университетінде «Етті-майлы және етті-жүнді бағыттағы қой тұқымдарын бонитировкалау» тақырыбында семинар өтті. Бұл іс-шараны – Ұлттық аграрлық ғылыми білім беру орталығы мен Жәңгір хан университеті арасындағы келісімшартқа сәйкес «AGROTECH HUB» жобалық кеңсесі ұйымдастырды. Семинар барысында отандық қой шаруашылығының қазіргі жағдайы мен даму болашағы жайында сөз қозғалды.

Семинар жұмысына Батыс Қазақстан облысымен қатар, Ақтөбе және Атырау өңірлеріндегі шаруа қожалықтарының, сонымен қатар Нұр-Сұлтан және Алматы қалаларындағы аграрлық университеттердің қой шаруашылығы саласы мамандары қатысты. Олар өздерінің көкейіндегі сауалдарын сала мамандарына жолдап, тұшымды жауаптар алды. Оған қоса білім ордасындағы ветеринарлық клиникада Ақжайық және Еділбай тұқымды қойларға бағалау жүргізу тәсілдері түсіндірілді.

Шаруа иелері семинардан алған дағдылар мен озық тәжірибені енді өзімізде жүзеге асырамыз деп бекініп отыр. Семинар соңында қатысушыларға арнайы сертификаттар табысталды.

Жәңгір хан атындағы Батыс Қазақстан аграрлық-техникалық университеті қайырымдылық айлығына өз үлестерін қосуда. Университетте «Қариям, асыл қазынам!» атты іс-шара жоспары бекітілген. Осы орайда жоспарға сай студент жастар игі істерді қолға алып отыр. Бұл жолы Ұлы Отан соғысының ардагері Кирпичев Александр Федосеевичтің үйіне барып, көмек көрсетті. Сауабы мол шараға белсенді студенттер мен оқу орнындағы «Жәңгір хан ұрпақтары» волонтерлік қозғалысының мүшелері атсалысты.

Жәңгір хан атындағы Батыс Қазақстан аграрлық-техникалық университетінде 56 ардагер бар екен. Аталмыш акция аясында университет қызметкерлері мен студенттері басқа да ардагерлерді елеусіз қалдырмай, үйлеріне барып, қайырымдылық айлығы аясында көңіл бөлуде. Өз кезегінде қазыналы қариялар мен ақ жаулықты аналарымыз алғысын айтып, ақжарма тілектерін білдіріп жатты.

Оқу орнының басшылығы қайырымдылық айлығы студенттердің бойына ұлттық құндылықтарды сіңіріп, үлкенді сыйлай білуге, ардагерлер еңбегін ұмытпай, есте сақтауға және аталы сөзден ғибрат алуға таптырмас шара екенін атап өтті. Мұндай істер қайырымдылық айлығы шеңберімен шектелмей, жыл бойына жалғасады.

Баспаналы болған жанның бірі-Әсел ханым. Ремзавод ауданынан 3 бөлмелі пәтерді 7 айдың ішінде алып отыр. Жолдасы және З баласымен осы уақытта дейін жалдамалы пәтерде тұрып келген.

Су жаңа көлік мінуді жоспарлап жүрсіз бе? Баспаналы болғыңыз келе ме? Онда "Адал" сауда үйінің 2-ші қабатында орналасқан 8-ші кабинеттегі кооператив кеңсесіне жолығыңыз!

Университет қабырғасында «AGROTECH HUB» жобалық кеңсесінің ұйымдастыруымен «Тұйық сумен жабдықтау қондырғысында бекіре балықтарын және тоғандарда тұқы балықтарын өсіру технологиясы» тақырыбында семинар оздырылды. Жиын барысында балықтардың түрлері мен биологиялық ерекшеліктері, далалық жағдайда уылдырықты инкубациялауды ұйымдастыру, бекіре балықтарының азығына қойылатын талаптар сияқты мәселелер көтерілді. Семинарға қатысушылар өздерінің көкейіндегі сауалдарын сала мамандарына жолдап, тұшымды жауаптар алды.

Семинар аясында қатысушылар балық өсірумен айналысатын бірнеше серіктестікке аяқтай барды. Оған қоса білім ордасының ғимаратында қолға алынған тұйық су айдынында бекіре тұқымдас балықтарды өсіру технологиясымен танысты. Елордадан арнайы келген Гүлжан ханым семинардан алған дағдылар мен озық тәжірибені әріптестеріммен бөлісемін дейді. Өзі қызмет атқаратын оқу орнында да бекіре тұқымдас балықтарды өсірумен айналысады екен.

Семинар соңында қатысушыларға арнайы сертификаттар табысталды.