баспана мәселесі – TDK-42

Апатты үй мәселесі

Айнур Құрмашева — Thu, 03 Jun 2021 13:04:46 +0000

Орал қаласында әбден тозығы жеткен үйдің тұрғындары әр күн мен түнін қауіппен өткізуде. Осыдан он жыл бұрын арнайы комиссия шешімімен ғимарат апатты деп танылса да, олар қауіпсіз жерге көшірілмеген. Қала әкімдігі жыл сайын уәде береді. Бірақ ол әлі орындалар емес. "Бір күні үйіндінің астында қаламыз ба деп" қорқып отырған тұрғындардың шағымын тілшіміз тыңдады.Кезінде орыстың атақты әншісі Федор Шаляпиннің өзі төрінде ән әуелеткен қазіргі тұрғынжайдың халі осы. Үй иелері 130 жылдық тарихы бар нысан жирмасыншы ғасырда ғана жөнделгенін айтады. Қаланың қақ ортасында орналасқан баспанада газ, су, әжетхана жоқ. Қалқиған төрт қабырғасы ғана. Барар жер, басар тауы жоқ тұрғындар осы апатты үйде күн кешуге мәжбүр.
Осылайша тұрғындар апатты үйлерінің орнына берілетін жаңа баспаналарын көруге құрылыс басына барып, салынып жатырған үйлердің жағдайымен танысқан. Бірақ құрылыс бітер уақыт жақындаған сайын шенеуніктердің уәдесі мың құбылып, мемлекеттік-жекеменшік серіктестік арқылы баспаналы болуды ұсыныпты. Ал бұл ұсынысқа бірді-бір инвестор қызығушылық танытпаған көрінеді.Бұл баспана осыдан он жыл бұрын апатты деп танылған. Үй иелері жаңбыр жауған сайын шатырдан су ағып, қыс болса жарық қабырғадан суық ішке еніп, беймаза күн кешеді. Оралдағы осындай 52 апатты үйде тұратын 249 отбасы пәтер кезегін күтіп отыр. Қаланың ескі бөлігіндегі мұндай тарихи нысандардың дені мемлекет қорғауына алынған. Алайда нәтиже көзге көрінер емес.

Баспана мәселесі

Ажар Хамитова — Tue, 22 Sep 2020 08:54:14 +0000

БҚО-да ауылдық жерлерде кадр мәселесін шешу үшін бірінші кезекте мамандарды баспанамен қамтуға назар аударылмақ. Үкімет ауылдық жерде үй мәселесін шешу үшін білек сыбана кіріскендей. Енді жұмыс беруші қызметкерлеріне арнап үй салатын болса, мемлекет баспананың елу пайыздық құнын субсидияламақ.

Баспана мәселесі қашан да өз өзектілігін жоғалтқан емес. Өзгенің босағасында жүрген отбасылар тапқан табысының жартысын пәтер ақыға төлеуге мәжбүр. Мемлекет баспаналы жандардың санын арттыру үшін түрлі бағдарлама жасап жатыр. Соңғы жылдары "Нұрлы жер" бағдарламасының аясында 1,3 млн шаршы метр азаматтарға табысталған болатын. Үйлердің көбі облыс немесе аудан орталықтарында бой түзеп жатқаны да жасырын емес. Ал ауылдың жоқ-жітігін сапалы кадрлар көтеретіні сөзсіз. Енді ауылда қызметкерлердің үйлі болуы үшін жаңа бағдарлама жасақталып жатыр. Үкімет құрылысшыларды қолдау үшін баспананың 50 пайыздық құнын субсидияламақ. Бұл үшін құрылыс компаниясы үйдің аумағын 100 шаршы метрден асырмауы керек. Және баспананың құны 10 млн теңгеден қымбат болмауы қажет.

Баспана мәселесі талқыланған жиында аймақ басшысы сала мамандарына құрылысы жүріп жатқан үйлер туралы ақпаратты жаңартып отыруға тапсырма жүктеді.

Жалпы БҚО -да "Нұрлы жер" бағдарламасының аясында түрлі қаржыландыру көздерінің арқасында 485 мың шаршы метр баспананы салу жоспарланып отыр. 2020 жылы 9 көпқабатты үй мен ауылдық жерлерде 90-ға жуық баспана азаматтарға табысталмақ.