Елімізде балық шаруашылығында да шешімін таппай жатқан мәселе жоқ емес. Балық өнімділігін өсіру, балықты тұтыну көлемін арттыру, экспортқа шығармай, ішкі сұранысты қарық қылдырып алу, балық шауашылығымен айналысатындарды мемлекеттік қолдау мәселелері бүгін Парламент Мәжілісіндегі Үкімет сағатында талқыға салынды. Экология министрі Серікқали Брекешев заңсыз балық аулау фактілері жиілеп кеткенні айтады. Биылдың өзінде 61 млн теңгеден астам сомаға 4,5 мыңнан астам бұзушылық анықталды және 65 млн теңге сомасына талап қойылды. Енді министрлік браконьерлермен күресті күшейтпек. Ол үшін қаражат жеткіліксіз дейді бас эколог. Министр Брекешев депутаттарға броконьерлердің жолын кесу үшін «Әкімшілік құқық бұзушылық туралы кодекстің әзірленіп жатқан жобасы аясында айыппұл салуды ұсынды. Балықты тыйым салынған құралдармен аулағандарға 20-дан 50 айлық есептік көрсеткішке дейін айыппұлды ұлғайту және 1 жыл ішінде қайталап заң бұзғаны үшін 15 тәулікке әкімшілік қамау қажет дейді министр. Қазақстанда жыл сайын 45 мың тонна балық ауланады. Сондай-ақ, жыл сайын 25 мың тоннаға жуық балық және балық өнімдері экспортталады. Оның негізгі үлесі терең өңделген өнім. Дегенмен, елімізге импортпен келетін балық көлемі өте көп. Экология министрі импортты ішкі балықпен алмастыру үшін шаруаларға мемлекеттік субсидия беріп, балық түрлерін көбейтіп жатырмыз дейді.

Министрдің мәлімдеуінше, қазақстандықтар жан басына шаққанда 4 келіден аз балық тұтынады. Ал Дүниежүзілік денсаулық сақтау ұйымы бір адам жылына 16 келі балық жеуі керек деп ұсынады. Мәжілісмендер тіпті мектептер мен балабақшаларда балалардың ас мәзірінде балық өнімі аз дейді.

Сондай-ақ, депутаттар балық шаруашылығына бөлініп жатқан мемлекеттік субсидия дұрыс игерілмейтінін айтып, сынады. Ал балық өнімін арттыруға қатысты жобалар сөз жүзінде қалып жатыр дейді.

Балық шаруашылығында маман тапшы. Жылына балық шаруашылығы мамандығына оқытуға 100 грант бөлінсе, оның 70 пайызы ғана жұмыспен қамтылған. Айлығы төмен жұмысқа жастар барғысы келмейді дейді депутаттар.